Kigali: Umuturage yahakanye ko aba mu giti (Video)

  • NTAWITONDA JEAN CLAUDE
  • Nzeri 4, 2022
  • Hashize imyaka 2
Image

Muri iyi minsi ku mbuga nkoranyambaga nka Twita na Youtube havuzwe inkuru ya Kagarura Jean Damascène wavuzweho kuba atuye mu giti.

Ni inkuru yavugishije benshi, bamwe bashidikanya kuri iyi nkuru.

Mu buzima umuntu ntiyabaho atarya, atagira aho atekera cyangwa ngo abeho atagira ubwiherero; yaba ari ukoga cyangwa kwiherera bisanzwe muzi.

Imvaho Nshya yasuye Kagarura w’imyaka 40 utuye mu kagari ka Nyabugogo mu murenge wa Kigali mu karere ka Nyarugenge tumusanga atetse ahishije adutembereza aho akorera ubworozi bw’inzuki.

Kagarura yubatse igisa n’inzu mu biti hejuru, asobanura ko aho yubatse ari ho atereka imizinga ya kizungu ndetse akanayisakarira igihe imvura iguye.

Atunzwe n’umwuga w’ubuvumvu akorera mu Mujyi wa Kigali kandi akiyishyurira inzu abamo.

Asobanura ko ubwo yari mu bikorwa bye by’ubworozi bw’inzuki, haje umuntu akamubwira ati bite musaza.

Ati “Nagize ngo wenda ni umuntu unzi, nabonye ari umunyamakuru.

Yatangajwe nuko nurira igiti arangije arambaza ngo noneho uraramo, ndamubwira nti sindararamo”.

Avuga ko yari yashyizeho agakinga kazajya gatuma umuntu wese ukabonye ahita atekereza ko hari umuntu.

Kagarura avuga ko atunzwe n’ubworozi bw’inzuki mu mujyi wa Kigali kandi ko bumufashishe kuko afite ubushobozi bwo kwiyishyurira inzu abamo.

Yagize ati “Iyi mitiba ya Kizungu ntabwo ipfa kujya mu mashami abonetse yose, buriya nshobora kuzana n’undi kugira ngo hatubuke nkatereka hejuru yawo.

Ririya hema ni agateganyo kuko rishobora guhita rihatwikira mu bihe by’imvura. Aka ni akadara k’inzuki gatuma inzuki z’igira umutekano, si inzu mbamo barambeshyera”.

Avuga ko yababajwe no kumva inkuru zivuga ko aba mu giti bigatuma abantu batangira kumwita umuntu ufite ubumuga bwo mu mutwe. Ahamya ko ataba mu giti.

Ibi byemezwa n’abaturanyi be batuye mu kagari ka Nyabugogo mu murenge wa Kigali.

Uzamukunda Jacquéline umuturanyi wa Kagarura yabwiye Imvaho Nshya ko Kagarura ari umuturanyi wabo usanzwe ukora umwuga w’ubuvumvu.

Yagize ati “Urabona ko duturanye ariko nta kibazo aragira cyo gukodesha, ikindi ntaba mu giti aba mu nzu kandi ayishyura neza”.

Hakizimana Dick Jonathan utuye muri metero 30 z’aho Kagarura yororera inzuki, yahamirije Imvaho Nshya ko uyu muvumvu ataba mu giti nkuko byumvikanye ku mbuga nkoranyambaga.

Ati “Nk’abaturanyi be twaramwegereye tumubaza ikintu arimo gukora atubwira ko azajya ashyiraho imitiba ya kizungu, ko atari inzu abamo.

Yatubwiye ko uriya mutiba ugura ibihumbi mirongo ine, kubera ko bayiba bakajya kuyigurisha ahandi, ndahirirwa abantu bahambonye baba bazi ko mpaba, ni uko yatubwiye”.

Ashimangira ko nta n’ahantu atekera hahari ku buryo wakwemeza ko aba mu giti.

Gahunda ya Leta ijyanye no kurwanya ibibazo bibangamiye abaturage (Human Security Issues), ni igahunda igera ku muturage udafite ubushobozi ndetse no kutagira aho aba.

Abaturage badafite amacumbi, abatuye mu manegeka bagiye bimurwa hirya no hino mu Mujyi wa Kigali bagatuzwa aheza ndetse bakubakirwa n’ibikorwaremezo.

  • NTAWITONDA JEAN CLAUDE
  • Nzeri 4, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE