Isomo umusaza w’imyaka 81 wifuza gutangira amashuri abanza akesha Perezida Kagame

  • BAHUWIYONGERA SYLVESTRE
  • Ukuboza 31, 2023
  • Hashize amezi 5
Image

Gasigwa Ezéchias w’imyaka 81, yamenyekanye cyane guhera taliki ya 28 Nzeri 2022 ubwo yagaragaraga ku Rwunge rw’amashuri rwa GS Gitsimbwe mu Murenge wa wa Gihombo, Akarere ka Nyamasheke, aje kwiyandikisha mu mwaka wa Mbere w’amashuri abanza.

Uyu mugabo bahimbye akazina ka Rwamatamu, akaze umwaka atangiye urugendo rwo kongera ubumenyi, amahirwe atigeze abona kuva yavuka mu mwaka wa 1942 kugeza igihe yumvaga impanuro za Perezida wa Repubulika y’u Rwanda Paul Kagame ashishikariza Abanyarwanda bose kongera ubumenyi, na we akumva atasigara.

Uyu mukambwe atuye mu Mudugudu wa Mubuga, Akagari ka Mubuga gaherereye mu Murenge wa Gihombo aho ishuri yiyandikishijemo ku myaka ye 80 riherereyemo.

Inkuru ye yarasakaye, kumva umukambwe ajya kwigana n’abuzukuruza cyangwa ubuvivi, bituma n’Ubuyobozi bw’Akarere n’ubwa GS Gitsimbwe bumwegera bumugira inama yo kujya mu isomero kuko akuze cyane.

Gusa kuri we si ibyo yashakaga kuko yumva imyaka itamubera inzitizi zo gutangira amasomo mu mashuri abanza ku myaka 81.

Mu kiganiro yagiranye n’Imvaho Nshya ubwo yamusuraga mu Murenge wa Gihombo, Rwamatamu yavuze ko icyemezo cyo gusubira mu ishuri yagikomoye ku mpanuro za Perezida Kagame yumvise, ashishikariza buri Munyarwanda guhora yongera ubumenyi.

Ababazwa cyane n’uko hari abana abona banga ishuri n’ukuntu we yarivukijwe n’uburyo yavutsemo, akumva yarashakaga guha abo bana bato urugero rwo gukunda ishuri.

Ati: “Sinigeze niga kubera ubukene bukabije twari dufite, aha ntuye ni ho navukiye ndanahakurira. Papa yabyaraga bose bapfa n’umugore we wa mbere aza gupfa, azana uwa kabiri ashaje cyane, apfa nkivuka atanyise izina. Hariho umuhango ko umugore upfakaye umwe mu bagabo bo mu muryango amusumbakaza. Ni uko umugabo wo mu muryango yahise acyura mama ananyita Gasigwa.”

Avuga ko uwo mugabo ntacyo yamumariye ngo amushyire mu ishuri, n’ubukene bwose bari bafite akura nabi,mu nzara ikomeye ariko ku bw’amahirwe ntiyapfa.

Gasigwa Ezéchias ubwo yari yinjiye mu wa mbere w’amashuri abanza muri GS Gitsimbwe mu mwaka ushize

Yakuramye inyota yo kwiga kuko yumvaga yifitiye icyizere kandi akumva afite ubwenge, ariko Leta yariho icyo gihe itemerera abarengeje imyaka yo gutangira amashuri abanza kuyajyamo.

Ku myaka 25 ni bwo Rwamatamu yashatse umugore babyarana abana 4 arapfa, na we ashaka undi ntibabyarana ariko baracyabana kandi we afite imyaka 65.

Nyuma ya Jenoside yakorewe Abatutsi, Rwamatamu yakozwe ku mutima n’ukuntu Leta y’Ubumwe bw’Abanyarwanda ishishikariza buri wese kwiga, agira icyo gitekerezo ariko bikomeza kwanga.

Ati: “Nakomeje kubabazwa cyane no kubona hari abana bapfusha ubusa amahirwe yo kugana ishuri baribahatira, mu gihe jye nayavukijwe mbishaka cyane. Nanze kuzasaza ntize ni bwo umwaka ushize niyemeje kujya gutangira uwa mbere w’amashuri abanza, Umuyobozi wa GS Gitsimbwe ambwira gushaka ipantalo n’ishati by’ishuri nkaza nkiga.”

Ku wa 28 Nzeri 2022 yari yabukereye,  ahageze abona abana bamwakiriye neza, mu kibuga barakina yumva arishimye nubwo hari bamwe banyuzagamo bakamwitegereza bamwibazaho.

Isaha yo kwinjira igeze yinjiranye n’abana, agezemo batangiye kwiga yumva bamubwiye gusohoka.

Ati: “Bambwiye ko kuba nta nyuguti n’imwe nzi, ibyiza nahera mu isomero, bampa umwarimu unyigisha ku buntu atangira kunkurikirana. Ubu inyuguti nyinshi maze kuzimenya, numva najya gutangira abanza, imyaka yose nsigaje ku Isi ikazaba iyo kwiga gusa nazaramba na kaminuza nkazayiga kuko numva nta cyanzitira.”

Aterwa imbaraga no kubona Igihugu kiyobowe n’abize

Gasigwa avuga ko ikindi yumva kimwongerera imbaraga zo gutangira amashuri abanza ni uko abona aho u Rwanda rugeze rubikesha kuyoborwa n’abize neza bafite ubumenyi n’ubunararibonye mu masomo atandukanye.

Ati: “Mpera kuri Perezida Kagame ndeba. Ibyo atugejejeho byose iyo atiga ntibyari gushoboka. Nanga umwana ukinisha ishuri ni yo mpamvu numva kuri iyi myaka ngifite inyota yo kwiga ngo ibyo nize bizagirire Igihugu akamaro. Ni uko banga ngo sinabishobora kandi numva ubushake ari bwose.”

Avuga ko nyuma yo kumenya inyuguti nyinshi agiye gusubira ku ishuri yari yagiye gutangiriraho agasaba gusubira mu mwaka wa Mbere.

Uyu mukambwe yiyemeje gushishikariza abana bose b’uyu Murenge gukunda ishuri. Iyo abonye umwana utagiye ku ishuri amubwira kujyayo, byaba ari n’ibikoresho akeneye, mu bufasha ahabwa muri gahunda ya “Saza Neza” akaba yabimugurira amurinda kuba yata ishuri.

Gusa avuga ko gukora ubukangurambaga bimugora mu gihe na we ubwe yaba atazi gusoma, kubara no kwandika.

Umuyobozi w’Ishami ry’Uburezi mu Karere ka Nyamasheke Sinabajije Alphonse, avuga ko bafashe icyemezo cyo kumujyana mu isomero kuko babonaga imyaka ye yararenze cyane, atari iyo kujya mu mashuri abanza.

Ati: “Icyemezo yafashe rwose ni cyiza nta wagica intege, kandi kuba n’ubu yumva akibifitiye inyota na bwo ni ubutwari. Ariko unareba n’icyo azamaza ibyo yiga ku myaka ye. Twamugiriye inama yo kujya mu isomer akiga gusoma, kwandika no kubara, umwaka umwe akaba abimenye. Tukumva bihagije dukurikije icyo tubona yamaza ubwo bumenyi ku myaka ye.”

Ubwo Gasigwa yazaga gutangira ishuri mu mwaka ushize, ni na bwo mu Murenge wa Shangi undi mugabo  wari ufite imyaka 54 yazaga gutangira uwa 4 w’abanza.

Uwo mugabo we basanze  ubumenyi afite bwamushyira mu wa 5 bahita bamwimura arayakomeza.

Ubuyobozi bw’Akarere ka Nyamasheke buvuga ko kuba hari abakuze cyane bagaragaza inyota yo kwiga ari ikimenyetso cy’imiyoborere myiza n’icyerekezo cyiza cy’Igihugu mu iterambere.

  • BAHUWIYONGERA SYLVESTRE
  • Ukuboza 31, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE