Ku myaka 55, R. Kelly yakatiwe gufungwa imyaka 30

  • NTAWITONDA JEAN CLAUDE
  • Kamena 30, 2022
  • Hashize imyaka 2
Image

Umuririmbyi w’Umunyamerika Robert Sylvester Kelly wamamaye ku izina rya R. Kelly mu ruhando mpuzamahanga kubera injyana ya R&B, yakatiwe igihano cyo gufungwa imyaka 30 nyuma yo guhamwa n’icyaha cy’ihohotera rishingiye ku gitsina yakoreye abana b’abakobwa n’abagore.

R. Kell w’imyaka 55 yakatiwe ku wa Gatatu, nyuma y’igihe kinini yari amaze ashinjwa n’umubare munini w’abagore ko yabasambanyije abandi akabacuruza, akaba yarateje imibabaro itagira ingano mu mitima y’abagore n’abakobwa batabarika.

Abunganira R. Kelly mu by’amategeko bahise bavuga ko bajuririye icyo cyemezo cy’urukiko.

Mu mwaka wa 2019 ni bwo R. Kelly yatawe muri yombi ashinjwa ibyaha by’ubwambuzi no gucuruza abana b’abakobwa ngo bakoreshwe imibonano mpzabitsina ku gahato.

Abagore benshi bagiye batanga ubuhamya bw’ukuntu R. Kelly yangije ubuzima bwabo. Umwe muri bo wamenyekanye ku izina rya Angela yise uyu muhanzi indyarya yakomeje kwaguka mu bugome uko yahuraga n’inzirakarengane ikurikiyeho.

Abandi batangabuhamya benshi batavuzwe amazina bamushinja ko yabangirije imitima. Umwe muri bo yagize ati: “Mu by’ukuri nifuje gupfa kubera uburyo watumye niyumva.”

R. Kelly witabye urukiko yambaye imyenda y’imfungwa ya kaki n’amadarubindi yijimye, yanze kugira icyo atangaza ku giti cye kandi nta marangamutima yagaragaje ubwo yari amaze gukatirwa icyo gifungo.

Umucamanza Ann Donnelly yavuze ko uyu muhanzi yakoresheje imibonano mpuzabitsina nk’intwaro, ahatira abagore n’abakobwa gukora ibintu biteye ubwoba bamwe bikarangira bandujwe indwara zandurira mu mibonano mpuzabitsina.

Uwo mucamanza yabwiye R. Kelly ati: “Wabigishije ko urukundo ari ubucakara n’ihohotera.”

Umwe mu batangabuhamya bahohotewe na R. Kelly atanga ubuhamya imbere y’urukiko

Urukiko rwumvise uburyo R. Kelly-wamenyekanye ku ndirimo zamamaye nka I Believe I Can Fly, Victory na Ignition- yakoresheje ubwamamare bwe mu gushora abagore n’abana bato mu busambanyi no gufatwa ku ngufu mu gihe gisaga imyaka 20.

Abacamanza muri uru rubanza rwamaze ibyumweru bitandatu muri Brooklyn, bumvise ubuhamya butandukanye bw’ukuntu uyu muhanzi yacuruzaga abagore hagati ya Leta zitandukanye za Leta Zunze Ubumwe z’Amerika.

Bivugwa ko ibyo byose yabigeragaho afashijwe n’abayoboraga ibikorwa bye by’ubuhanzi, abashinzwe umutekano ndetse n’abandi batandukanye babaga baburi hafi.

Urukiko nanone rwumvise uburyo R. Kell yabonye impapuro mpimbano zimuhesha ububasha bwo kurongora umuhanzikazi Aaliyah wari ufite imyaka 15 y’amavuko gusa mu mwaka wa 1994. Nyuma y’imyaka irindwi ibyo bibaye, uwo muhanzi yaguye mu mpanuka y’indege.

Icyemezo cy’amavuko Kelly yabonye icyo gihe cyagaragazaga ko yari afite imyaka 18. Uwo mubano waje guteshwa agaciro nyuma y’amezi make.

Jovante Cunningham, wafashaga Kelly kuririmba, yavuze ko atigeze yizera ko igihe kizagera uyu muhanzi akaryozwa ibyo yabakoreraga.

Yagize ati: “Nta munsi n’umwe nk’uyu nari narigeze nizera ko inzego z’ubutabera zishobora kurenganura abakobwa b’abirabura. Mpagaze hano mfite ishema ry’inzego z’ubutabera, ntewe ishema nanone na bagenzi banjye bahohotewe kandi nishimiye icyemezo cy’urukiko.”

Abashinjacyaha nib o basabiye R. Kelly imyaka iri hejuru ya 25 y’igifungo bitewe n’uburemere bw’ibyaha bimuhama, akaba ari no kurinda umuryango mugari ko hari ibindi byaha yakongera kwijandikamo aramutse arekuwe vuba.

Abunganizi be mu by’amategeko bo bagaragaje ko akwiye gufungwa igihe cy’imyaka itarengeje 10 cyane ko ibyaha yakoze bishobora kuba bifitanye isano n’imikurire ye kuko yarerewe mu muryango w’abakene wahoragamo amakimbirane n’ihohotera rishingiye ku gitsina.

Bakimara kumva igihano ahawe bavuze ko bashenguwe n’uko ubutabera butumvise ingingo yabo bakaba batangaje ko bahita bajuririra cyo cyemezo.

Lizzette Martinez wamenyanye na R. Kelly ubwo yai akiri umukobwa w’imyaka 17 yavuze ko uko amuzi yabonaga ari umuntu ushobora guhinduka iyo aza kubigiramo uruhare. Ati: “Yari afite ubushobozi bwose; twe ntituba dufite ubushobozi nk’ubwo yari afite. Yashoboraga kubona ubufasha, ariko yakomeje gukwepa ubutabera kubera imbaraga z’ubwamamare bwe.”

Lizzette yakomeje agira ati: “Mpamya ko yakoreraga amafaranga atabarika mu gucuruza abakobwa mu bantu bakomeye cyane ari na bo bamukingiraga ikibaba.”

R. Kelly ari muri gereza guhera mu kwezi kwa Nyakanga 2019, nyuma yo gushyirirwaho impapuro zimuta muri yombi n’abashinjacyaha b’I New York n’i Chicago.

Imyaka 3 amaze muri Gereza yayikozemo udushya twamenyekanye cyane, turimo kuba yarakubise imfungwa mugenzi we mu 2020 no kuba yaranduye COVI-19 muri uyu mwaka. Biteganyijwe ko muri Kanama uyu mwaka azongera kwitaba urukiko rw’i Chicago ku birego by’amashusho agaragaramo asambanya abana ndetse no kubangamira inzego z’iperereza.

Nyuma yaho na bwo azahava ajya mu nkiko za Illinois na Minnesota, aho azaba akomeje kuburanishwa ku byaha by’ihohotera rishingiye  ku gitsina.

  • NTAWITONDA JEAN CLAUDE
  • Kamena 30, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE