Loni yishimiye ko Felicien Kabuga yatangiye kuburanishwa mu mizi

  • NTAWITONDA JEAN CLAUDE
  • Nzeri 29, 2022
  • Hashize imyaka 2
Image

Umwe mu bayobozi bakomeye mu Muryango w’Abibumbye yagaragaje uburyo Umuryango w’Abibumbye wishimiye kuba Felicien Kabuga yatangiye kuburanishwa mu mizi ku byaha bya Jenoside n’ibyibasiye inyokomuntu akurikiranyweho nk’umunyemari wateye inkunga ikomeye ubwicanyi bwahitanye abasaga miliyoni mu minsi 100 ya Jenoside yakorewe Abatutsi mu 1994.

Uwo muyobozi ni Alice Wairimu Nderitu, Umujyanama mukuru wihariye w’Umuryango w’Abibumbye kuri Jenoside, wanagaragaje akamaro ko kwita cyane ku mvugo z’urwango n’izihembera amacakubiri  cyangwa ingengabitekerezo ya Jenoside mu gihe uru rubanza rurimo kuburanishwa.

Madamu Nderitu yabigarutseho mu gihe Kabuga yitabye Urukiko rw’ Uwego Mpuzamahanga Rwashyiriweho gukora Imirimo y’Insigarira y’Inkiko (IRMCT) i La Haye mu Buholandi kuri uyu wa Kane ndetse n’ejo ku wa Gatanu.

Impapuro zisaba gufata Kabuga zigaragaza ko ari we washinze RTLM yagize uruhare rukomeye cyane mu gushishikariza abaturage guhiga bagenzi babo b’Abatutsi bahorwaga gusa uko baremwe.

Akurikiranyweho ibyaha bya Jenoside, gukangurira no gushishikariza rubanda gukora Jenoside, uruhare mu gutegura no gutera inkunga umugambi wa Jenoside, ubwicanyi bukozwe mu ntungu za Politiki, itsembatsemba n’ubwicanyi nk’ibyaha byibasiye inyoko muntu.

Mu butumwa Nderitu yatanze mu masaha make mbere y’uko uyu munsi ugera, yagize ati: “Guhuza imbaraga mu kwirinda kwibagirwa bigize ukwiyemeza gukumira. Kubaza inshingano abo bireba ni ugukumira ubwabyo kandi bigira uruhare mu kudindiza ibyaha bishobora gukorwa mu gihe cy’ahazaza.”

Yahamije ko urubanza rugiye gucibwa ruzagira uruhare mu guha ubutabera abo Jenoside yakorewe Abatutsi yagizeho ingaruka n’abahitanywe na yo no guha amategeko agaciro akwiriye mu ruhando mpuzamahanga.

Yahamije ko uru rubanza runafite uruhare rukomeye mu gutanga isomo ndetse no kwirinda ihohoterwa rishobora kuvuka mu bihe biri imbere, byaba iby’ubwicanyi n’ibindi byibasiye inyoko muntu.

Aha ni ho yahereye ashima umurimo wakozwe na IRMCT mu gukurikirana no guta muri yombi Felicien Kabuga wari umaze imyaka isaga 26 yihishe ubutabera, aho bamwe bari baratangiye no guhimba inkuru z’uko ashobora kuba akoresha imbaraga z’ubupfumu.

Madamu Nderitu yakomeje ashimangira ko amagambo y’urwango akwiye kwamaganwa, anagaragaza ko ibikorwa byo gukumira no kurwanya Jenoside bisaba ubufatanye bw’abafatanyabikorwa banyuranye, ndetse n’ingamba zihamye zo kurwanya amagambo ahembera urwango, ivangura iryo ari ryo ryose n’urugomo.

Nderitu yasabye ibihugu gukomeza urugendo byiyemeje rwo gukorana na IRMCT mu gushakisha, guta muri yombi, gufunga, kohereza abakekwa mu bihugu byabo ndetse no guha ubutabera buhamye umubare munini w’abagishakishwa bagize uruhare muri Jenoside yakorewe Abatutsi.

Umushinjacyaha Mukuru wa IRMCT Serge Brammertz, yavuze ko ibiro bye bizaharanira guha ubutabera Abanyarwanda bamaze imyaka 28 barabubuze kubera Kabuga wari waraciye mu rihumye ubutabera mu gihe gisaga imyaka 26.

Yagize ati: “Uyu munsi, abagizweho ingaruka n’ibyaha Kabuga akueikiranyweho, n’abaturage bose b’u Rwanda, bakwiye guhora imbere mu bitekerezo byacu. Bategerejeubutabera imyaka 28, bityo Ibiro byanjye byiyemeje kuryoza kabuga ibyo yakoze ku bwabo… Aya ni amahirwe yo kongera kwibutsa Isi ibyago bikomeye biterwa n’ingengabitekerezo ya Jenoside ndetse n’amagambo ahembera urwango.”

  • NTAWITONDA JEAN CLAUDE
  • Nzeri 29, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE