MINAGRI yashyizeho amabwiriza yo guhinga “Chia Seeds” zibazwaho byinshi

  • NTAWITONDA JEAN CLAUDE
  • Kamena 30, 2022
  • Hashize imyaka 2
Image

Minisiteri y’Ubuhinzi n’Ubworozi (MINAGRI) yashyizeho amabwiriza rusange agenga ubuhinzi bw’igihingwa cya “Chia Seeds”. Ni igihingwa cyakunze kwibazwaho byinshi, kikiza mu Rwanda bamwe bagaragaje  impungenge ko abagishoyemo imari bashobora guhomba.

Gusa kugeza ubu hari abagishoyemo imari bishimira ko ubu barimo gukirigita ifaranga dore ko mu mezi atatu uba utangiye gusarura. Iki gihingwa cyatangiriweho igeragezwa mu cyanya cyuhirwa cya Ngoma giherereye mu Karere ka Ngoma, muri  2020 harebwa niba cyabera ubutaka bwo mu Rwanda hose cyane cyane ahari urusekabuye, bivugwa ko gituruka muri Bolivia no muri Mexique.

MINAGRI ivuga ko kubera ibibazo bimaze igihe bigaragara mu buhinzi n’ubucuruzi bwa “Chia seeds”, yashyizeho amabwiriza kugira ngo ubuhinzi, ubucuruzi bw’iki gihingwa bivugururwe.

Nk’uko ikomeza ibisobanura; “Chia Seeds” ni igihingwa gishya mu Rwanda kinjiye mu mpera z’umwaka wa 2015. Abaguzi b’umusaruro basaba ko gihingwa  hakoreshejwe inyongeramusaruro zumvikanyweho hagati y’umuhinzi n’umuguzi by’umwihariko birinda gukoresha ifumbire mvaruganda n’imiti (pesticides) bitari mu bwoko bwa “organiques”.

Itangazo yatanze   rigira riti: “Ubuhinzi bw’iki gihingwa  buri mu murongo wa Politike y’ubuhinzi n’ubworozi ijyanye no kongera ingano y’ibyoherezwa mu mahanga kugira ngo hongerwe amadevize yinjira mu Gihugu, ndetse bufashe mu gusigasira ubukungu bw’Igihugu.

Inzego z’ibanze mu Rwanda by’umwihariko abashinzwe ubuhinzi ku rwego rw’Akarere n’Imirenge bagira uruhare mu bikorwa by’ubuhinzi muri rusange ni na bo bagomba gukurikirana no gutanga amakuru akenewe kugira ngo umusaruro wa “Chia Seeds” uhabwe ibyemezo by’ubuziranenge byemeza ko umurima ugiye guhingwamo utakoreshejwemo amafumbire mvaruganda n’imiti mu gihe cyatambutse ndetse ko umusaruro na wo wabonetse hadakoreshejwe ifumbire mvaruganda n’imiti”.

Muri bimwe mu bikubiye mu  mabwiriza yatanzwe na MINAGRI, harimo ko umurima uhingwamo “Chia seeds” ugomba kuba wujuje ibisabwa n’isoko; yaba ibijyanye n’ibyangombwa by’ubuziranenge, ibyo umuguzi yifuza ndetse n’amabwiriza agenga ubucuruzi bw’ibikomoka ku buhinzi yaba imbere mu gihugu ndetse no ku masoko mpuzamahanga. Ugomba kandi  kuba uri ahantu hagerwa n’umuhanda cyangwa muri site izwi kugira ngo byorohere inzego zikora ubugenzuzi.

Umuhinzi kandi asabwa gukoresha imbuto yujuje ubuziranenge.

Ku birebana n’ibigo bigura bikanagurisha umusaruro wa kiriya gihingwa, MINAGRI ivuga ko umuntu ku giti cye cyangwa sosiyete ihinga ikanohereza “Chia Seeds” mu mahanga igomba kuba yujuje ibisabwa birimo   icyangombwa cy’ubucuruzi  gitangwa n’Urwego rushinzwe Iterambere (RDB). Kompanyi igomba kugaragaza urutonde rw’abahinzi bakorana kandi hari amasezerano y’imikoranire anoze agaragaza inshingano za buri ruhande.

Buri Karere gafite abahinzi ba “Chia Seeds” gafasha mu gushyiraho amasezerano asinywa na buri muhinzi wayo agenderwaho mu buhinzi n’ubucuruzi bw’umusaruro w’iki gihingwa. Aya masezerano bayagirana n’ibigo bigura bikanacuruza umusaruro wa “Chia seeds”.

Inzego z’ibanze n’inzego zifite mu nshingano ibirebana n’ubuhinzi zisabwa gushyira mu bikorwa inshingano zigiye zifite mu rwego rwo kugira ngo uruhererekane rukorwa mu buhinzi ndetse n’ubucuruzi bw’iki gihingwa bigende neza.

Amabwiriza yo gutubura imbuto za “Chia Seeds” no kuzigeza ku bahinzi ashyirwaho n’ikigo gifite mu nshingano ubutubuzi, ubugenzuzi n’ubuziranenge bw’imbuto mu Rwanda (RICA).

  • NTAWITONDA JEAN CLAUDE
  • Kamena 30, 2022
  • Hashize imyaka 2
TANGA IGITEKEREZO
Nshimiyimana Anselme says:
Kamena 30, 2022 at 10:16 am

Harya ubundi buriya bikorwamo iki? Hanyuma c nibihingwa ngengabukungu cg ni ngandurarugo? Murakoze

Munyaneza says:
Kamena 30, 2022 at 7:43 pm

Welcome Rwandan twishimiye uruhare rukomeye nubuyobozi bwacu bukomeye budushishikariza kwitabira gahunda ziterambere ryigihugu ndetse nizumuturage ku giti cye binyuze muri gahunda zigihigwa gifite agaciro kiri ku isoko mpuzamahanga!

Andika igitekerezo

AMATEGEKO AGENGA IYANDIKA RY'IGITEKEREZO CYAWE