Kayonza: Hatashywe Inzu y’Ababyeyi yatwaye miliyoni 321 Frw

  • NTAWITONDA JEAN CLAUDE
  • Kamena 27, 2022
  • Hashize imyaka 2
Image

Ku Kigo Nderabuzima cya Rukara, hatashywe Inzu y’Ababyeyi yuzuye itwaye miliyoni 321 z’amafaranga y’u Rwanda, ikazafasha kwita ku buzima bw’ababyeyi n’abana babo.

Iyo nzu ni umwe mu mihigo 105 Akarere ka Kayonza kahize mu mwaka wa 2021-2022 ikaba yarubatswe ku bufatanye bw’Akarere na Diyoseze Gatolika ya Kibungo.

Umuyobozi w’Akarere ka Kayonza John Bosco Nyemazi ari kumwe na Nyiricyubahiro Musenyeri Incimatata Oreste ndetse n’abakuriye inzego zishinzwe umutekano bamaze gufungura ku mugaragaro Inzu y’Ababyeyi (maternité) yubatse mu kigo nderabuzima cya Rukara.

Mu gutaha inzu nshya y’ababyeyi ku kigo nderabuzima cya Rukara, Ababyeyi babyaye bagenewe impano n’abayobozi batandukanye.

Nyiricyubahiro Musenyeri Incimatata Oreste aravuga ko muri serivisi zitangirwa muri iki kigo nderabuzima cya Rukara hateganyijwe na serivisi itanga ubujyanama ku buryo bwo gufasha ababyeyi kubyara abo bashobora kurera.

Yavuze ko iyo nzu nshya izabibafashamo kubera ko ifite ubushobozi buhagije, kandi yashimye ubufatanye hagati ya Kiliziya na Leta mu guteza imbere imibereho myiza y’abaturage.

Ababyeyi bashyikirijwe impano (Foto Akarere ka Kayonza)

Yagize ati: “Uruhare rwa Kiliziya ni uru, iyi nzu y’ababyeyi ije kongera ubushobozi bw’iki kigo nderabuzima. Ubundi bagezaga ku babyeyi 8 ni bo bateganyaga none urabona ko inzu noneho yagutse. Uruhare rwa kiliziya ni ukugira ngo abantu barusheho kugira ubuzima bwiza”.

Musenyeri Incimatata yongeyeho ko beretswe ahatangirwa inama kugira ngo abantu bateganye neza ku rubyaro rwabo, bigisha ababyeyi ngo babyare abana bashoboye kurera kandi hagati y’umwana n’undi habemo umwanya  be kubyara indahekana. Kiliziya igira uruhare mu gukangurira ababyeyi kubyara abo bashoboye kurera.

Ati: “Muri Kiliziya dufitemo ishami ry’ubusugire bw’ingo risobanurira ababyeyi uko bagomba kubyara haciyemo intera ngo babyare abana bashoboye kurera, dufatanya na Leta impamvu bagomba guteganya neza urubyaro ntibibatungure”.

Mu butumwa Meya yageneye abitabiriye umuhango wo gutaha maternité, yabanje gushima ubufatanye buri hagati ya Leta na Kiliziya Gatolika mu nzego zitandukanye.

Yagarutse no ku bindi bikorwa remezo byubakiwe abaturage birimo imihanda, imiyoboro y’amazi, amashuri, amasoko n’ibindi. Yagaragaje ko ibikorwa nk’ibi bigerwaho kubera ubuyobozi bwiza.

Yagize ati: “Mu cyiciro cya mbere habayeho Kwibohora muri politiki mbi, ubu mu cyiciro cya kabiri bwo ni politiki yo gukomeza kugeza abaturage mu kwibohora mu bukungu, mu mibereho myiza.”

Yibukije ko iyo umubyeyi abyariye mu rugo bishyira ubuzima bw’umubyeyi n’umwana mu kaga, iyo nzu y’ababyeyi ikaba izafasha ababyeyi kubyarira hafi.

Meya yavuze kandi ko ku bufatanye bw’Akarere, Kiliziya Gatolika n’izindi nzego, Inzu y’Ababyeyi ya Rukara izongererwa ubushobozi mu bakozi n’ibikoresho.

Hatashywe ku mugaragaro Inzu y’Ababyeyi ku Kigo Nderabuzima cya Rukara (Foto Akarere ka Kayonza)
Inzego z’umutekano zishyikiriza impano umubyeyi (Foto Akarere ka Kayonza)
  • NTAWITONDA JEAN CLAUDE
  • Kamena 27, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE