Kamonyi: Bafashwe bajya gucuruza  ibilo 279 by’inyama batubahirije amategeko 

  • Imvaho Nshya
  • Kanama 28, 2023
  • Hashize amezi 9
Image

Polisi y’u Rwanda yafatiye mu Karere ka Kamonyi abantu batanu  bageragezaga gucuruza ibilo 279 by’inyama z’inka mu buryo bunyuranyije n’amategeko.

Batatu muri bo bafatiwe mu Kagari ka Muganza mu Murenge wa Runda saa tatu zo mu gitondo cyo ku wa Gatanu tariki 25 Kanama bafite ibilo 99 by’inyama, abandi babiri baza gufatirwa mu Kagari ka Sheli mu Murenge wa Rugarika ku gicamunsi, batwaye mu modoka ibilo 180. 

Umuvugizi wa Polisi mu Ntara y’Amajyepfo, Superintendent of Police (SP) Emmanuel Habiyaremye, yavuze ko bafatiwe mu bikorwa bya Polisi byo kurwanya abakora ubu bucuruzi mu buryo butemewe n’amategeko.

Yagize ati: “Nyuma y’amakuru twahawe n’umuturage ko hari inyama zizanywe aho bariya bagabo uko ari batatu bacururizaga, zitwawe kuri moto mu buryo butujuje ubuziranenge, abapolisi berekeje aho bacururiza, babasangana ibilo 99 by’inyama zidafitiwe ibyangombwa, hatagaragazwa n’inkomoko yazo ni ko guhita bafatwa, haracyashakishwa abandi bafatanyaga.”

Yongeyeho ati: “Ahagana saa cyenda z’igicamunsi kuri uwo munsi, ubwo abapolisi bari mu kazi mu muhanda uva i Muhanga werekeza mu Mujyi wa Kigali, mu Mudugudu wa Ntebe haje gufatirwa imodoka yo mu bwoko bwa Toyota Carina yari irimo abantu babiri, bayisatse basangamo ibilo 180 by’inyama batari bafitiye ibyangombwa.”

Bamaze gufatwa bavuze ko bari baturutse mu Karere ka Muhanga berekeza mu Mujyi wa Kigali, aho bari bazishyiriye abakiliya babo birinze kugaragariza imyirondoro kimwe n’uburyo bazibonagamo.

SP Habiyaremye yaburiye abacuruza n’abatwara inyama batabifitiye uburenganzira, abibutsa ko ari icyaha gihanwa n’amategeko kandi ko ari bimwe mu byongera ubujura bw’amatungo y’abaturage.

Yakanguriye abaturage kujya bagurira inyama ku bacuruzi bazi neza ko babifitiye uburenganzira kandi aho bakorera hujuje ibisabwa, bakirinda kugura inyama zitujuje ubuziranenge kuko zishobora kubatera indwara kandi aho baketseho kuba hatemewe gucururizwa inyama bakabimenyesha ubuyobozi.

Amabwiriza N˚ DGO/REG/003 yo ku wa 25/04/2022 agenga ubucuruzi bw’inyama mu Rwanda mu ngingo yayo ya 5, avuga ko umucuruzi uwo ari we wese wifuza gukora ubucuruzi bugengwa n’aya mabwiriza agomba kubanza kubihererwa uruhushya n’Urwego rw’Igihugu Ngenzuramikorere (RURA).

Iteka rya Minisitiri n°013/11.30 ryo ku wa 18/11/2010 ryerekeye itwarwa n’icuruzwa ry’inyama mu ngingo ya 2 havuga ko gutwara inyama mbisi zikonjesheje zigenewe kuribwa bigomba gukorwa ku buryo zitagaragarira abahisi n’abagenzi, zigomba kuba zitwikiriyeneza kandi zikarindwa izuba, imvura, ibyondo, umukungugu n’amasazi.

Ingingo ya 3 y’iri teka ivuga ko itwarwa mu binyabiziga ry’inyama mbisi, zikonjesheje zidapfunyitse rikorwa hakoreshejwe ibinyabiziga bipfutse kandi igice izo nyama zitwarwamo kitagira aho gihurira n’umushoferi. 

Aho inyama zitwarwa hagomba kuba hashashemo ibyuma bikoze muri “zinc” cyangwa ikintu cyose kitagwa umugese.

  • Imvaho Nshya
  • Kanama 28, 2023
  • Hashize amezi 9
TANGA IGITEKEREZO
lg says:
Nzeri 8, 2023 at 3:13 pm

Ntahandi ziva ninka zabaturage zibwa nijoro iny ama nyinshi zinjira mumugi wa Kigali ziza na moto amagare amavatiri zitiruka muhanga
zikagezwa muli za boucherie ninyinshi hafi kungana nizibagirwa nyabugogo ubwo haziramo nizipfishije byose abantu bakagura abantu bashishoze cyangwa bajye mumahahiro yizewe atalibyo barye ibishyimbo

Andika igitekerezo

AMATEGEKO AGENGA IYANDIKA RY'IGITEKEREZO CYAWE