Muhanga: Leta igiye kunganira ku Mashyiga ingo zisaga 40,000

  • NTAWITONDA JEAN CLAUDE
  • Kamena 28, 2023
  • Hashize amezi 11
Image

Ubuyobozi bw’Akarere ka Muhanga bwemeza ko bugiye kubyaza umusaruro Nkunganire yatanzwe na Leta y’u Rwanda ku Mashyiga avuguruye, aho ingo zisaga 10, 488 zizunganirwa ku kigero cya 90% n’izindi zikabakaba 30,000 zizunganirwa ku kigero cyo munsi yaho. 

Byagarutsweho ubwo hakorwaga ubukangurambaga mu baturage b’Akarere ka Muhanga kuri iyi gahunda ya Nkunganire yatangijwe na Leta y’u Rwanda binyuze mu Kigo cy’Ingufu REG/ EDCL ku nkunga ya Banki y’Isi ibinyujije muri  Banki y’Amajyambere y’u Rwanda (BRD).

Umuyobozi w’Akarere wungirije ushinzwe ubukungu n’iterambere ry’abaturage muri   Muhanga Bizimana Eric, ubwo yaganiraga n’abaturage ayoboye kuri iyi gahunda, yashimye Leta yemeza ko bagiye guharanira ko buri muturage imugeraho bityo binaborohereze mu kazi.

Agira ati:”Ni inyungu ikomeye ku baturage bacu bagiye kwizigamira amafaranga bakoreshaga azabafasha mu bindi bikorwa byo  kwiteza imbere mu buryo butandukanye. Ikindi natwe ntabwo tuzongera kwirirwa twiruka ku baturage ngo bari kwangiza amashyamba bashaka inkwi.”

Bizimana Eric akomeza avuga ko mu Karere bafite ingo zigera ku 10,488 zahoze mu cyiciro cya mbere cy’ubudehe bagenda bakivamo kubera gahunda Leta yashizeho ndetse n’iyi Nkunganire ikaba izagira uruhare rukomeye mu gufasha abo baturage.

Agira ati: “Ubusanzwe iyi gahunda yunganira abaturage bahoze mu cyiciro cya mbere ku kigero cya 90%, ni amahirwe kuri twe no ku baturage tugiye guharanira ko ziriya ngo zose zigerwaho n’iyi gahunda ndetse n’abaturage muri rusange bose tunashishikariza kubyaza umusaruro iyi gahunda.”

Avuga ko iyi gahunda izagera ku baturage batandukanye kuko mu cyiciro cya kabiri habarizwa ingo 29,755 n’abandi bari mu bindi byiciro.

Ubuyobozi bw’Ikigo cy’Igihugu gishinzwe Ingufu (REG), buvuga ko iyi gahunda yaje gufasha cyane abafite amikoro make abatera gukoresha uburyo buhenze bateka bikagira ingaruka ku bukungu bwabo,ubuzima bwabo n’ibidukikije muri rusange bikahangirikira.

Karera Issa umukozi REG/EDCL mu gashami gashinzwe ibicanwa, asaba abaturage kudacikanwa n’aya mahirwe agasaba n’abacuruzi gushora Imari muri iyi gahunda ari benshi.

Agira ati: “Turifuza kugera ku baturage benshi mu gihe gito,turasaba abashoramari kuzuza ibisabwa ari benshi kugira badufashe kwesa uyu muhigo. Amafaranga yo kubunganira mu gishoro turayafite, dusaba n’abaturage kwitabira kubyaza umusaruro aya mahirwe.”

Karera akomeza avuga ko bagikoresha ibyiciro mu kunganira abaturage aho ari inkunga ikomeye kuba Leta yishyurira umuturage ku kigero cya 90% kumanura bitewe n’icyiciro arimo.

Twahirwa Appolinaire, Umuyobozi wa T-Hirwa Supply Company Ltd ikwirakwiza imbabura zirondereza amakara mu bice bitandukanye mu Rwanda, yemeza ko batangiye gufasha n’abaturage kwishyura mu byiciro.

Agira ati: “Twasanze bamwe mu baturage bafite ubushobizi buke bwo kwishyura uruhare rwabo, ni yo mpamvu twatangiye kujya tubishyuza mu byiciro kandi biri gutanga umusaruro.”

Mwizerwa Judith, umwe mu baturage batuye mu Karere ka Muhanga, ashima ubuyobozi bwashyizeho iyi gahunda kuko ibungura.

Agira ati: “Ndi mu cyiciro cya mbere, mpawe imbabura nishyuye amafaranga make cyane ni nk’ubuntu. Turifuza ko bazitugezaho turi benshi mu byaro kuko byagabanya iyangirika ry’ibidukikije, biri kudufasha kuzigama amafaranga tukayakoresha ibindi biduteza imbere bikazatuma tuva mu cyiciro twarimo twiteze imbere.”

Akarere ka Muhanga kabarurwamo ingo zigera ku 92,406 mu gihe izibarizwaga mu cyiciro cya mbere ari 10.488, na ho icyiciro cya kabiri zikaba 29,755.

Ubuyobozi bw’iyi gahunda ya Nkunganire ku Mashyiga bwemeza ko imaze kugera ku ngo zikabakaba bihumbi 100 ariko bagomba kuba bageze ku ngo 500,000 muri 2026.

  • NTAWITONDA JEAN CLAUDE
  • Kamena 28, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE