Kubura amafaranga byadindije inyubako igezweho muri Gare ya Ruhango

  • AKIMANA JEAN DE DIEU
  • Ukuboza 31, 2023
  • Hashize amezi 2
Image

Imyaka ibiri irabura amezi ane ngo irangire uhereye igihe  hashyizwe ibuye ry’ifatizo ku umushinga wo kubaka inyubako igezweho muri Gare ya Ruhango, bikaba byari biteganyijwe ko yagombaga gutahwa mu mezi ya mbere y’umwaka wa 2024 ariko ikaba yaradindiye.

Iyo nyubako iri mu zigeretse kandi zubatswe mu buryo bwa kijyambere zizaba ziri mu Karere ka Ruhango, iteganyirizwa kunganira indi isanzwe itangirwamo serivisi nke cyane ugereranyije n’izikeneye gutangirwa muri Gare.

Mu kiganiro yagiranye na  Imvaho Nshya, Perezida w’Urugaga rw’Abikorere mu Karere ka Ruhango Twagiramutara Kalfan,  yavuze  ko iyi nyubako yadindijwe no kubura amafaranga nubwo ku ikubitiro hari abaguze  imigabane.

Yavuze ko nyuma yo kugura imigabane amafaranga akababana make byatumye inyubako idindiraho, akemeza ko bahisemo gushyira imigabane ku isoko kugira ngo haboneke amafaranga yo gukomeza imirimo.

Yagize ati: “Ni byo ibi bikorwa byaradindiye kuko twifuzaga ko nibura mu mezi abanza y’Umwaka wa 2024 tuzaba twarayitashye ariko ubuke bw’amafaranga yaguzwe imigabane bwatumye ibikorwa byacu bikerererwa. Gusa natwe twahisemo gushaka abandi twafatanya bagashora imari kugira ngo ibikorwa byongere bikorwe.”

Akomeza avuga ko kugeza ubu Kompanyi y’Abashoramari bishyize hamwe ba Ruhango (Ruhango Investment Company/RIC) ari yo icunga imigabane 35% y’Akarere ka Ruhango bafatanyije  uyu mushinga, naho “Ruhango Vision Company (RVC)” ikagira 65%.

Yongeraho ko Ruhango Vision Company yafashe imigabane 45% iyishyira ku isoko, ari na yo bashaka kugurisha abandi bashoramari hakaboneka nibura miliyoni zisaga 200 z’amafaranga y’u Rwanda zatuma hari aho bagera.

Anavuga kandi ko nyuma yo kugurisha imigabane bashobora no kuzafata inguzanyo muri banki kugira ngo intego bihaye bazabe bayigezeho.

Bamwe mu banyamigabane bavuga ko biteguye kugura imigabane mishya kugira ngo uruhare rwabo rurusheho kugaragara muri uyu mushinga witezweho guhindura isura y’Umujyi wa Ruhango.

Umwe muri bo uvuga ko yhari yaraguze imigane itatu yemeza ko agiye kugura indi ibiri ikaba itanu, ati: “Nari nsanzwe mfite imigabane itatu ariko ngiye kongeraho indi migabane ibiri kugira ngo uruhare rwanjye rugaragare, iki gikorwa cyacu kizaduhe inyungu nziza mu gihe kizaza.”

Undi munyamigabane we avuga ko ubuyobozi bwa Kompanyi icunga imirimo yo kubaka ikwiye gushakisha amaboko ku bantu bakomoka mu Ruhango cyangwa mu tundi Turere bagafatanya.

Yagize ati: “Twebwe nk’abanyamigabane turasaba, ko nubwo bashyizwe iyi migabane ku isoko, dukwiye no kureba niba tutakwegera abakomoka iwacu mu Ruhango bafatanya natwe kuko Abanyarwanda babibonye kera bavuga ko inkingi imwe itagera inzu.”

Umuyobozi w’Akarere ka Ruhango Habarurema Valens, avuga ko idindira ry’iyi nyubako yari yaratangiye kubakwa muri Gare ya Ruhango yatewe n’uko bamwe mu bikorera bemeye gushoramo imari  batashoboye gutanga imisanzu basabwaga, bityo hakoreshwa amafaranga make yari ahari .

Yagize ati: “Ni byo natwe turabibona ko iyi nyubako yadindiye, ariko byatewe n’uko hari abikorera bari bemeye gushoramo imari batashoboye gutangira ku gihe imisanzu yabo, bityo hakoreshwa ayari yamaze kuboneka, bategereje andi bituma inyubako ihagarara”.

Akomeza avuga ko imirimo y’iyi nyubako  igeze kuri 20%  by’imirimo yose iteganyijwe gukorwa, akaba yemeza ko imirimo yo kurangiza imishinga igiye gutangizwa mu gihe cya vuba kuko hamaze kuboneka abikorera biteguye kuwushyigikira.

Ku ikubitiro umugabane wari uhagaze miliyoni 13 z’amafaranga y’u Rwanda, ariko iyo babaze ibimaze gukorwa basanga umugabane warazamutse ugeze hafi kuri miliyoni 15 z’amafarannga y’u Rwanda.

Abashyize iyo migabane ku isoko bizeza abazayigura ko izabungukira cyane.

Biteganyijwe ko iyo nzu izaba igeretse niyuzura izashyirwamo aho   guhahira no gufatira amafunguro ndetse n’ubusitani, umushinga wose ukazuzura utwaye nibura miliyari 2 z’amafaranga y’u Rwanda.

Uyu mushinga utangizwa muri Mata 2022 byavugwaga ko igice cyambere cyawo kizarangirana na 2022, naho icya kabiri kikarangirana n’uyu mwaka wa 2023 ku buryo ibikorwa byose byagombaga kurangirana n’ukwezi kwa Kanama 2024.

  • AKIMANA JEAN DE DIEU
  • Ukuboza 31, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE