Kuva mu 2017 RP yashyize ku isoko ry’umurimo abarenga 12,000

  • NTAWITONDA JEAN CLAUDE
  • Gicurasi 31, 2023
  • Hashize amezi 11
Image

Guverinoma y’u Rwanda yishimira ko nyuma y’imyaka ikabakaba itanu ishyizeho Ishuri Rikuru ry’u Rwanda ry’Ubumenyi ngiro (Rwanda Polytechnic), isoko ry’umurimo ryungutse abakozi b’abahanga mu bijyanye na Tekiniki, Imyuga n’Ubumenyi ngiro (TVET) barenga 12,000. 

Byagarutsweho ku wa Gatatu taliki ya 31 Gicurasi, mu birori byo guha abanyeshuri  2,885 basoje amasomo muri Koleji za RP (IPRCs) uko ari umunani abumbiye muri Rwanda Polytechnic. 

Rwanda Polytechnic (RP) yashinzwe mu mwaka wa 2017 kugira ngo ihuze ibikorwa by’iterambere ry’uburezi bw’amashuri makuru ya Tekiniki, Imyuga n’Ubumenyi ngiro (TVET) ku basoje kuyiga mu yisumbuye. 

Minisitiri w’Uburezi, Dr. Uwamariya Valentine, yavuze ko imikorere ya RP ijyanye n’icyerekezo cy’Igihugu cyo kwimakaza ubumenyi bushingiye ku bushobozi nubwo imibare y’abo yigisha ikiri hasi ugereranyije na 60% y’abiga imyuga n’ubumenyi ngiro iteganywa muri Gahunda ya Guverinoma y’imyaka 7 yo Kwihutsha Iterambere (NST1). 

Dr. Uwamariya yagize ati: “Ibirori by’uyu munsi bisobanuye byinshi ariko ku kijyanye no guteza imbere umurimo, ari ukuyihangira cyangwa se ujya gukorera abandi, twavuga ko  ubumenyi bajyanye ari bwiza kandi bukenewe ku isoko ry’umurimo, kuko buriya gahunda za Rwanda Polytechnic zijyanye n’icyerekezo cy’Igihugu.”

Guverinoma y’u Rwanda yishimira ko abiga mu mashuri ya Tekiniki, Imyuga n’Ubumenyi Ngiro babijyanisha no gushyira mu ngiro ibyo biga, ndetse bakagera no ku isoko ry’umurimo baragize n’amahirwe y’imenyerezamurimo bakorera hanze y’ishuri. 

Dr. Uwamariya yakomeje agira ati: “Twe rero turabyishimiye cyane, twakwifuza ko ahubwo baba benshi bakarenga 2800 basoje amasomo uyu munsi. No muri Politiki z’Igihugu, intego ni uko abenshi bajya mu mashuri ya Tekiniki, Imyuga n’Ubumenyi ngiro. 

Impamvu ni uko ari bo bafasha mu guteza imbere Igihugu, harimo abahita bashinga imirimo iciriritse, ariko noneho baba bashobora no gukora mu nganda.”

Minisitiri w’Uburezi Dr. Uwamariya Valentine ageza ijambo ku basaga 8000 bitabiriye ibirori byo gutanga impamyabushobozi

Yongeraho ko impamvu nyamukuru ituma u Rwanda rwifuza umubare munini w’abarangije amashuri ya TVET kurusha abiga ubumenyi rusange, ari uko baza atari abo mu biro gusa ahubwo bashoboye gukora imihanda, ibikorwa by’ubwubatsi, ikoranabuhanga, ibijyanye n’inganda n’ibindi byinshi bifasha Igihugu kwihuta mu iterambere. 

“[…] Bitabujije ko na ba bandi bize ubumenyi rusange baba bakenewe ariko baba bake ugereranyije n’abize tekiniki. Ni yo mpamvu tuvuga ngo baracyari bake, iyaba twagiraga nka 60% barangiza muri Tekiniki ugereranyije n’abarangiza muri za Kaminuza zisanzwe, nk’uko biteganyijwe muri NST1).”

Ibirimo gukorwa mu kongera umubare w’abiga mu mashuri ya TVET

Minisitiri Dr. Uwamariya yavuze ko hari gahunda zitandukanye zo kurishaho guteza imbere amashuri ya Tekiniki, Imyuga n’Ubumenyi Ngiro guhera mu mashuri yisumbuye ukageza muri Kaminuza. 

Yatanze urugero rw’uko muri uku kwezi, muri Koleji ya Tumba (IPRC Tumba) Guverinoma y’u Rwanda ifatanyije n’iy’u Bufaransa batangije Porogaramu nshya ya  Mechatronics, Ishuri ryigisha ikoranabuhanga rigezweho mu bukanishi n’ibya elegitoronike. 

Ubwo ni uburyo bumwe bwo kurushaho kwinjiza muri Porogaramu z’Igihugu gahunda nshya z’uburezi zifasha kwagura no kongera ubumenyi bwa TVET bujyanye n’igihe. 

Nyuma y’uriya mushinga hari n’undi Guverinoma y’u Rwanda iteganya gukorana n’u Bufaransa muri IPRC Karongi, IPRC Kitabi, no muri IPRC Ngoma mu rwego rwo kongera amashuri, ibikoresho n’ubushobozi bw’abarimu bigisha muri ayo mashuri. 

Ati: “Gahunda ihari rero ni ukongera ibikorwa remezo kuko uyu munsi za IPRC zahereye kuri ETO za kera zikeneye kwagurwa, ariko noneho no mu kwigisha bigezweho hakenewe kugura ibikoresho bijyanye n’Igihe.”

Yavuze ko mu gihe kwigisha tekiniki bisaba amafaranga menshi, Guverinoma ishyiraho akayo ariko ikanakorana n’abafatanyabikorwa batandukanye mu kurushaho kwagura za IPRC ndetse n’amashuri ya TVET ku rwego rwisumbuye bahora bateganyirizwa uko bakomeza amasomo yabo ku rwego rwa kaminuza. 

Hagati aho RP yatangije gahunda yo gutanga impamyabushobozi y’icyiciro cya kabiri cya kaminuza (Bachelors) ikomeje kwagurwa kugira ngo abarangiza mu cyiciro cya mbere bifuza gukomeza babone uko barushaho kongera ubumenyi. 

Abasoje amasomo muri IPRC Gishari, IPRC Huye, IPRC Kigali, IPRC Musanze, IPRC KarongI, IPRC Tumba, IPRC Ngoma na IPRC Kitabi, bishimira konbasoje amasomo bafite ubumenyi n’ubushobozi bihagije kugira ngo babashe kugaragaza impinduka zikenewe ku isoko ry’umurimo mu Rwanda. 

Hahembwe abanyeshuri biteaye neza muri iki cyiciro cyize mu bihe bigoye bya COVID-19
  • NTAWITONDA JEAN CLAUDE
  • Gicurasi 31, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE