Muhanga: Abangavu baterwa inda bakajujubywa batekereza kwiyahura no gukuramo inda 

  • Imvaho Nshya
  • Ukwakira 30, 2023
  • Hashize amezi 4
Image

Bamwe mu bangavu bo mu Karere ka Muhanga bavuga ko mu gihe baterwaga inda bakiri bato imiryango yabo yagiye ibatererana kugera n’aho bamwe bahisemo kuyihunga, naho abayigumyemo bagatekereza kwiyahura no gukuramo inda batewe ari bato.

Mu kiganiro bahaye Imvaho Nshya bavuga ko mbere yo gutwara inda bari bafashwe neza n’imiryango yabo ari abana nk’abandi ariko bamara kuziterwa bagahabwa akato.

Uwahawe izina”Applonie” avuga ko akomoka mu Karere ka Ngororero yakoraga akazi ko mu rugo ku Karere ka Kamonyi aza guterwa inda n’umuhungu wo mu rugo yakoragamo arasezererwa asubira iwabo agezeyo bamuha akato yumva ubuzima buranze yigira inama yo kwiyahura anywa imiti ntiyamwica.

Ati: “Njyewe nakoraga mu rugo mu Karere ka Kamonyi uwanteye inda ni umuhungu waho nakoraga ariko baje kunyirukana ndetse n’uwanteye inda aza kwitaba Imana, gusa mbere numvaga iyi nda nayivanamo ndanabikora biranga nigira inama yo kwiyahura nabyo biranga kubera ko ababyeyi banjye bantotezaga”. 

Uwahawe izina rya”Albine” yabwiye Imvaho Nshya ko yatewe inda afite imyaka 14 iwabo bakomeza kumufata nabi yigira inama yo kwiyahurana, birangira bibaye iby’ubusa inda yanga kuvamo burundu ahitamo kuyibyara.

Yagize ati: “Natewe inda mfite imyaka 14 iwacu mu muryango bampa akato bakamfata nabi nigira inama yo kwiyahura n’uwo ntwite. Bandangira ibyatsi n’indi miti harimo na Glyceline yanga kuvamo nanjye ndemera ndabyara kuko nta kundi nagombaga kubigenza”.

Uwahawe izina rya ” Gyslaine” avuga ko yatewe inda afite imyaka 16 ayiterwa n’Umugabo umuruta waje no kumwihakana ko atariwe utera inda wenyine, iwabo bamufashe neza ariko abaturanyi bakamuvugiraho amagambo atari meza yanatumye umuryango we Wimuka.

Yagize ati: “Natewe inda mfite imyaka 16 kandi nyiterwa n’umuntu unduta cyane yaje no kuyihakana ambwira ko atari wenyine utera inda. Amagambo navugirwagaho ntiyari meza byanatumye umuryango wanjye wimuka aho babaga, kugira ngo umwana wanjye bitazamugiraho ingaruka, kuko baranyumvaga cyane ntibantererane kugeza ubu umwana afite imyaka 12 agiye gusoza amashuri abanza”.

Umuhuzabikorwa w’Inama y’abagore mu Karere ka Muhanga Mukasekuru Marcelline, avuga ko abakobwa baterwa inda bakiri bato bakabuzwa amahwemo n’imiryango yabo iba irimo kugirira nabi umwana wabo n’uwo atwite, kuko bose bagerwaho n’ingaruka zo kutazagira ubuzima bwiza.

Ati: “Abakobwa baterwa bakiri bato bakabuzwa amahwemo n’imiryango yabo iba irimo kubagirira nabi kuko ingaruka zigera ku mwana wabo watewe inda ndetse n’uwo atwite “.

Akomeza avuga ko abo bangavu bahura n’ubuzima bubi ndetse bakagira ibikomere byo ku mutima rimwe na rimwe n’abana bikabageraho, ariko bafite abafatanyabikorwa babafasha gutega amatwi aba bangavu baba baratewe inda, bakanabafasha kongera kubaka ubuzima bakabaha amatungo n’ibindi byo kubafasha gusunika ubuzima.

Yongeraho ko mu gihe umwana agize ibyago agahohoterwa ntabivuge agaterwa inda agomba kubungabungwa akabona umutekano wo kubaho neza n’uwo atwite mu gihe amategeko atamwerera kuyikurirwamo, kuko iyo umubwira nabi ni ho ahera avuga ati uwayikuramo cyangwa nanjye nkiyahura.

Ikindi hari imiryango dufite yita ku bana babyaye ari bato kandi igerageza kubaba hafi ikababonera ubufasha bagasubira ku ishuri abandi bagahabwa amatungo yo guheraho bakiyitaho ndetse n’imiryango yabo ikaganirizwa ikibutswa inshingano ifite ku bana babo.

Umuhuzabikora w’Ibikorwa by’Umuryango Nyarwanda ugamije kwita ku buzima bw’umugore n’umwana w’Umukobwa mu Karere ka Muhanga, Nyandwi Pierre Claver avuga ko aba bakobwa baterwa inda bakiri bato bahura n’ ibibazo bituruka ku buryo bakirwa n’imiryango yabo ndetse n’abaturanyi, bakaba bakwiyahura cyangwa bagakuramo inda.

 Akomeza avuga ko kugeza ubu uyu muryango ufite abangavu batewe inda basaga 120 bahawe amasomo mu gihe cy’umwaka hagamijwe kubahindurira imyumvire ndetse no kubereka uko bakwiye kwitwara.

Abashaka gusubira mu ishuri turabafasha ariko tunabaha inyigisho z’uko babara ukwezi kwabo ariko tunabaha amatungo bakanigishwa uko bategurira abana babo indyo yuzuye.

Yongeraho ko nukoze umushinga ashobora gufashwa kuwukora akiteza imbere adategereje akimuhana kuko kaza imvura ihise.

Mu karere ka Muhanga muri uyu mwaka wa 2023 mu mezi 3 ashize hamaze kugaragara abangavu 43 batewe inda, ndetse aya madosiye yaregewe Urwego rw’Igihugu rw’Ubugenzacyaha (RIB) naho muri 2022 hatewe inda abangavu 104 mu gihe mu mwaka wa 2021 abakobwa 415 bari batewe inda batarageza imyaka 20.

AKIMANA JEAN DE DIEU

  • Imvaho Nshya
  • Ukwakira 30, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE