Muhanga: Barasaba ko basanirwa iteme ryitse i Nyabisindu rishobora guteza impanuka

  • AKIMANA JEAN DE DIEU
  • Ukuboza 30, 2023
  • Hashize amezi 5
Image

Abakoresha umuhanda uva i Nyabisindu werekeza mu mujyi wa Muhanga barasaba ubuyobozi bw’Akarere gusana iteme riherutse kubakwaho ruhurura ryitse i Nyabisindu ndetse rikanacukunyuka, bigatera impungenge ko rishobora guteza impanuka kubera ko ibinyabiziga bikatira ibyo binogo.

Ngendahimana Constante avuga ko hashize igihe gito n’ubundi irindi teme riherereye ku masangano y’umuhanda uva ku Biro by’Akarere ka Muhanga werekeza mu Ntara y’Iburengerazuba irindi teme nk’iri ryitse rihagarika imodoka zavaga mu Karere ka Karongi no mu Karere ka Ngororero.

Yagize ati: “Ni byo dufite impungenge kuri uyu muhanda kuko iri teme nk’uko muribona ryarangiritse kandi si iri ryonyine kuko hari n’iriri ku masangano y’umuhanda mukuru wa Muhanga -Karongi ukanerekeza mu Karere ka Ngororero ufite iteme riherutse kwangirika rigahagarika ingendo zavaga muri turiya Turere werekeza muri Gare ya Muhanga kubera kugwamo”.

Niyibizi Alphonse avuga ko habayeho uburangare kuko iri teme ryubatsweho ruhurura babibona ko ryamaze kwika ndetse harimo kubera impanuka nto z’amagare na moto kubera kubererekera ibinogo byahacukunyutse.

Ati: “Hatangira kubakwa iyi ruhurura babonaga ko iri teme ryamaze kwika ariko nta munsi washira hatabereye impanuka y’igare ryamanutse ryajya gukatira ibinogo rikarenga umuhanda cyangwa rikagongana n’ibindi binyabiziga nabyo bidashaka guca mu binogo byacukunyutse aho hitse”.

Mukamana Marie Claire yatangarije Imvaho Nshya ko aho hantu hangiritse hadashobora kumara iminota 30 hataguye igare cyangwa moto kandi ko abayobozi bahasuye akumva bavuga ko hazakorwa ari uko igice cya 2 cyo kubaka umuhanda Kibuye Muhanga kihageze.

Yagize ati: “Nkuko uhareba hagarara aha iminota 30 urabona igare cyangwa moto bihagwa cyangwa bikagongana kandi hari abayobozi baherutse kuhasura twumva bavuga ko hazakorwa ari uko umuhanda uva Karongi ugeze inaha, ariko aha hantu hateje inkeke kuko hanyura abana benshi bagiye kwiga amasomo y’inyongera mu mujyi bashobora kurangara bakabagonga”.

Umuyobozi w’Akarere ka Muhanga wungirije ushinzwe iterambere ry’Ubukungu Bizimana Eric yatangarije Imvaho Nshya ko iki kibazo bakibonye ariko bagikomeje gushaka uko hakorwa, kubera ko nubwo uyu muhanda uri ku rwego rw’Akarere unoroshya ububahahirane.

Yagize ati: “Nubwo uyu muhanda ufatiye ku muhanda rusange uri ku rwego rw’Igihugu, dukomeje gushaka amafaranga yo kuhasana  kugira ngo hatagira abahakoresha bahahurira n’ibibazo byo kuhburira ubuzima, bitewe n’abawukoresha barimo imodoka, amagare n’amapikipiki kandi turasaba abahakoresha ko babonye bidashoboka bajya bakoresha umuhanda mushya wa Ruvumera”.

Mu mezi 5 ashize ku muhanda wo ku rwego rw’Akarere hangiritse irindi teme ryegereye ku masangano y’imihanda 3, uva ku Biro by’Akarere ka Muhanga werekeza mu Karere ka Karongi no mu Karere ka Ngororero uvuye kuri iryo teme ryari ryarangiritse ni ho hangiritse irindi teme riherutse kubakwaho ruhurura imanura amazi mu Ruvumera riherereye nko kuri metero 150 uvuye ku masangano y’uwo muhanda wo ku rwego rw’Igihugu, Muhanga- Ngororero na Karongi.

  • AKIMANA JEAN DE DIEU
  • Ukuboza 30, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE