Kigali: Abakozi ba Equity Bank bahuguriwe gukumira no kurwanya inkongi

  • Imvaho Nshya
  • Ukwakira 26, 2022
  • Hashize umwaka 1
Image

Kuri uyu wa Kabiri taliki ya 25 Ukwakira,  Abakozi 180 ba Equity Bank bakorera ku Cyicaro gikuru no ku ishami rya Kigali, mu Karere ka Nyarugenge bahawe amahugurwa ajyanye n’inkongi mu rwego rwo kubongerera ubumenyi bwo kubafasha kuzikumira, kuzirwanya bifashishije ibizimyamuriro bitandukanye n’uburyo bwo gutabara abari mu nyubako mu gihe cy’inkongi.

Bigishijwe ibitera inkongi, ibizigize, amoko yazo ndetse n’ibizimyamuriro byifashishwa mu kuzimya buri bwoko bw’inkongi, banakora imyitozo ngiro ijyanye n’uburyo bwo guhunga basohoka mu nyubako mu gihe habaye inkongi, banatabara abari mu bice by’inyubako byibasiwe n’inkongi.

Muri uyu mwitozo basobanuriwe kandi banerekwa uko mu gihe habaye inkongi, umukozi ushinzwe umutekano mu nyubako atanga impuruza yifashishije inzogera imenyekanisha ko hari ikibazo kibaye, abakozi bose bakihutira gusohoka.

Inspector of Police (IP) Boniface Runyange mu gutanga amahugurwa yagize ati: “Mu gihe bidashobotse ko umukozi abasha kugera ahari inzogera bitewe n’uko ari ho inkongi yatangiriye, ashobora kwifashisha ifirimbi cyangwa akavuza induru iherekejwe n’ubutumwa buburira abari mu nyubako ko habaye inkongi.”

Yakomeje agira ati: “Abakozi bagomba gusohora bimwe mu bikoresho by’ingenzi bishobora kwangirika no gutiza umurindi inkongi, bakirinda gusohoka birukanka cyane kugira ngo batagwirirana.”

Yavuze ko nyuma yo gusohoka mu nyubako, abakozi bose bagomba guhurira ahantu hamwe, bakagenzura ko abari bari mu nyubako bose basohotsemo, bahamagara umwe  umwe, haba hari utasohotse kubera impamvu runaka, bakabimenyesha abashinzwe ubutabazi bakajya kumushakisha, agahabwa ubutabazi n’ubuvuzi, kandi ubuyobozi bukihutira gutabaza Ishami rya Polisi rishinzwe kurwanya inkongi n’ubutabazi kugira ngo ribunganire.

Bagaragarijwe kandi ko bibujijwe gusubira mu nyubako yabereyemo inkongi utabiherewe uruhushya n’abashizwe kurwanya inkongi.

Umuyobozi ushinzwe ituze n’umutekano muri Equity Bank  Bariyo Andrew, yavuze ko babonye ari ngombwa guhabwa uyu mwitozo hagamijwe kwigisha abakozi b’iyi Banki uburyo bwo kwitabara no guhungisha abakiliya mu gihe haba habaye inkongi  cyane ko iba itateguje.

Yagize ati: “Twateguye ibikoresho byose byakwifashishwa mu gihe haba habaye inkongi, dusaba ishami rya Polisi rishinzwe kuzimya inkongi n’ubutabazi kugira ngo baduhugure na bo baha agaciro ubusabe bwacu.”

Yashimiye Polisi y’u Rwanda yaje kubahugura by’umwihariko ku mwitozo ngiro bigishijwe, avuga ko ari ingenzi mu gufasha kugabanya ingaruka z’inkongi  haba ku buzima bw’ abantu ndetse no kwangirika kw’imitungo.

  • Imvaho Nshya
  • Ukwakira 26, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE