Kicukiro: Hashyinguwe imibiri irenga 10,000 y’i Karembure na Nunga

  • NTAWITONDA JEAN CLAUDE
  • Kamena 30, 2023
  • Hashize amezi 11
Image

Minisitiri w’Abakozi ba Leta n’Umurimo, Rwanyindo Fanfan, yifatanyije n’abaturage bo mu Karere ka Kicukiro abereye imboni muri Guverinoma mu gikorwa cyo gushyingura mu cyubahiro imibiri isaga 10,000 yavanywe i Karembure na Nunga n’indi 138. 

Ni mu muhango witabiriwe n’abaturage ba Kicukiro n’inshuti, ubuyobozi bw’Akarere, Inzego z’umutekano n’izindi nzego zitandukanye kuri uyu wa Gatanu taliki 30 Kamena 2023, mu muhango wo gushyingura imibiri isaga ibihumbi icumi mu Rwibutso rwa Jenoside rwa Gahanga.

Minisitiri Rwanyindo yashimye ubuyobozi bwa Kicukiro bwafatanyije n’izindi nzego ndetse n’imiryango y’abarokotse Jenoside yakorewe Abatutsi, bagatekereza kwimura no gushyingura mu cyubahiro imibiri y’abazize Jenoside yakorewe Abatutsi yabashije kuboneka uyu mwaka.

Yavuze ko imibiri yashyinguwe i Gahanga ahemejwe kubakwa Urwibutso rwa Jenoside muri aka gace, ari imibiri isaga ibihumbi icumi yari yashyinguwe i Nunga na Karembure ku buryo butari bunoze.

Yagize ati: “Uko iyi mibiri yari ishyinguye, hari n’aho wasangaga abishwe bo mu muryango umwe, bamwe bashyinguwe i Nunga, abandi i Karembure, ugasanga ntibyoroheye abarokotse Jenoside igihe cyo kongera kwibuka no kunamira ababo ariko nta yandi mahitamo yari ahari”. 

Yasabye abaturage ba Kicukiro gukura isomo rikomeye ku byabaye no guhinduka ku bagifite ingengabitekerezo ya Jenoside.

Minisitiri Rwanyindo asobanura ko igikorwa cyo kwimura imibiri no guhuza inzibutso bigamije kurushaho kwitabwaho neza kandi n’umutekano wazo ukarushaho kubungabungwa.

Ati: “Kinagamije kugaragaza no kubungabunga amateka y’urupfu rw’abacu biciwe muri iki gice cya Gahanga, kuko hateganyijwe no gushyirwaho umwanya uzaba werekana imyenda n’ibindi bimenyetso byose bitanga isura y’ubugome bwakoranywe Jenoside yakorewe Abatutsi mu 1994”.

Karuranga Hycinthe uhagarariye imiryango y’abashyinguye ababo bishwe muri Jenoside, ashimira ubuyobozi bw’Igihugu bwashyizeho umwanya wo kwibuka abazize Jenoside.

Mu 1995 avuga ko bashyinguye uko bari bashoboye bakoresha ibikoresho birimo ambaraje, imifuka ndetse n’amashitingi.

Ashima ko ababo baruhukiye ahantu habahesha icyubahiro.

Yavuze ko imibiri yavanywe i Karembure ari 2,522, indi mibiri 7,564 yavanywe Nunga.

Akomeza agira ati: “Turashimira Perezida wa Repubulika Paul Kagame watugeneye umwanya wo gushyingura no kwibuka abacu.

Mu 1959 ntibibutse, 1963 ntibibuka. Batwika Bugesera nararebaga ariko ntitwabibutse. Dushimira Perezida waduhaye kwibuka tutabimusabye, iyo ni imiyoborere myiza tumushimira”. 

Karuranga avuga ko imibiri 135 yavanywe munsi ya Kiliziya mu cyobo cya metero 100. 

Ahamya ko bahingukiye ku bana bari bambaye ingofero zidodesheje ubudodo. Ku rundi ruhande ngo abarokokeye ku kibuga no ku Kiliziya cya Gahanga ngo ntibarenga 20.

Avuga ko imibiri yose hamwe yashyinguwe mu cyubahiro mu rwibutso rwa Jenoside rwa Gahanga ari 10,224.

Kagoyire Christine, Visi Perezida w’Umuryango urengera inyungu z’abacitse ku icumu (IBUKA), yashimiye Inkotanyi ko zahagaritse Jenoside yakorewe Abatutsi.

Yagize ati: “Aya mahano Imana ishimwe ko atazongera kubaho”.

IBUKA isaba abagize uruhare muri Jenoside kwiyambura umwambaro w’ubugome bityo bakerekana abatarashyingurwa aho bari ngo bashyingurwe mu cyubahiro.

Kagoyire ashimira abarokotse Jenoside ko bakomeje kwiyubaka.

Akomeza agira ati: “Mukomere kuko ntawe ukiduhiga, nta mafirimbi, nta mbwa ziduhiga. Murahirwa kuko muri mu gihugu kitazongera kubamo Jenoside”.

Ubuyobozi bw’Umujyi wa Kigali bwizeza ko buzakomeza kuba hafi abarokotse Jenoside mu bikorwa byo guha icyubahiro no kubungabunga ibimenyetso bya Jenoside.

Visi Meya w’Umujyi wa Kigali ushinzwe Imibereho myiza n’Iterambere ry’ubukungu, Urujeni Martine, yakomeje agira ati: “Umujyi wa Kigali uzakomeza gufasha abacitse ku icumu nko kubabonera amacumbi, kuyasana ndetse no kwita ku bakibana n’ihungabana”.

Asaba buri wese kurwanya ingengabitekerezo ya Jenoside aho ari hose kugira ngo barinde igihugu kongera kugwa mu mwijima.

Akomeza agira ati: “Ndasaba ababyeyi kwegera abana mukabigisha amateka nyakuri. Ni inshingano zacu nk’ubuyobozi ni n’inshingano zanyu nk’ababyeyi kwigisha amateka nyakuri”.

Yongeraho kandi ko iki ari cyo gihe cyo kuzirikana ubutwari bw’Inkotanyi zahagaritse Jenoside yakorewe Abatutsi mu 1994.

Uwitonze Théogène warokokeye i Gahanga yavuze ko hari ubwo abicanyi bamusabye kwicukurira.

Avuga ko yagiye kwihisha ahantu agahamagarwa n’umugore wari wihishe mu gihuru bakakibanamo.

Uwo mugore ngo yari yaturutse Rubirizi ariko ngo avuka ku Kibuye, avuga ko yamusanze atwite inda nkuru akajya amusaba kujya kumushakira imyumbati.

Ati: “Naragiye ngiye gushaka imyumbati ngarutse nsanga yabyaye”.  

Avuga ko Inkotanyi zaje ziturutse i Nyanza ya Kicukiro zihungisha Abatutsi bari barokotse, na we akomezanya na zo atandukana na zo mu 1997.

  • NTAWITONDA JEAN CLAUDE
  • Kamena 30, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE