17°C , Partly sunny | Kigali-Rwanda

Iyo hatabaho ubutwari, kwibohora ntibyari gushoboka-CHENO

Yanditswe na NTAWITONDA JEAN CLAUDE

Ku ya 04-07-2021 saa 10:38:00

Urugamba rwose rwo kwibohora ingoyi iyo ari yo yose yaba iy’ubukoloni, ubuyobozi bubi, akarengane, amacakubiri, ubujiji, ubukene n’ibindi bibi byinshi, rusaba kurangwa n’indangagaciro z’ubutwari umuntu adahatirwa gushyira mu bikorwa ahubwo ziva mu mahitamo ye yo guharanira icyiza.

Kuri uyu wa 4 Nyakanga 2021, u Rwanda rurizihiza isabukuru ya 27 yo Kwibohora kw’Abanyarwanda kwavuye mu bwitange bwa bamwe mu Banyarwanda banze kurebera ubuyobozi bubi burushaho kuroha Igihugu mu icuraburindi.

Urugamba rwo kubohora u Rwanda rwashobotse kubera ukwiyemeza n’ubwitange bw’abo barukunze, bakemera no kumena amaraso yabo kugira ngo ruve muri uwo mworera wari ushamikiye ku bisigisigi by’amateka y’ubukoloni rusangiye n’ibindi bihugu by’Afurika.

Mu kiganiro Imvaho Nshya yagiranye n’Umunyamabanga Nshingwabikorwa w’Urwego rushinzwe Intwari z’Igihugu, Imidari n’Impeta by’Ishimwe (CHENO), Bwana Nkusi Deo, yahamije adashidikanya ko iyo hatabaho ubutwari bwaranze abahisemo kwitanga ku neza y’abandi, kwibohora kwishimirwa ubu kutari gushoboka.

Yagize ati: “Ntawatandukanya urugamba rwo kwibohora n’ubutwari, kuko iyo hatabaho ubutwari n’umuco w’ubutwari mu Banyarwanda ntabwo kwibohora byari gushoboka; yewe n’icyo gitekerezo nticyari kubaho.”

Nkusi Deo, Umunyamabanga Nshingwabikorwa w’Urwego rushinzwe Intwari z’Igihugu, Imidari n’Impeta by’Ishimwe (CHENO)

Bwana Nkusi avuga ko abarasaniye u Rwanda bagaca iminyururu y’imiyoborere yimakaje urwango n’amacakubiri, bayobowe n’indangagaciro z’ubutwari zibimburirwa no gukunda Igihugu kuko ugikunda abanza gukunda abaturage bacyo.

Ingabo za RPA Inkotanyi zari zigizwe n’Abanyarwanda biganjemo urubyiruko bigomwe ubusore bwabo ngo barengere abaheze ishyanga n’abari bakomeje kurenganira mu Gihugu imbere. Intumbero yari iyo guhuza Abanyarwanda, buri wese akisanga mu gihugu kidatsimburwa mu rugendo rw’iterambere.

Indi ndangagaciro y’ubutwari yabaranze yari iy’umutima udatinya gushyigikira icyiza, ugaragaza ikibi ukanakirwanya wivuye inyuma nubwo bari bazi ko byabasabaga ikiguzi gikomeye kirimo no kumena amaraso yabo.

Bwana Nkusi ati: “Gukunda Igihugu rero bijyana no kucyitangira, kubohora Igihugu byajyanye no kugikunda no kucyitangira. Bisaba ubwitange buhebuje, ukaba wanagipfira. Abantu bakunda Igihugu, bamenya n’igikenewe kugira ngo babe bakwibohora: baracyitangira.”

Kugira ngo kubohora u Rwanda bishoboke kandi bashingiye ku kuba abaharaniye kurubohora baragize ubushishozi no kureba kure, bakabona zahabu yahishwe amaso ya benshi ari yo cyerekezo cy’Igihugu buri wese agira ubwisanzure mu bikorwa byose bimuganisha ku iterambere nta nkomyi.

Mu zindi ndangagaciro z’ubutwari zabaranze ni uko babereye abandi urugero rwiza, bagendera mu kuri ntibatinya no kukurwanirira, barangwa n’ubupfura n’ubumuntu, ubushishozi, ubwitange, umurava no kwihangana. Umurage basize wabaye umusingi ukomeye w’urugendo rwo kubaka iterambere rirambye.

Perezida Paul Kagame asura ibice bigize Ingoro y’amateka y’urugamba rwo Guhagarika Jenoside yakorewe Abatutsi mu 2017

Kwibohora ubukene n’ubujiji ni urugendo rukomeje

Mu myaka 27 ishize, ibiranga ubutwari byakomeje kwigaragaza binyuze mu buryo butandukanye Abanyarwanda bahitamo gukomeza kwibohora ubukene n’ubujiji bibonwa nk’izingiro ry’ibibazo byose u Rwanda rwanyuzemo, n’umutwaro uremereye Umugabane w’Afurika ucyikoreye.

Bwana Nkusi avuga ko intambwe ya mbere yo kwibohora nyakuri ari ukwibohora ubujiji n’ubukene, ati: “Igituma abantu bakora ibintu bimwe na bimwe bidakwiye gukorwa ni ubujiji mu bijyanye n’imyumvire, imibanire n’abandi, imibereho n’imitekerereze. Ikindi utakwibohora nyakuri utacyigobotoye ni ubukene.”

Ubukoloni bwatije umurindi ubukene n’ubujiji muri Afurika igihe kirekire, ndetse n’igihe ibihugu biboneye ubwigenge mu myaka ya 1960 bihabwa ubutuzuye kuko byakomeje kwishingikiriza kuri ba bakoloni mu mahitamo y’icyerekezo cy’iterambere.

Nkusi akomeza agira ati: “Ukurikije ibyo twabayemo n’ibyo tubona dusubiye inyuma no mu mateka, usanga kwa kwibohora kutarabayeho kuko ubwigenge bugomba kubaho mu rwego rwa Politiki, mu buyobozi, ariko hakabaho no kwibohora mu rwego rw’ubukungu n’ubumenyi. Abakoloni batanze ubwigenge n’ukuboko kumwe, babusubirana n’ukundi kuboko.”

Yakomeje agira ati: “Twebwe Abanyafurika, Abanyarwanda, tugomba gukora ku buryo bwa bwigenge bwacu bwuzura tukibohora muri Politiki n’ubuyobozi, tukibohora mu bukungu n’iterambere, mu mibereho n’imibanire. Urugamba rwo kwibohora ku Banyarwanda rwabayeho nyuma ya bwa bwigenge butuzuye.”

Mu kwizihiza isabukuru yo Kwibohora 27, hatashywe Umudugudu w’Icyitegererezo wa Kinigi wubatswe n’Ingabo z’u Rwanda

Mu bijyanye no kwibohora ubujiji, Leta y’Ubumwe bw’Abanyarwanda yatanze amahirwe angana binyuze muri Politiki y’uburezi kuri bose, ndetse buri Munyarwanda ahabwa ubwisanzure mu gukora ibyo ashoboye, aho gukomeza imyumvire ya gikoloni yo gupimira ubushobozi bw’abantu bose ku munzani umwe.

Mu kwigobotora ubukene no guharanira iterambere, Leta yashyizeho gahunda mbaturabukungu, ndetse buri wese amenyeshwa intumbero y’Igihugu y’igihe kigufi n’iy’Igihe kirekire binyuze muri gahunda za Guverinoma (EDPRS na NST), mu mihigo, Icyerekezo 2020, Icyerekezo 2050, Icyerekezo 2063 n’ibindi.

Bwana Nkusi yashimangiye ko urugamba rwo kwibohora ubujiji n’ubukene rukomeje kugeza n’uyu munsi, asaba buri Munyarwanda kurangwa n’ubutwari buganisha ku ntsizi ihuriweho na bose, nta n’umwe usigaye inyuma.

Ati: “Kwibohora bijyana n’uko buri wese amenya icyiza akagihagararaho, akamenya gutandukanya ikibi n’icyiza. Hari intambwe tugenda dutera ariko birasaba gukomeza kuba maso kuko icyadusubije inyuma ntaho cyagiye.”

Ubuyobozi bwa CHENO buvuga ko uyu munsi Abanyarwanda n’Inshuti z’u Rwanda bizihiza ku nshuro ya 27 isabukuru yo Kwibohora, buri wese asabwa gukora cyane, kunoza umurimo, kongera ubumenyi no kubusangiza abandi.

Abanyarwanda kandi barasabwa kurwanya bivuye inyuma abagerageza kugarura ivangura n’amacakubiri n’izindi ngeso zibasubiza inyuma zikadindiza n’iterambere ry’Igihugu muri rusange.

Uretse Umudugudu w’Icyitegererezo wa Kinigi, hatashywe n’ibindi bikorwa remezo mu Gihugu hose nk’amavuriro, imihanda, amashuri…

Umwanditsi:

NTAWITONDA JEAN CLAUDE

One Comment on “Iyo hatabaho ubutwari, kwibohora ntibyari gushoboka-CHENO”

  1. Kwibohoza byasabye UBUTWARI bukomeye cyane.Tekereza kurwana imyaka hafi 4,urwana n’abantu bafite intwaro zikomeye,kandi bafashwa n’igihugu gikomeye,France.Urugamba rwatwaye abantu benshi cyane.Gusa tujye twibuka ko imana idusaba gukundana,ikatubuza kurwana,niba koko tuli abakristu nyakuri.Abubahiriza iyo nama,kimwe n’abandi birinda gukora ibindi imana itubuza,nibo bazahembwa kubaho iteka muli paradizo.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.