Kicukiro: Ubuyobozi bwakomoje ku bishingirwaho hashyirwa mu bikorwa ibyifuzo by’abaturage

  • NTAWITONDA JEAN CLAUDE
  • Ugushyingo 2, 2022
  • Hashize umwaka 1
Image

Umuyobozi Nshingwabikorwa w’Akarere ka Kicukiro, Umutesi Solange, atangaza ko icyifuzo umuturage atanga kidasubizwa inyuma ariko ko harebwa ibyihutirwa kurusha ibindi.Yabigarutseho mu nteko y’abaturage yabereye mu Kagari ka Rwimbogo mu Murenge wa Nyarugunga, kuri uyu wa Kabiri taliki 01 Ugushyingo 2022.

Muri iyi nteko, abaturage bo hirya no hino mu Karere ka Kicukiro batanze ibitekerezo ku byo babona byazakorwa mu ngengo y’imari ya 2022/2023.Umuyobozi Nshingwabikorwa w’Akarere ka Kicukiro, Umutesi Solange, asobanura ko kugira ngo ibyifuzo by’abaturage byemezwe, hari inzira binyuzwamo, ko ibyifuzo bitatu bitoranywa muri buri mudugudu kandi byose biba byihutirwa.

Nyuma yo kumva ibitekerezo by’abatuye Umudugudu, bishyikirizwa inama njyanama y’Akagari. Akagari kareba ibyifuzo bitatu bya buri mudugudu, inama njyanama igatoranyamo ibyihutirwa kurusha ibindi. Ati “Iyo Akagari kamaze kubisuzuma kakabyemeza kabishyikiriza inama njyanama y’Umurenge, na yo ikemezamo ibyihutirwa kurenza ibindi ikabishyikiriza Akarere”.Akomeza avuga ati “Icyo gihe turicara ku rwego rw’Umujyi wa Kigali tukemeza ibyihutirwa kurenza ibindi bikajyanishwa n’ubushobozi buba buhari hanyuma akaba ari byo biherwaho”.

Umutesi Solange, Umuyobozi Nshingwabikorwa wa Kicukiro, agaragaza ko muri iyi myaka bamaze bakora umwitozo wo gukusanya ibyifuzo by’abaturage, ahamya ko abaturage bifuza cyane ibigendanye n’imihanda.Ati “Ni muri urwo rwego Umujyi wa Kigali wakomeje gutekereza, ni iki twakora kugira ngo twunganire wa muturage wari waratangije gahunda yo kwikorera imihanda.

Muri uyu mwaka hatangiye uburyo bushya bwo kunganira umuturage aho abaturage bishyize hamwe bashaka kwikorera umuhanda, aho kuwukora 100% Umujyi wa Kigali uzana 50% n’abaturage bakazana 50%, ubwo ni uburyo bwo gusubiza ibyifuzo by’abaturage”.Kabakire John, Perezida w’inama njyanama y’Akagari ka Rwimbogo mu Murenge wa Nyarugunga, avuga ko ibyo abaturage basabye ari inyongera ku byakozwe.Ati “Abaturage twashoboye kwiyubakira Akagari kacu, ubu dufite ibiro byiza bigezweho.Twiyubakiye imihanda ibirometero bigeze kuri bine bijya mu makaritsiye yo mu midugudu.Avuga ko hari imihanda icaniye kandi ko aho icaniye umutekano ari nta makemwa.

Dr Gasinzigwa Marie Christine, umuyobozi w’Umudugudu wa Urwinyange mu kagari ka Rwimbogo nyuma yo kwiherera n’abaturage ayoboye, basabye ibibuga by’abana bakiniramo, ivuriro n’umuhanda.Ati “Umudugudu wacu turasaba ivuriro rikorana na mituweli.

Turasaba umuhanda twatangiye, ko twafashwa ugakorwa ukarangira”.Butera Béatrice utuye mu Mudugudu wa Umushumba Mwiza yasabye ko bakubakirwa ishuri ry’inshuke ry’ikitegererezo.Abatuye mu Kagari ka Rwimbogo basaba ko batunganyirizwa igishanga cya Umushumba Mwiza.Butera agira ati “Uretse kuba iki gishanga kigaburira abatuye Akarere ka Kicukiro, kinagaburira abatuye Umujyi wa Kigali”. Mwesigye Edouard utuye Nyandungu asaba ko bakubakirwa ruhurura ndetse n’ishuri ry’inshuke cyane ko ngo bifitiye ikibanza.

  • NTAWITONDA JEAN CLAUDE
  • Ugushyingo 2, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE