Jeannette Kagame yafunguye ‘Imbuto Hub’ yagenewe ibikorwa  biteza imbere abaturage (Amafoto)

Kuwa 24 Nyakanga 2026, Madamu Jeannette Kagame, washinze Umuryango Imbuto Foundation, yafunguye ku mugaragaro ‘Imbuto Hub’ i Nyamata, mu Karere ka Bugesera. Iki kigo cyubatswe hagamijwe guteza imbere ubuzima n’imibereho myiza y’abaturage, kikaba ari kimwe mu bikorwa byo kwizihiza isabukuru y’imyaka 25 Imbuto Foundation imaze ishinzwe, ikora mu guteza imbere Abanyarwanda mu nzego zitandukanye. 

Ni igikorwaremezo cyubatswe hagamijwe guteza imbere imibereho myiza y’abaturage binyuze muri serivisi zinyuranye zirimo uburezi, ubuzima, imyuga, imikino no kwita ku bana bato. Iki kigo gifite ubushobozi bwo kwakira abanyeshuri 200 buri munsi, mu gihe isomero ryacyo rishobora gukoreshwa n’abagera kuri 960, kandi gifite ishami ritanga serivisi z’ubuzima, rikaba ryita ku baturage bagera kuri 750.

Ku bijyanye no guteza imbere ubumenyi n’imyuga, urubyiruko rugera ku 117 ruzajya ruhahererwa amahugurwa atandukanye arimo ubudozi, kogosha, ubwiza no gusuka imisatsi, mudasobwa n’indi myuga ibafasha kwihangira imirimo.

Imbuto Hub ifite kandi Urugo Mbonezamikurire y’Abana Bato (ECD) ruzajya rwita ku bana bagera ku 1 402, hagamijwe kubafasha gukura neza no kubategurira amashuri.

Iki gikorwaremezo kandi kirimo isomero ryagenewe abana, aho gukorera imyitozo ngororamubiri, ndetse n’ahagenewe abageze mu zabukuru bazajya bakinira imikino itandukanye nk’amakarita, gisoro n’ibindi.

Mu rwego rwo guteza imbere ubuzima n’imibereho myiza, harimo ahatangirwa ubujyanama n’ubuvuzi bw’ibanze, aho abaturage basuzumwa indwara zitandukanye ndetse bagahabwa serivisi zijyanye no kuboneza urubyaro.

Imbuto Hub ifite icyanya cyahariwe imikino itandukanye irimo Football, Volleyball, Basketball, Karate n’indi mikino y’amaguru n’iy’amaboko, bigamije guteza imbere impano no gushishikariza abaturage gukora siporo.