Kwibohora 28: Abaturage ba Kicukiro basabwe kutumva kwibohora nk’imvugo

  • NTAWITONDA JEAN CLAUDE
  • Nyakanga 5, 2022
  • Hashize imyaka 2
Image

Mu gihe hirya no hino mu gihugu Abanyarwanda bishimiye imyaka 28 ishize u Rwanda rubohowe ubutegetsi bubi, abatuye Akarere ka Kicukiro mu Murenge wa Masaka, basabwe kurebera kwibohora mu bikorwa bibegereye aho kubifata nk’imvugo gusa.

Byagarutsweho n’Umuyobozi Nshingwabikorwa wungirije wa Kicukiro Rukebanuka Adalbert, ubwo hatahagwa ku mugaragaro isoko ry’icyitegererezo ryatwaye miliyari enye nk’igikorwa k’indashyikirwa.

Mu butumwa Rukebanuka yagejeje ku bitabiriye ibirori byo kwizihiza umunsi wo kwibohora, yagize ati “Kwibohora ntitubyumve nk’imvugo ahubwo tubirebere mu bikorwa bitwegereye”.

Ahamya ko ahubatswe isoko rya kijyambere mu murenge wa Masaka hahoze ari ahantu hengerwa inzoga z’inkorano.

Ati: “Ahari inzoga z’inkorano, hari inzu y’icyitegererezo. Kwibohora mwibirebera kure nimubirebere hano”.

Avuga ko bishimishije kubona urubyiruko rukora rukiteza imbere ko ibyo bigaragaza neza kwibohora nyako.

Asobanura ko Leta ya Habyarimana yagiraga ingengo y’imari itageze kuri miliyari enye ku mwaka.

Ni mu gihe ngo rwiyemezamirimo wubatse isoko ry’icyitegererezo rya Masaka, we ryamutwaye miliyari enye.

Mu kiganiro cyatanzwe na Kalinamaryo Theogene, impuguke mu mateka, yavuze ko ishyaka ryitwaga RANU ryasimbuwe n’Umuryango RPF Inkotanyi rigashyira imbere gucyura impunzi, kubanisha Abanyarwanda n’izindi ntego yihaye.

Yavuze ko hari abatutsi bahunze mu 1920 no mu myaka yakurikiyeho. Asobanura ko bitavuzwe mu itangazamakuru cyangwa ngo bajye ahantu hamwe hazwi.

Abacuruzi bahoze bakorera hanze batangiye gukorera mu isoko ry’ikitegererezo rya Masaka

Akomeza agira ati: “Mu 1959 hagiye itsinda rinini ry’impunzi z’Abatutsi Umuryango w’Abibumbye (ONU) urazimenya kuko ziswe impunzi za Politiki. Icyo gihe byaravuzwe cyane mu itangazamakuru mpuzamahanga”.

Taliki 06 Kamena 1992, Kalinamaryo avuga ko Inkotanyi zafashe umujyi wa Ruhengeri bigatuma kwa Habyarimana batangira gusaba imishyikirano.

Aho ngo ni ho Inkotanyi zahereye zisaba ko habaho imishyikirano itaziguye bakaganira imbonankubone. Ati: “Nubwo ibiganiro byabaga, bacaga ruhinga nyuma bakajya kugerageza Jenoside.

Kwibohora byahinduye isura kuva mu 1995, tubanisha abakoze jenoside n’abayikorewe, tubanisha abahunze mu 1959 n’indi myaka, turibohora dushakisha ibisubizo bya bya bibazo”.

Yavuze ko isoko ryatashywe rifite amateka atangaje kandi ko atari azi ko hari igihe kizagera i Masaka hagashyirwa ibikorwaremezo nk’ibihari ubu.

Yahamije ko hari imihanda ya kaburimbo, isoko, ibitaro, amashuri, amazi n’ibindi.

Nyirangendahimana Odette ukorera mu isoko rishya ry’icyitegererezo i Masaka yashimye imiyoborere myiza Abanyarwanda bafite, akishimira ko umunsi wo kwibohora wageze atagikorera mu isoko ry’ibitaka.

Habumuremyi Theogene, umunyemari wubatse isoko ry’icyitegererezo rya Masaka, avuga ko abacuruzi bahoze bakorera mu isoko rya kera, ko ari bo bahawe amahirwe yo kubona imyanya yo gukoreramo bwa mbere.

Avuga ko nk’umunyamuryango wa RPF Inkotanyi yitaye ku ntego ya kane ya RPF yo kuzamura ubukungu bw’igihugu.

Ati: “Ntabwo yabigeraho ibi bikorwa bitabayeho ni yo mpamvu turimo kubikora no kuzamura imibereho myiza y’abaturage, bagacuruza, bagahahirana, bagafata ku ifaranga bagakemura n’ibindi bibazo.

Ni muri urwo rwego dufasha Leta kuko turi abanyamuryango kugira ngo ibikorwa bya RPF ibyo igomba guha abaturage natwe turimo, dufatanye tubihe abaturage bose ndetse tugere ku ntego ya Perezida Paul Kagame kugira ngo tugere ku Rwanda twifuza”.

Uretse isoko ry’icyitegererezo ryatashwe mu murenge wa Masaka, hari ibikorwaremezo ndetse n’inzu zubakiwe abatishoboye mu yindi mirenge igize Akarere ka Kicukiro byatashywe mu rwego rwo kwishimira umunsi wo kwibohora.

Intumwa za rubanda zituye mu murenge wa Masaka zifatanije n’abaturage mu munsi wo Kwibohora
Imbere y’isoko niho hazajya hakatira imodoka zitwara abagenzi
Kalinamaryo Theogene yahishuye ko Abatutsi batangiye guhunga mu 1920 agaragaza ko RPF Inkotanyi yafashe iya mbere mu kubohora Abanyarwanda
Umunyemari n’umufasha we bashimiwe uruhare rwabo mu iterambere ry’umuturage
Umunyemari wubatse isoko rya Masaka yagaragaje ko hari ibindi bizakorwa hagamijwe kugera ku ntego ya Perezida Paul Kagame yasezeranije Abanyarwanda
  • NTAWITONDA JEAN CLAUDE
  • Nyakanga 5, 2022
  • Hashize imyaka 2
TANGA IGITEKEREZO
Bucyana Bernard says:
Nyakanga 7, 2022 at 6:37 pm

Tien d’autre que vous remercier..

Andika igitekerezo

AMATEGEKO AGENGA IYANDIKA RY'IGITEKEREZO CYAWE