Mu Rwanda, 46% by’abafite umuvuduko ukabije w’amaraso ntibabizi

  • NTAWITONDA JEAN CLAUDE
  • Nyakanga 21, 2022
  • Hashize imyaka 2
Image

Minisiteri y’Ubuzima yatangaje ko nibura 15.9% by’abaturage b’u Rwanda ari bo bafite ikibazo cy’umuvuduko ukabije w’amaraso, aho abasaga 46% muri bo babana na cyo  batabizi ko bagifite. 

Byashimangiwe na Minisitiri w’Ubuzima Dr Ngamije Daniel, mu gihe kuri uyu wa Kane taliki ya 21 Nyakanga, u Rwanda rwifatanyije n’Isi yose kwizihiza Umunsi Mpuzamahanga wahariwe kurwanya umuvuduko ukabije w’amaraso. 

Imibare itangwa n’Ishami ry’Umuryango w’Abibumbye ryita ku Buzima (OMS) igaragaza ko nibura 30% by’abatuye Isi yose ari bo bafite ikibazo cy’umuvuduko ukabije w’amaraso. 

OMS ivuga ko icyo kibazo gikomeza kwiyongera mu bihugu bifite ubukungu buri hasi n’ubuciriritse (LMICs), aho usanga hejuru ya 65% by’abakuze bari hagati y’imyaka 60 na 69 ari bo bibasiwe kurusha abandi ku Isi. 

Mu Rwanda, imibare y’agateganyo igaragaza ko imibare y’abafite ikibazo cy’umuvuduko ukabije w’amaraso ishobora kwiyongera ikagera kuri 17.78% bitarenze mu 2025. 

Ibyo ngo bizaterwa n’impamvu zitandukanye zikurura ibyo byago, zirimo gukabya mu mirire, kudakora imyitozo ngororamubiri, kunywa itabi, inzoga n’ibindi biyobyabwenge ndetse hakiyongeraho n’izindi mpamvu zirimo imyaka n’uruhererekane rw’amateka y’imiryango. 

Minisitiri Dr Ngamije yakomeje agira ati: “Nibura 46% by’abagejeje ku myaka y’ubukure bafite ikibazo cy’umuvuduko ukabije w’amaraso batabizi. Ababarirwa munsi ya kimwe cya kabiri (42%) mu bafite icyo kibazo ni bo basuzumwe kandi banahabwa serivisi z’ubuvuzi.”

Ni muri urwo rwego, Ubuyobozi bw’Ikigo cy’Igihugu cy’Ubuzima (RBC) bufatanyije n’Ihuriro ry’Impuguke mu buvuzi bw’imbere mu mubiri (RCP),  bateguye iyo gahunda yo kwizihiza Umunsi Mpuzamahanga wahariwe kurwanya Umuvuduko ukabije w’amaraso. 

Ubusanzwe uyu munsi ngarukamwaka wizihizwa taliki ya 17 Gicurasi ariko mu Rwanda wimuriwe kuri uyu wa 21 kugeza ku ya 22 Nyakanga bitewe n’izindi nama z’uruhererekane zaberaga mu Rwanda. 

Insanganyamatsiko y’uyu mwaka iragira iti: “Genzura Umuvuduko w’Amaraso uko bikwiye, wukurikirane wirinda indwara z’umutima.”

Mu kwizihiza uyu munsi, u Rwanda rugamije kongera ubukangurambaga mu batanga serivisi z’ubuzima, nerekwa uburyo hakenewe byihutirwa kongera serivisi zo gusuzuma no gukurikirana umuvuduko w’amaraso kuri buri wese mu gukumira indwara zifata umutima (CVD).

  • NTAWITONDA JEAN CLAUDE
  • Nyakanga 21, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE