Kubona imbuto nziza biracyagoye abahinzi b’imboga n’imbuto mu Rwanda

  • Imvaho Nshya
  • Ukwakira 31, 2023
  • Hashize amezi 4
Image

Mu gihe ubuhinzi bw’imboga n’imbuto ari kimwe mu bifatiye runini ubukungu bw’Igihugu, ababukora bavuga bukirimo imbogamizi zituma butagera ku rwego rwifuzwa, zirimo nko kutabona imbuto nziza.

Mu biganiro byo kuri uyu wa 31 Ukwakira byahuje abakora ubuhinzi bw’imboga n’imbuto byabereye mu Mujyi wa Kigali, harebewe hamwe uruhare rw’umugore mu buhinzi bw’imboga n’imbuto, uko bwatezwa imbere ndetse n’imbogamizi zikigaragara.

Urujeni Sandrine, Umuyobozi Ushinzwe Ibikorwa mu Ikigo cy’Igihugu Gishinzwe Guteza Imbere Ibyoherezwa mu Mahanga bikomoka ku Buhinzi n’Ubworozi (NAEB) avuga ko nubwo Leta yashyize imbaraga muri politiki yo gufasha ibikorwa by’ubuhinzi hakigaragara imbogamizi zituma butagera ku ntego yifuzwa ariko  zikwiye gukemurwa.

Ati: “Nkuko twahereye mu ruherekane nyongeragaciro rw’imboga n’imbuto muri rusange, twavuga ko kubona imbuto nziza bikigoye nubwo Leta iri kubikoraho ariko twavuga n’uburyo abatuzanira imbuto bazana imbuto nziza irobanuye kandi izwi.”

Yongeyeho ko nubwo izi mbogamizi zikigaragaramo ariko n’abahinzi b’imboga n’imbuto bakwiye kwishyira hamwe kugira ngo bongere ubunyamwuga kandi banoroherwe no kubona ubufasha bwo guhuzwa n’amasoko.

Kugeza ubu mu Rwanda imboga n’imbuto ziva mu Rwanda zoherezwa mu mahanga zirengeje 50% haba ku masoko nyambukiranyamipaka y’ibihugu by’abaturanyi bigize Akarere k’Iburasirazuba ndetse n’amasoko ya kure nk’i Burayi na Dubai aho usanga hoherezwayo imboga zirimo imiteja, marakuja avoka, urusenda ndetse n’ibindi.

Mu mwaka wa 2021 imboga, imbuto n’indabo byoherejwe byarazamutse, kuko mu hoherejwe ibilo 351.895 byavuyemo amadolari y’Amerika 1.031.579 mu gihe cyabanje hoherejwe ibilo 271.329 byavuyemo amadolari 889.256, ingano y’ibyoherejwe n’inyungu yavuyemo byazamutse ku kigero cya 29.6% na 16%.

Ibihugu byoherejwemo ibikomoka mu Rwanda cyane ni u Bubiligi, u Buholandi, Repubulika ya Demokarasi ya Congo, u Burusiya n’u Bwongereza.

KAMALIZA AGNES

  • Imvaho Nshya
  • Ukwakira 31, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE