Muhanga: Isoko rya Nyabisindu bijejwe rimaze imyaka 4 ritarubakwa rikabateza igihombo

  • AKIMANA JEAN DE DIEU
  • Ukuboza 29, 2023
  • Hashize amezi 5
Image

Bamwe mu bacuruzi n’abaturage barema isoko ry’imboga rya Nyabisindu riherereye mu Murenge wa Nyamabuye mu Kagali ka Gitarama baravuga ko babangamiwe n’imiterere y’iri soko bakemeza ko bahorana ibihombo gituruka ku mvura n’izuba byose bibangiriza ibicuruzwa.

Mu kiganiro n’Imvaho Nshya bavuga ko bifuza ko ryakubakirwa kuko izuba ryangiza imboga n’imbuto bacuruza ndetse imvura ikanyagira bimwe muri ibyo bikabora.

Murorunkwere Patricie ni umucuruzi avuga ko bibabaje kubona batanga imisoro ariko bagahora basaba kubakirwa ntibahabwe icyizere niba bizashobora cyangwa byarananiranye.

Ati: “Biratubabaza iyo twirya tukimara tugatanga imisoro ariko tukagwa mu bihombo by’uko izuba n’imvura bitwangiriza ibyo ducuruza kandi tubisabye igihe kirekire ko batwubakira iri soko igihombo tugira kikagabanyuka ariko nta cyizere baduha kandi hashize igihe”.

Kalinda Deogratias ni umucuruzi avuga ko hashize igihe bagaragaza ko bakorera mu gihombo guturuka ku miterere y’iri soko ritubakiye bigaterwa n’izuba n’imvura byangiza ibicuruzwa byabo agasaba ko hakwiye kugira igikorwa.

Yagize ati: “Ni byo dukeneye ko iri soko dukoreramo ryubakwa kuko imiterere yaryo idutera igihombo kubera izuba n’imvura ntabwo twishimye turifuza ko hagira igikorwa iti soko rigasakarwa wenda iki kibazo dufite cyaba kigabanyutse”‘

Umuhinzi w’Imboga Karemera Ludovic yabwiye Umunyamakuru ko kuzana imboga wejeje imvura ikagwa cyangwa haramutse izuba ushobora kuzisubizayo zamaze kuma, ugerageza kugurisha vuba bitaruma kugira ngo utabura abakugurira ugahomba.

Yagize ati: “Njyewe ndi umuhinzi uhinga imboga zirimo idodo,intyoryi na Karoti ariko iyo nzizanye mfata ayo bampaye kugira ngo zitandabiraho ngahomba byose mfata udufaranga bampaye nkitahira nkajya mu yindi mirimo kuko utegereje wahomba kubera kuma no kunamba”.

Bakomeza bavuga ko bijejwe kuryubakirwa mu myaka irenga 4 yose bakemeza ko ryubatswe byabafasha kudakorera mu bihombo.

Umuyobozi w’Akarere ka Muhanga wungirije ushinze iterambere ry’Ubukungu Bizimana Eric avuga ko iri soko ryatangiye gukorerwa inyigo izakurikirwa no gushakirwa amafaranga yo kuryubaka.

Yagize ati: “Gahunda yo kubaka iri soko rya Nyabisindu twarayitekereje kandi twararisuye ndetse inyigo yatangiye gukorwa mu gihe hagishakishwa ubushobozi bwo kuryubaka”.

Akomeza avuga ko bajya gutekereza gukora inyigo yaryo banatekereje ku bakora ubucuruzi butemewe bagomba kuzahimukira bagakorera ahantu hazwi bakwiye gusangwa kandi amafaranga namara kuboneka rizatangira kubakwa.

Urebye imiterere y’iri soko ricururizwamo ibijyanye n’imboga bavuga ko hakwiye kugira igikorwa kugira ngo aba bahinzi n’abacuruzi badakomeza guhombywa n’izuba n’imvura bimwe mu bigaragazwa n’abakorera n’abahazana ibicuruzwa.

  • AKIMANA JEAN DE DIEU
  • Ukuboza 29, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE