Kanombe: Abaturage barashimira FPR- Inkotanyi yabagejeje kuri byinshi

  • NTAWITONDA JEAN CLAUDE
  • Ukwakira 31, 2022
  • Hashize umwaka 1
Image

Abaturage batuye mu Murenge wa Kanombe mu Karere ka Kicukiro barashima intambwe y’iterambere bamaze gutera kubera politiki nziza y’Umuryango FPR- Inkotanyi.

Ibi babihera ku bikorwa remezo bimaze kugera mu Murenge wa Kanombe, ibyinshi bikaba byaragezweho kubera uruhare rw’abanyamuryango.

Babivuzeho mu gihe kuri iki Cyumweru taliki 30 Ukwakira 2022, abanyamuryango ba FPR- Inkotanyi mu Murenge wa Kanombe bahuriye mu nteko rusange bakareba ibyo bamaze kugeraho ndetse n’ibyo bazakora.

Nshizirungu Sudati avuga ko nta mupangayi inzu zo mu gace kazwi nko mu Itunda zagiraga, aho zakodeshwaga ibihumbi 100 ariko ubu inzu yaho ikodeshwa ibihumbi 400 kubera ibikorwa by’iterambere ry’umuhanda.

Bagize uruhare mu kwiyubakira imihanda yo muri karitsiye baranayitaha

Avuga ko mbere y’imyaka 20 ishize bari bafite umuhanda mubi cyane, utagendwa, ari umuhanda mubi, imodoka zihora mu magaragaje, amagare atagenda, moto zitagenda ariko ubu ngo barashimira Ubuyobozi bukuru bw’igihugu by’umwihariko Umuryango FPR- Inkotanyi n’abaturage bakomeje kuba hamwe.

Nubwo hari ibyo abanyamuryango bishimira ariko ngo mu mitangire ya serivisi hari ibikwiye kunozwa.

Gasarabwe Amiel, umuganga wungirije ku kigo nderabuzima cya Busanza mu Murenge wa Kanombe, avuga ko batanga serivisi zitandukanye akagaragaza ko bagorwa no kutagira abaganga bahagije. 

Ibi byemezwa na bamwe mu barwayi bagana iki kigo nderabuzima.

Uwamahoro Christine utuye mu Kagari ka Busanza mu Mudugudu wa Gishikiri, agaragaza ko amaze umwaka yivuriza ku kigo nderabuzima cya Busanza agahamya ko bagerageza gutanga serivisi nziza.

Ati “Serivisi yaho ni nziza baragerageza. Imbogamizi njye mbonamo ni uko tuza kwivuza tugatinda bitewe nuko abakozi wenda bahakorera ari bakeya, ugasanga umuganga avuye muri serivisi imwe akajya mu yindi bitewe nuko abaganga ari bake”.

Shema Ngamije, umuyobozi w’ishuri ribanza rya Karama, asobanura ko mbere yuko iryo shuri ryubakwa hari ikigo cy’ishuri cya Busanza cyari gifite abanyeshuri basaga ibihumbi bitatu.

Yagize ati “Mu ishuri rimwe wasangaga nibura harimo abana hafi 70, bamwe badafite aho bicara, bicaye hasi ariko aya mashuri yaje aje gukemura ikibazo cy’ubucucike cyari mu kigo cya Busanza. 

Imiganda yakozwe n’abanyamuryango ba FPR Inkotanyi kandi n’ubu baracyadufasha”.

Abanyamuryango ba FPR Inkotanyi mu murenge wa Kanombe bubatse ibyumba by’amashuri

Musabyimana Marceline urerera mu kigo cy’ishuri ribanza rya Kagarama avuga ko iri shuri ryabagiriye umumaro munini cyane kuko ngo mbere abana babo bakoraga ingendo ndende bajya kwiga Nyarugugu, Camps Kanombe n’ahandi.

Ati “Ndashimira Umuryango FPR- Inkotanyi kuko yaradufashije cyane. Abanyamuryango bo mu Murenge wa Kanombe baradufashije mu bijyanye n’imiganda dushobora kongera umubare w’ibyumba by’amashuri”.

Bakoze imiganda mu rwego rwo kubaka amashuri

Sekamana Innocent utuye mu Mudugudu wa Nyabyunyu mu Kagari ka Karama, ashimira Umuryango FPR- Inkotanyi washyizeho politiki nziza yo guca imihanda no guturana kw’abaturage begeranye.

Ati “Kubona umuriro byari bigoranye ariko aho site yaziye tubona amazi, umuriro uraza bityo kwa guturana biza gutanga amahirwe aho n’urubyiruko rwagiye rubona amahirwe mu bwubatsi.

Iyo iyo politiki ishingiye ku iterambere ryiza tutaza kuyibona ntabwo twari kubaka izo nzu nziza, ntirwari kubona amazi meza. 

Amazi muri Busanza yari nk’umugani ariko uyu munsi turayabona ku buryo rya terambere RPF yatubwiraga twararibonye ndetse rirakomeje”.

Uwimpuhwe Dative ashimira FPR- Inkotanyi yabahaye amazi bakaba batakijya kuvoma mu bishanga.

Ati “Hano mu Mudugudu wa Kariyeri aha amazi yari ikibazo kuyabona twajyaga kuvoma iriya epfo mu gishanga ariko muri iyi myaka ibiri byarakemutse ntabwo tukibura amazi.

Ndashimira FPR- Inkotanyi yashoboye kutugezaho amazi”.

Ndaruhutse na we utuye Kariyeri ahamya ko imiyoboro y’amazi yubatswe akagaragaza ko mbere ijerekani y’amazi yaguraga amafaranga 500 ariko ubu ijerekani ngo ntirenza amafaranga mirongo itatu iyo yabaye menshi.

Komiseri ushinzwe ubutabera mu muryango FPR- Inkotanyi mu Murenge wa Kanombe avuga ko bazakomeza gutanga inama zituma Abanyarwanda babana neza.

Mutiganda Amon uhagarariye Umuryango FPR- Inkotanyi mu Murenge wa Kanombe yabwiye Imvaho Nshya ko bagize uruhare mu kubaka ibikorwa remezo birimo kongera ibyumba by’amashuri.

Avuga ko abanyamuryango bagiye begeranya ubushobozi bagacanira imihanda biyubakiye aho batuye. Mutiganda avuga ko abanyamuryango ba FPR- Inkotanyi bubakiye imiryango itishoboye irimo n’ituye mu murenge wa Masaka. 

Abanyamuryango ba FPR Inkotanyi bubakiye imiryango itishoboye

Nkurunziza Idrissa, Umunyamabanga Nshingwabikorwa w’Umurenge wa Kanombe akaba na Komiseri ushinzwe imiyoborere myiza mu muryango FPR- Inkotanyi mu Murenge, avuga ko ibikorwa abanyamuryango bakoze mu gihe cyashize ari byinshi.

Yagize ati “Imiyoborere myiza ni yo igihugu cyacu kirimo gishyiramo imbaraga, imaze kutugeza kuri byinshi ariko by’umwihariko mu muryango wacu FPR- Inkotanyi nka moteri ya Guverinoma”.

Bafashije imiryango itishoboye kwiteza imbere

Mu nteko rusange y’Umuryango FPR- Inkotanyi mu Murenge wa Kanombe, abanyamuryango bashoboye gukusanya miliyoni zisaga eshatu zo kwishyurira abaturage batishoboye umusanzu w’ubwisungane mu kwivuza. 

Bishimiye iterambere bagezeho
  • NTAWITONDA JEAN CLAUDE
  • Ukwakira 31, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE