Muhanga: Batunguwe n’imisoro y’ubutaka yiyongereye kandi Leta yarayigabanyije

  • AKIMANA JEAN DE DIEU
  • Gashyantare 29, 2024
  • Hashize amezi 2
Image

Mu gihe hasigaye amasaha make yo kuba abasorera ubutaka bagomba kumenyekanisha no kwishyura umusoro bigomba kurangirana n’Itariki ya 29 Gashyantare 2024, hari abaturage batunguwe n’imisoro y’ubutaka yagabanyijwe bagiye kuyishyura bagasanga yariyongereye.

Iteka rya Minisitiri No 002/23/10/TC ryo ku wa 24/11/2023 rigena ibipimo fatizo n’ibindi bikurikizwa mu gushyiraho igipimo cy’umusoro wishyurwa kuri metero kare y’ubuso bw’ubutaka ryagennye ko ubutaka buri mu duce dukorerwamo ibikorwa by’iterambere mu Mujyi wa Kigali, ahagenewe inganda hasora, n’icyanya cy’imyidagaduro buzajya busora hagati ya 70 Frw na 80 Frw kuri metero kare.

Ahagenewe guturwa hazajya hasora hagati ya 60 Frw na 80 Frw kuri metero kare, naho ubutaka buri muri santeri iciriritse y’Umujyi mu gace kagenewe ubucuruzi buzajya busora hagati ya 50 Frw na 70 Frw, ahagenewe guturwa hazajya hasora hagati ya 40 Frw na 60 Frw kuri metero kare.

Ubutaka buri mu duce twavuzwe haruguru mu mijyi y’Uiturere igaragiye cyangwa yunganira Umujyi wa Kigali, bwo buzajya busoreshwa hagati ya 40 Frw na 70 Frw kuri metero kare.

Mu nkengero z’umujyi bazajya basora hagati ya 20 Frw na 50 Frw, mu gihe ubutaka bwagenewe guturwamo buzajya busora hagati ya 10 Frw na 40 Frw.

Ubutaka buri mu dusanteri n’ubukorerwaho ubucuruzi mu mijyi igaragiye n’iyunganira Kigali buzajya busoreshwa hagati ya 10 Frw na 20 Frw mu gihe ahantu h’icyaro ubutaka bwabo buzajya busora hagati ya 0 Frw na 10 frw kuri metero kare.

Ubutaka buri ahasigaye hose mu gihugu, ni ukuvuga mu turere tw’ibyaro buzajya busoreshwa hagati ya 0 Frw na 20 Frw, ahagenewe guturwa hasore hagati ya 0 Frw na 5 Frw mu gihe ahagenewe ubuhinzi n’ubworozi haba mu mijyi no mu byaro hose umusoro w’ubutaka ni hagati ya 0 Frw na 0,4 Frw kuri metero kare.

Bamwe mu baturage bo mu Mujyi wa Muhanga mu Mirenge ya Nyamabuye, Shyogwe, Cyeza na Muhanga, bavuga ko batunguwe no kubona umusoro bishyura wariyongereye kandi bari bazi ko wagabanyijwe.

Kuri ubu bavuga ko barimo kujya kwishyura bagasanga aho bishyuraga ibihumbi 35 by’amafaranga y’u Rwanda byazamutse bakaba bishyura agera cyangwa arenga ibihumbi 60 by’amafaranga y’u Rwanda.

Umwe muri bo utuye mu Mudugudu wa Ruhina, Akagari ka Ruli, Umurenge wa Shyogwe, yabwiye Imvaho Nshya ko yishyuraga ibihumbi 37 none byarazamutse yishyura ibihumbi 58 by’amafaranga y’u Rwanda.

Yagize ati: “Niba koko itegeko rigenga imisoro ryaragaragazaga ko risubiwemo kugira ngo ryorohereze abaturage kandi ubuso twasoreraga ntabwo bwigeze bihinduka none amafaranga nishyuraga yiyongereyeho ibihumbi 21 kuko nishyuraga amafaranga ibihumbi 37 none ngeze ku bihumbi 58 ahubwo byarazamutse byanantunguye.”

Uwitwa Rugamba atuye mu mu Mudugudu wa Ruvumera, Akagari ka Gahogo mu Murenge wa Nyamabuye, avuga ko mu gihe hari bamwe imisoro yazamutse hari n’abo yagiye igabanyuka cyane.

Yagize ati: “Dukeneye kumenya uko imisoro yashyizweho kuko usanga tutabizi. Turajya ku rubuga rwa Irembo bakatubwira ko amafaranga twishyuye ubushize yiyongereye kandi batubwiye ko itegeko ryayigabanyije nkatwe tubona nta kintu cyavuyeho.”

Nzeyimana Modeste atuye ahitwa mu Rutenga avuga ko yari asanzwe yishyura amafaranga ibihumbi 36 none yasanze agomba kwishyura ibihumbi 21.

Yagize ati: “Nanjye byantunguye kuko nari nsanzwe nishyura ibihumbi 36 none banyeretse ko ngomba kwishyura ibihumbi 21 bivuze ko havuyeho ibihumbi 15 byose.”

Ubusanzwe ibipimo by’imisoro y’ubutaka bishyirwaho n’Inama Njyanama nk’urwego ruyobora Akarere, ariko rukayigena rugendeye ku miterere y’ahantu n’ikizahakorerwa.

Perezida w’Inama Njyanama y’Akarere ka Muhanga, Octave Nshimiyimana, avuga ko hari uduce twagiye tugabanyirizwa imisoro bijyanye n’itegeko rishingirwaho hatangwa umusoro, ku buryo amafaranga atangwa ari hagati y’amafaranga 10frw na 80 frw kuri Metero kare imwe.

Yagize ati: “Ni byo natwe twarebye ibishoboka byatuma dufasha abaturage bacu ku buryo hari ibice byagabanyirijwe umusoro nk’urugero ko mu Murenge wa Shyogwe ahitwa mu Ruhina twavuye kuri 50 Frw twariho mbere ya 2023 ubu bishyura amafaranga 30 kuri metero kare imwe mu miturire, naho mu butaka bw’ubucuruzi bavuye ku mafaranga 60 ubu bari ku mafaranga 40.”

Akomeza avuga ko mu bice byo mu Kagari ka Gahogo aho bita mu Ruvumera nta mpinduka byakomeje kuba ku mafaranga 60 mu miturire naho mu bucuruzi bakomeza kuguma ku mafaranga  70, ndetse ahazwi nko mu Rutenga muri aka Kagari  naho nta mpinduka byakomeje kuba kuri 60 mu miturire naho mu bucuruzi bakomeza kuguma ku mafaranga 70 kuri metero kare.

Umuyobozi w’Ishami ry’Ikigo cy’Imisoro n’Amahoro (RRA) mu Karere ka Muhanga Sano Samuel Musabimana, avuga ko ikigo ahagarariye gishyira mu bikorwa ibyo Njyanama yatanze ku kigo i Kigali, ari na byo biciro abaturage basoreraho.

Yemeza ko impamvu hari abaturage bijujutira ko umusoro batanga wiyongereye ari uko hari igihe baba bafite ahantu hagejejwe ibikorwa remezo birimo n’imihanda, amazi n’amashanyarazi kuko n’ibipimo by’imisoro bizamukana na byo.

Bivugwa ko ahagejejwe ibikorwa remezo byinshi igipimo cy’imisoro yaho cyiyongera
  • AKIMANA JEAN DE DIEU
  • Gashyantare 29, 2024
  • Hashize amezi 2
TANGA IGITEKEREZO
lg says:
Gashyantare 29, 2024 at 9:41 am

Sibo bonyine rwose nanjye byantunguye kubona nishyura ibihumbi 150 000 mukibanza cyo muntara kirimo inzu itanatuwemo

Andika igitekerezo

AMATEGEKO AGENGA IYANDIKA RY'IGITEKEREZO CYAWE