Kenya: Inzovu zirenga 200 zishwe n’amapfa

  • NTAWITONDA JEAN CLAUDE
  • Ugushyingo 5, 2022
  • Hashize umwaka 1
Image

Imihindagurikire y’ikirere ikomeje guteza ibibazo hirya no hino ku Isi ugasanga imvura yarabuze amapfa agahitana ubuzima bwa bimwe mu binyabuzima, ahandi ugasanga imyuzure ni myinshi.

Raporo yashyizwe ahagaragara ku wa Gatanu taliki 4 Ugushyingo na Minisiteri y’Ubukerarugendo ya Kenya ivuga ko inzovu zirenga 200 zapfuye kubera amapfa mu mezi icyenda ashize muri Kenya.

Kenya ifite ikibazo cy’ibura ry’imvura ibintu bitigeze bibaho mu myaka 40 ishize, bikaba intandaro y’imfu zikabije z’ibinyabuzima birimo inzovu, imparage, inyamaswa z’agasozi(wildebeest), udusumbashyamba n’izindi.

Abanditsi ba raporo yasohotse kuri uyu wa Gatanu barabyemeza bati “Amapfa arimo atera igihombo kinini cy’inyamaswa zo mu gasozi”.

Minisiteri y’ubukerarugendo ya Kenya ivuga ko hagati ya Gashyantare n’Ukwakira 2022 inyamaswa zirimo inzovu 205 hamwe n’inyamanswa z’agasozi (wildebeest) 512, imparage 381, udusumbashyamba 12 n’imbogo 51 zapfuye biturutse ku kubura amazi.

Muri rusange amoko 14 yibasiwe n’izi mfu ni indyabyatsi, kubera ko ibiryo byazo byabaye bike biturutse ku ibura ry’imvura.

Parike y’Igihugu ya Amboseli, iherereye hafi y’umusozi wa Kilimanjaro ni yo yibasiwe cyane, mu mezi icyenda inzovu 76 zapfiriyeyo mu zisaga 1900 zihabarizwa, muri zo harimo abana b’Inzovu 45 bazize imirire mibi biturutse ku kuba za nyina zidashobora kuzonsa.

Muri Parike y’igihugu ya Tsavo abana bane b’inzovu na bo bishwe n’intare kubera ko ba nyina nta ntege bari bafite zo kubarinda.”

Abanditsi kandi baraburira ku bijyanye n’Imparage ya Grévy ubwoko bwangirika cyane, Imparage 45 za Grévy mu zibarirwa mu 2000 zibarizwa muri iriya Pariki zapfuye kubera amapfa guhera muri Gashyantare.

  • NTAWITONDA JEAN CLAUDE
  • Ugushyingo 5, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE