Minisitiri Dr Musafiri yahaye umukoro abahinzi akomoza ku rubyiruko

  • Imvaho Nshya
  • Nyakanga 31, 2023
  • Hashize amezi 10
Image

Minisitiri w’Ubuhinzi n’Ubworozi Dr Musafiri Ildephonse yasabye abahinzi guhinga kinyamwuga. Asobanura ko ubuhinzi n’ubworozi atari ibintu bya ba nyakujya ahubwo ko ari ibintu bikoranwa ikoranabuhanga, kandi bikinjiza amafaranga.

Yabigarutseho mu mpera z’icyumweru gishize ubwo hasozwaga ku mugaragaro imurikabikorwa ry’ubuhinzi n’ubworozi ku nshuro ya 16 aho ryaberaga ku Mulindi mu Karere ka Gasabo.

Ryitabiriwe n’inzego zitandukanye zirimo ubuyobozi bw’Umujyi wa Kigali, abafatanyabikorwa ba MINAGRI, inzego z’umutekano ndetse n’abahinzi n’aborozi bamurikaga ibyo bakora.

Minisitiri Dr Musafiri yifuza ko abakire ba mbere mu Rwanda, mu myaka itaha bazajya bava mu buhinzi kandi birashoboka.

Ati “Icyo mbasaba ni uguhindura imyumvire, mumenye gukurikirana imirima, ibyo mwahinze, mushyiremo ifumbire ihagije, mushore nimumara gushora ntimugende ahubwo muhagume”.

Yahaye abahinzi umukoro ababwira ko icyo wagenzuye ari cyo usarura.

Abahinzi basabwa gushyira ifumbire ikwiye ku myaka kandi bakabikorera igihe.

MINAGRI itangaza ko imbuto nziza zihari kandi ko hari sosiyete nyinshi zitunganya imbuto nk’ibigori, soya, ibishyimbo, instina, imyumbati n’ibindi.

Abakora ubuhinzi bibutswa kwegera sitasiyo za RAB bakabarangira aho imbuto nziza ziri.

Dr Musafiri yagize ati “Mutere imbuto nziza, muziterere igihe, mukurikirane ibyo mwahinze mu mirima yanyu kugira ngo twihaze mu biribwa, dusagurire amasoko tugere ku bukungu n’iterambere twifuza”.

Yasabye urubyiruko kugirana amasezerano na MINAGRI mu mishanga y’ubuhinzi n’ubworozi.

Bamwe mu rubyiruko rwitabiriye imurikabikorwa ry’ubuhinzi n’ubworozi ryari rimaze iminsi ribera ku Mulindi

Yarusabye kumenya amahirwe ari mu buhinzi n’ubworozi bityo rukareka kwirirwa rwiruka mu muhanda rusaba akazi.

Ati “Ahubwo mushakishe aho imirima iri, ibishanga bidatunganije muhakorere. Hari za nkunganire, hari inguzanyo zihendutse, hari za nkunganire zitangwa na BDF, hari imishinga myinshi ihari itanga amahirwe ku rubyiruko kugira ngo rujye mu buhinzi n’ubworozi kandi mubikore neza.

Ni mwe mwize, ni mwe mufite imbaraga, ni mwe mukora kinyamwuga, ni mwe umuntu yabwira ibipimo by’ifumbire mukabyumva kugira ngo muzamure umusaruro w’ubuhinzi n’ubworozi”.

Yasabye amabanki n’ibigo by’imari biciriritse gukorana n’abahinzi n’aborozi cyane ko nta kibazo ibi bigo byagira kubera ko abahinzi n’aborozi bishingirwa mu bigo by’ubwishingizi.  

Yanditswe na KAYITARE JEAN PAUL

  • Imvaho Nshya
  • Nyakanga 31, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE