Kamonyi: Hubatswe ibyumba by’amashuri 1 211 byatwaye miliyari 18 Frw

  • AKIMANA JEAN DE DIEU
  • Gashyantare 29, 2024
  • Hashize amezi 2
Image

Abaturage bo mu Karere ka Kamonyi baravuga imyato Leta y’u Rwanda yabagejejeho byinshi mu byo yiyemeje muri Gahunda ya Guverinoma y’Imyaka 7 yo Kwihutisha Iterambere (NST1), by’umwihariko bakaba barungutse ibyumba by’amashuri 1 211 byuzuye bitwaye miliyari zirenga 18 z’amafaranga y’u Rwanda.

Abo baturage bavuga ko kwegerezwa ibyumba by’amashuri byinshi byakozwe mu myaka 6 ishize ya NST1, bikaba byaragabanyije ingendo abana babo bakoraga bajya cyangwa bava ku ishuri.

Habimana Sarathier wo mu Murenge wa Ngamba, avuga ko mbere yuko hubakwa amashuri hari abana bakoraga urugendo rw’ibilometero 4 bajya kwiga, ariko ubu amashuri bayashyize ku irembo nta mwana ugikora urugendo rurerure.

Yagize ati: “Ni byo twubakiwe amashuri hafi y’aho dutuye ku buryo abana bacu bakoraga ibilometero bine by’urugendo bajya kwiga nta n’umwe wo mu Kagari kacu ugikora ingendo ndende ajya gushaka uburezi kure y’aho umuryango we utuye, ndetse byatumye abana bacu biga neza cyane.”

Hakizimana Xavier utuye mu Murenge wa Musambira, avuga ko byagoraga abana bajyaga kwiga kure, ariko ubu bubakiwe amashuri ku buryo nta munyeshuri ugikora ibilometero bibiri ajya kwiga.

Yagize ati: “Abana bacu bakoraga ingendo ndende bajya kwiga kure ariko ubu twegerejwe ishuri rya ES Musambira banashyiramo amashami atarabonekaga hano hafi, kuko bakoraga ibilometero birenze bibiri kugenda gusa”.

Mujawimana Marthe wo mu Kagali ka Gitare, Umurenge wa Nyarubaka, yabwiye Imvaho Nshya ko mbere bavaga ahazwi nko ku Kiyovu bakajya kwiga mu Gitare bakagenda ibilometero bine n’igice, ariko ubu Urwunge rw’Amashuri (GS) rwa Rwigerero rwakuyeho izo ngendo.

Yagize ati: “Nawe reba iri shuri ryacu baduhaye ni ryiza ariko mbere ritaraza kuko abana bacu bajyaga kwiga ahantu hitwa mu Gitare. GS Rwigerero yatumye abakoraga urugendo rurerure bajya kwiga rugabanyuka kuko dufite ishuri ku marembo yacu. Dushimira Leta yacu yaduhaye aya mashuri kandi habaye impinduka mu myigire y’abana.”

Nyiransabimana Speciose utuye mu Murenge wa Rukoma, na we ashimira gahunda ya Leta yo kwegereza amashuri abaturage kugira ngo baruhure abana mu myigire hakiyongeraho no kuba abana basigaye bagaburirwa ku ishuri.

Yagize ati: “Iyi  gahunda ya Leta twabonye ko imvugo ya Perezida wa Repubulika ari yo ngiro. Ubwo yiyamamazaga yatubwiye ko abana bacu bazigira ubuntu ndetse aduha amashuri yigirwamo n’abana bacu kugira ngo bige neza, baruhuke ingendo ndende bakoraga, kandi yongeraho ko bafatira ifunguro ku ishuri bagakomeza amasomo yabo batagiye mu rugo.”

Umuyobozi w’Akarere ka Kamonyi Dr. Nahayo Sylvere, yabwiye Imvaho Nshya ko mu nkingi y’uburezi hakozwe byinshi kugira ngo abigisha babikore neza kandi hazamuke igipimo cy’ireme ry’uburezi.

Yagize ati: “Mu nkingi z’uburezi hakozwe byinshi kugira ngo abana bacu bige neza kandi bitume igipimo cy’ireme ry’uburezi rizamuke kandi hari aho tubona umusaruro watangiye kuboneka.”

Yongeraho ko mu myaka 6 hubatswe ibyumba birenga 1211 byo gufasha kugabanya ubucucike ariko yemeza ko bataragera ku gipimo gikwiriye.

Yishimira ko kuri ubu abana benshi baruhuriwe ingendo bakoraga kugira ngo bagere ku ishuri cyangwa bataha, agashimira abaturage n’abandi bafatanyabikorwa bitanze kugira ngo bigerweho.

Ikindi ni uko ibi byumba bimaze gutwara amafaranga asaga miliyari zirenga 18 z’amafaranga y’u Rwanda, bikaba byarubatswe mu Mirenge itandukanye y’Akarere ka Kamonyi.

Kugeza ubu mu Karere ka Kamonyi habarurwa amashuri y’inshuke 149, abanza 150 naho ayisumbuye ni 62, hakiyongeraho amashuri 12 y’imyuga n’ubumenyi ngiro (TVET).

Ubuyobozi bw’Akarere ka Kamonyi buvuga ko impuzandengo y’ikigero cy’ubucucike mu mashuri igeze kuri 51 mu gihe bisaba ko icyumba kimwe kigomba kwigirwamo n’abana 45.

  • AKIMANA JEAN DE DIEU
  • Gashyantare 29, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE