Kicukiro: Bakuye amasomo ku Rwibutso rwa Jenoside rwa Kigali

  • NTAWITONDA JEAN CLAUDE
  • Ukwakira 27, 2022
  • Hashize umwaka 1
Image

Abagize amatsinda y’ubumwe n’ubwiyunge mu Murenge wa Kicukiro mu Karere ka Kicukiro mu Mujyi wa Kigali, ku wa Kabiri taliki 25 Ukwakira 2022 basuye Urwibutso rwa Jenoside rwa Kigali ku Gisozi.

Ubuyobozi bw’Umurenge wa Kicukiro busobanura ko ibi biri mu rwego rwo kubakira ubushobozi amatsinda y’ubumwe n’ubwiyunge hagamijwe gukomeza kwimakaza ubumwe n’ubudaheranwa bw’Abanyarwanda.

Aya matsinda agizwe n’abarokotse Jenoside yakorewe Abatutsi, abagize uruhare muri Jenoside, abahunze mu 1959 n’abana bafite ababyeyi bafungiwe icyaha cya Jenoside.

Mukandahiro Hydayat, Umunyamabanga Nshingwabikorwa w’Umurenge wa Kicukiro, yasabye abagize amatsinda y’ubumwe n’ubwiyunge gukomeza komorana ibikomere no guharanira ko Jenoside itazongera kubaho.

Asaba kandi urubyiruko kwamaganira kure uwashaka kurubibamo urwango n’amacakubiri ayo ari yo yose.

Murekatete Seraphine umwe mu bagize amatsinda y’ubumwe n’ubwiyunge mu murenge wa Kicukiro, avuga ko nyuma yo gusura urwibutso rwa Kigali hari isomo ahavanye.

Ati: “Tumaze gusura ibice birimo amateka akomeye. Bivuze ngo isomo nkuye hano, ni uguharanira ko ibyabaye bitazongera kuba”.

Ahamya ko kera bajyaga bigishwa ko Umuhutu atagomba gukundana n’Umututsi ahubwo ko agomba kwiyumvanamo n’Umuhutu.

Yagize ati: “Ubu noneho twaje gusanga twebwe turi Abanyarwanda, tugomba guharanira ko buri muntu wese aba Umunyarwanda kandi agaharanira ko nta cyababaza mugenzi we”.

Mukiza Johnson, umushumba mu itorero ry’Abangirikani mu Rwanda Paruwasi ya Kicukiro akaba ahagarariye imiryango ishingiye ku myemerere mu murenge wa Kicukiro, avuga ko yasobanukiwe uruhare rw’abanyamadini muri Jenoside.

Avuga ko icyo basabwa ari ukwigira ku mateka. Ati: “Dusabwa kuza kureba ibyabaye kuko twarebye dusanga hariho uruhare rw’abanyamadini n’imiryango ishingiye ku myemerere bagize muri Jenoside yakorewe Abatutsi.

Ibyo rero iyo uri kumwe n’abanyamadini n’abayoboke b’idini muganira, tubigisha kutazagira na rimwe mu buzima bwabo gutekereza kuvangura abo Imana yaremye”.

Yakomoje ku isomo bavanye ku rwibutso rwa Kigali. Ati: “Isomo dukuye hano nuko mu by’ukuri tugomba guha agaciro ikiremwamuntu”.

Ashimangira ko Imana yaremye umuntu mu ishusho yayo bityo ngo uwishe umuntu aba agomeye Imana.

Avuga ko bamaze guhugurwa mu masomo y’isanamitima no gukira ibikomere bahisemo kwishyira hamwe bagakora amatsinda agamije guhumurizanya no gufata ingamba z’ejo hazaza kugira ngo ibyabaye bitazongera kuba.

Rutaganda Andrée, Umuhuzabikorwa w’Itorero mu Karere ka Kicukiro, yashimiye ubuyobozi bw’Umurenge bushyigikira amatsinda y’ubumwe n’ubudaheranwa.

Ashimangira ko abanyarwanda bagomba kuganira ku mateka yabo, bakayasobanukirwa kuko ngo ari imwe mu nzira izabageza ku budaheranwa bifuza.

Mu Murenge wa Kicukiro habarizwa amatsinda abiri y’ubumwe n’ubwiyunge harimo itsinda ry’Urumuri ryo mu Kagari ka Ngoma n’itsinda ryitwa Icyerekezo ryo mu Kagari ka Kagina.

  • NTAWITONDA JEAN CLAUDE
  • Ukwakira 27, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE