Joy-Lance Mickels yabaye Umunyarwanda wa mbere ugiye gukina UEFA Champions League

Rutahizamu w’Ikipe y’Igihugu y’u Rwanda ‘Amavubi’ na Sabah Baku yo muri Azerbaijan, Joy-Lance Mickels, yanditse amateka yo kuba Umunyarwanda wa mbere ugiye gukina imikino ya League yo gushaka itike yo gukina imikino ya nyuma ya 1/8 cya UEFA Champions League 2026/27.

Uyu mukinnyi yabigezeho mu ijoro ryo ku wa 25 Kanama 2026, nyuma yo gufasha ikipe ye ya Sabah FK gutsinda Hapoel Be’er Sheva yo muri Israel ibitego 5-2, mu mukino wo kwishyura, iyisezerera ku giteranyo cy’ibitego 6-4 mu mikino yombi.

Joy-Lance Mickels na bagenzi bagiye gukina uyu mukino basabwa gutsinda ibitego 2-0, nyuma yaho umukino ubanza bari batsinzwe ibitego 2-1.

Hapoel Be’er Sheva ni yo yatangiye neza umukino bidatsinze ku munota Igor Zlatanovic yatunguye amazamu ku munota wa 10.

Byasabye gutoza Sabah FK yari imbere y’abafana bayo kwishyura igitego cyinjijwe na Christian Nwachukwu, bituma amakipe yombi ajya mu kiruhuko anganya igitego 1-1.

Ku munota wa 61’ Guy Mizrahi yatsindiye Hapoel Be’er Sheva igitego cya kabiri, ku munota 74 Sabah FK yabonye igitego cya kabiri cyo kwishyura cyashyizwemo na Umarali Rakhmonaliev mbere y’uko Tellur Mutallimov winjiye mu kibuga asimbuye ayitsindira igitego cya gatatu ku munota wa 90+5.

Iminota 90 y’umukino yarangiye amakipe yombi anganya ibitego 3-3 mu mikino yombi hitabazwa indi minota 30 y’inyongera kugira ngo hamenyekana ikipe ikomeza.

Sabah FK ni yo yitwaye neza kuko ku munota wa 101’ Patrick Orphe yatsinze igitego cya Kane mu gihe rutahizamu, Joy-Lance Mickels yashyizemo igitego cya gatanu cyabonetse ku munota 115.

Umukino warangiye Sabah Baku itsinze Hapoel Be’er Sheva ibitego 5-2, mu mukino wo kwishyura, iyisezerera ku giteranyo cy’ibitego 6-4 mu mikino yombi.

Iyi kipe yo muri Azerbaijan yahise ikatisha itike yo gukina imikino yo mu matsinda ya UEFA Champions League 2026/27 ku nshuro ya mbere mu mateka yayo.

Tombola igaragaza uko amakipe azahura muri UEFA Champions League iteganyijwe ku wa Kane, tariki ya 27 Kanama 2026, mu Mujyi wa Monaco mu Bufaransa.

Kuva mu 2024, Impuzamashyirahamwe ya Ruhago i Burayi (UEFA) yemeje uburyo bushya bwo gukina amarushanwa y’amakipe yabaye meza iwayo arimo na Champions League, aho amakipe ayikina yavuye kuri 32 akagera kuri 36.

Buri kipe ikina imikino umunani (ine mu rugo n’ine hanze) aho kuba itandatu yari isanzwe, ikina n’amakipe umunani atandukanye kandi inshuro imwe, ubundi hakarebwa uko yakurikiranye mu manota ndetse n’ibitego.

Amakipe umunani ya mbere ahita abona itike yo gukina imikino yo gukuranwamo ya ⅛, mu gihe asoreza ku mwanya wa cyenda kugeza ku wa 24 akina imikino ibiri ya kamarampaka (ubanza n’uwo kwishyura) ahataniye kuzuza 16 muri iki cyiciro.

Amakipe asasoreza kuva ku mwanya wa 24 kugeza ku wa 36, ahita ava mu marushanwa yose agasezererwa.