Muhanga: Abaturiye uruzi rwa Nyabarongo barasaba ko rwashyirwaho indangururamajwi

  • AKIMANA JEAN DE DIEU
  • Ugushyingo 28, 2023
  • Hashize amezi 3
Image

Hashize amezi arenga 2 umugezi wa Nyabarongo utwaye umwana Ishimwe Herve w’imyaka 16  akaburirwa irengero ubwo yari kumwe n’abandi bana batatu bari bavuye kurema isoko ry’ahitwa ku Cyome, mu Murenge wa Gatumba mu Karere ka Ngororero.

Bamwe mu baturiye urwo ruzi basaba ko hashyirwaho indangururamajwi yajya iburira abaturage mu Turere twa Muhanga na Ngororero, kubera ko iyo urugemero rwa Nyabarongo rurekuye amazi akunze gutwara abo asanze barimo kwambuka urwo ruzi.

Bikekwa ko ari na ko byagenze kuri uwo mwana waburiye ku gice cy’Akagari ka Nsanga, Umurenge wa Rugendabali nyuma y’amazi yari arekuwe n’urwo rugomero rwubatswe mu Murenge wa Mushishiro.

Mukunzi Jean Paul w’imyaka 38 yabwiye Imvaho Nshya ko abaturiye Nyabarongo bahora biteguye ko yakuzura bitewe n’imvura cyangwa urugomero rurekuye amazi akunda gutwara abantu, ariko akaba asaba kujya bamenyeshwa igihe urugomero rugiye kurekura amazi by’umwihariko.

Yagize ati: “Nkatwe duturiye hano duhora twiteguye ko yakuzura biturutse ku mvura yagwa  mu bice bya Ruhango, Nyanza na Karongi kuko ituma huzura, ariko kandi hakiyongeraho urugomero rutanga amashanyarazi rukunda kurekura amazi akaba yatwara abambukaga bajya hakurya y’uruzi. Ni yo mpamvu dusaba ko hashyirwaho uburyo bwo kumenyesha abahaturiye ko amazi agiye kwiyongera nk’uko iteganyagihe rikunda kubitangaza”.

Mukamana Marie Rose avuga ko iyo amazi bayarekuye atwara abarimo kwambuka kandi hari abakorera akazi kabo ka buri munsi mu  Turere twombi, ariko bakwiye gushyiraho indangururamajwi yajya iburira abantu ko bitegura kurekura amazi.

Yagize ati: “Uru rugomero rukwiye gushyiraho uburyo buhamye bwo kumenyesha abaturage ko amazi agiye kurekurwa kuko utu Turere twa Muhanga na Ngororero dukunze kugira abantu barengerwa rimwe na rimwe bakarohorwa cyangwa bakabura. Cyangwa se bishobotse tukubakirwaho ibiraro byo mu kirere byadufasha kujya twambuka nta nkomyi”.

Uwarokoye abana batatu bari kumwe na Ishimwe Herve avuga ko yari arimo kwahira ubwatsi bw’amatungo ku nkombe za Nyabarongo akabona abana barimo gutwarwa n’amazi agerageza bamwe undi amucika abireba.

Yagize ati: “Nagerageje kurwana n’abana batatu mbakuramo undi ndamushaka ndamubura kuko nari ndimo kwahira ubwatsi bw’amatungo ku nkombe y’uyu mugezi amazi aza ari menshi ntangira kurwana na yo andusha ingufu aramujyana nkiza batatu bari kumwe na we.”

Ababyeyi ba Ishimwe bavuga ko bashenguwe bidasubirwaho n’ibura ry’umwana wabo. Abaturanyi b’uyu muryango bavuga ko bibabaje kubura umwana wawe yatwawe n’uruzi bagasaba ko hashyirwaho uburyo buhamye bwo kumenyesha abahaturiye ko uruganda rukora amashanyarazi ko rugiye kurekura amazi.

Abaturage bagirwa inama yo kumenya icyo iteganyagihe riteganya kugira ngo batazajya batwarwa n’amazi yuzura abatunguye

Abayobozi b’Imirenge ya Rugendabali na Mushishiro bahuriza ku kuba habaho uburyo bwo kumenyesha abaturiye uru ruzi ku buryo bajya bava mu nzira hakiri kare.

Umuyobozi ushinzwe ingomero z’amashanyarazi mu kigo gishinzwe gukwirakwiza Ingufu z’Amashanyarazi (EUCL)Twajamahoro Jean Providence, yasabye abaturiye uruzi rwa Nyabarongo guhora biteguye ko amazi ashobora kuba menshi bitewe n’imvura nyinshi, uretse n’urugomero.

Yavuze ko bakwiye no kumenya n’icyo Ikigo cy’Igihugu gishinzwe ubumenyi bw’Ikirere (Meteo Rwanda) cyatangaje buri munsi kugira ngo birinde impanuka zishobora guterwa n’amazi yakwiyongera aturutse ku mvura.

Yahakanye ko haba hari amazi yiyongera aturutse ku rugomero, agira ati: “Ikindi dusaba abaturage ni uguca ahantu babona ko hadashyira ubuzima bwabo mu kaga kuko nta kintu twongera ku mazi aca mu mashini akomeza kugenda uko yaciyemo ntabwo yiyongera”.

Uru rugomero rwubatswe rugomba gutanga Megawatt 28 gusa mu gihe cy’impeshyi rutanga nkeya binaturutse ku isayo ikunze kurwuzuramo ivuye aho uru ruzi rugenda runyura.

Abaturiye umugezi wa Nyabarongo barasabwa kwitondera uyu mugenzi kuko ukunze kuzura ugatwara ubuzima bw’abawambuka bajya cyangwa bava mu Karere ka Muhanga na Ngororero.

  • AKIMANA JEAN DE DIEU
  • Ugushyingo 28, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE