Minisiteri y’Ubuzima yahagaritse ibarura ry’Abavuzi gakondo

Minisiteri y’Ubuzima (MINISANTE) yatangaje ko Ihuriro ry’abavuzi gakondo bakwiye kwirinda kubarura no guha ibyemezo abavuzi gakondo bibumbiye mu ihuriro ryabo (AGA Network Rwanda).

Muri iri huriro hashize iminsi havugwamo ubwumvikane buke bushingiye ku kutemera ubuyobozi bwatowe.

Nyirahabineza Gertulde wahoze ayoboye AGA Network Rwanda yirukanywe kubera amakimbirane yakomotse ku miyoborere mibi no kurigisa umutungo w’ihuriro bituma ahitamo gukora ku giti cye.

Minisiteri y’ubuzima yasohoye ibaruwa ku wa 27 Ugushyingo 2023, isaba Ishyirahamwe ry’abavuzi gakondo guhagarika ibarura ryakorwaga.

Igira iti “Nshingiye kandi ku nyandiko zigaragaza amabarura ari gukorwa y’abavuzi gakondo mu bice bitandukanye by’igihugu rikozwe n’ihuriro ry’abavuzi gakondo ryitwa AGA Rwanda Network, bakifashisha inzego z’ibanze, ngo zibaterere kashe ku rupapuro ruri gukoreshwa muri iryo barura ritatangiwe uruhushya n’urwego rubishinzwe.”

Iyo baruwa ikomeza igira iti “ Mbandikiye mbasaba ibi bikurikira; Guhagarika iri barura aho riri gukorwa mu bice bitandukanye by’igihugu, guhagarika itangwa ry’ibyemezo ku bavuzi gakondo, riri gukorwa n’iri shyirahamwe, gutesha agaciro ibyangombwa byatanzwe n’ihuriro ry’abavuzi gakondo mu Rwanda(AGA Network Rwanda), no gusaba inzego z’ibanze zatanze ibyo byangombwa ko bigarurwa ku Biro byabiteyeho kashe.”

Kugeza ubu Nyirahabineza ntarashobora kugira icyo atangaza ku ibarura rivugwa ko yakoraga nyuma yo koherezwa na MNISANTE.