Koperative Umwalimu SACCO yungutse asaga miliyari 15.3 Frw

  • KAMALIZA AGNES
  • Ukuboza 29, 2023
  • Hashize amezi 2
Image

Koperative Umwalimu SACCO ivuga ko yagize urwunguko rurenze urwo yari yiteze  muri uyu mwaka wa 2023, kuko yageze ku nyungu ya miliyari 15.3 z’amafaranga y’u Rwanda mu gihe yateganyaga kunguka miliyari 13.9 z’amafaranga y’u Rwanda.

Byagarutsweho mu Nama Rusange y’abanyamuryango ba Koperative Umwalimu SACCO yateranye kuri uyu wa 29 Ukuboza 2023, mu Karere ka Gasabo mu Mujyi wa Kigali.

Iyi nama yagaragarijwemo uko umwaka urangiye iyi Koperative ihagaze, ishyirwa mu bikorwa rya gahunda ziba zarizweho mu nama zabanje, uko ikigo gihagaze mu buryo bw’umutungo ndetse n’uko ingengo y’imari iba yarashyizwe mu bikorwa.

Ni inama yigaga kandi ku bikorwa bizakorwa umwaka utaha ndetse n’ingengo y’imari bizatwara.

Umuyobozi Mukuru wa Koperative Umwalimu SACCO Uwambaje Laurence, yemeje ko muri uyu mwaka bagize urwunguko rurenze urwo bateganyaga kubona.

Ati: “Umwaka ushize twari twarateganyije kuzunguka milliyari 13.9 Frw ariko kugeza mu kwezi k’Ukwakira tumaze kunguka milliyari 15.3 Frw, bivuze ko urwunguko twateganyaga rwiyongereye ndetse umwaka ushobora kurangira ageze kuri milliyari 17 Frw. Rero hari ibyatumye rwiyongera bishobora kuba bitari byarateganyijwe”.

Yongeyeho ko abasababye inguzanyo babaye benshi ugereranyije n’abo bari biteze, akaba ari yo mpamvu bungutse kuko bateganyaga gutanga inguzanyo ya milliyari 150 z’amafaranga y’u Rwanda, bikarangira batanze milliyari 175.

Umuyobozi Mukuru wa Koperative Umwalimu SACCO Uwambaje Laurence yishimiye inyungu babonye muri uyu mwaka

Ati: “Ubwiyongere bw’inguzanyo zitangwa butuma hiyongera ahaturuka inyungu, kubera ko uko bafashe inguzanyo ni ko bishyura inyungu kuri za nguzanyo; ibi byatumye na rwa rwunguko twateganyaga ruva kuri miliyari 13 rugera kuri 15.”

Bamwe mu bitabiriye iyi nama bavuga ko binyuze mu nguzanyo bahawe n’Umwalimu SACCO ubuzima bwahindutse bakiteza imbere.

Umwarimu witwa Muhizi Etienne uturuka mu Karere ka Nyamagabe, akaba ahagarariye abanyamuryango ba Koperarive Umwalimu SACCO mu Murenge wa Buruhukiro, yagize ati: “Iyo turebye mu banyamuryango duhagarariye tubona ko amafaranga y’Umwalimu SACCO agirira akamaro abanyamuryango haba mu nguzanyo duhabwa ndetse n’ubuzima bwa mwaiimu bwateye imbere kubera gukoresha izi nguzanyo.”

Yongeyeho ko usanga bamwe barakoze indi mishinga nk’ubworozi, ubwubatsi n’ibindi bibahindurira ubuzima, bikajyana n’uko bagenda bishyura umwenda gake gake.

Muneza Vedaste, Umwarimu mu Karere ka Nyamagabe, na we ati: “Kugeza uyu munsi hari abo usanga batewe ishema no kuba abarimu kuko inguzanyo zoroshye kuzibona kandi twishimira ko inyungu iri ku rwego rwo hasi. Urumva ko dukoresha amafaranga twahawe mu bikorwa bidufitiye akamaro haba ari ukwishyura amashuri y’abana kandi nyuma y’igihe gito tugasubirayo tugafata andi.”

Iyi Koperative ivuga ko bashingiye ku mibare bafite bateganya gutanga inguzanyo igera kuri miliyari 188 z’amafaranga y’u Rwanda umwaka utaha bakunguka miliyari 17, kuko bateganya kuzinjiza miliyari 28 z’amafaranga y’u Rwanda.

Muri uyu mwaka wa 2023, Koperative Umwalimu SACCO yishimira ko yageze ku ntego y’ibikorwa bifuzaga kugeraho ku kigero cya 82%.

  • KAMALIZA AGNES
  • Ukuboza 29, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE