Isoko rishaje rya Muhanga ryagizwe ububiko bw’inzoga n’ikimpoteri

  • Imvaho Nshya
  • Ukwakira 31, 2023
  • Hashize amezi 4
Image

Bamwe mu baturage bakorera mu mujyi wa Muhanga bavuga ko ahahoze hari isoko rishaje hahinduwe ububiko bw’inzoga   mu gihe bari biteze ko hazakorerwa undi mushinga ndetse ikindi gice cyaryo gitoranyirizwamo imyanda iba yavanwe mu ngo.

Mu kiganiro bahaye Imvaho Nshya bavuga ko iki kibanza cyahawe sosiyete y’ishoramari rya Muhanga (MIG, Muhanga Investiment Group) bafatanyijemo n’Akarere ka Muhanga mu kiswe Muhanga Modern Market kugira ngo bahubake igice cya 2 cy’umushinga w’Isoko rya Kijyambere.

Ndagijimana Joseph avuga ko mu makuru yatanzwe babimurira mu rindi soko rya kijyambere bababwiraga ko iri rishaje bashaka ko hakorerwa umushinga mugari bitewe n’ingano y’iki kibanza.

Yagize Ati: “Tujya kwimurirwa muri ririya soko rishya  ni uko babonaga ko iri rishaje rikwiye gusenywa hagashyirwa undi mushinga kandi iki kibanza cyashyirwamo inzu yajya ifasha kubika  ibizakorerwa mu nganda zirimo kubakwa mu cyanya cy’Inganda cya Muhanga”.

Kamali Rachid avuga ko batunguwe n’uko harimo gukoreshwa n’abacuruza inzoga ndetse hakaba na Kompanyi ya AGRUNI ifite igice kiri haruguru gikusanyirizwamo imyanda igatoranywa akemeza ko batunguwe n’ibirimo kuhakorerwa.

Ati: “Twebwe twatunguwe no kubona hamaze igihe hadakoreshwa hagashyirwamo ububiko bw’inzoga kandi n’ubundi Kompanyi ya AGRUNI yari yarahawe igice cyo gutoranyirizamo imyanda ariko iyi mishinga si yo twabwiwe ku itangiriro hubakwa isoko rishya pe”.

Uwingabire Didacienne avuga ko iri soko rikwiye guhabwa abakorera hanze y’isoko bazwi nk’abazunguzayi kuko bateje ikibazo mu gihe hatari haboneka ahandi bakwerekezwa, none bishyiriyemo inzoga n’ibishingwe.

Yagize ati: “Njyewe mbona hari abantu bacururiza mu muhanda kuki batabahayemo igice ngo bavanwe mu muhanda ahubwo hakaba hashyizwemo ububiko bw’inzoga, kandi aba bateje akavuyo mu mujyi ariko bahawemo ibibanza bava mu muhanda n’ababagurira bakamenya aho babasanga”.

Perezida w’Urugaga rw’Abikorera mu Karere ka Muhanga uri no mu banyamuryango ba Muhanga Modern Market rihuriweho nabo n’Akarere ka Muhanga nk’abanyamigabane, Kimonyo Juvenal avuga ko iri soko rishaje ryateganyirijwe umushinga w’isoko igice cya II akemeza ko umushinga wa mbere wasize ideni bakirimo kwishyura bityo bagikomeje gushaka n’abandi baza bagafatanya mu kubaka igice cya II cy’umushinga ndetse bakanemeza ikizahakorerwa.

Aha ni mu isoko rishaje ahashyirwa imyanda

Yongeyeho ko ububiko bw’inzoga babonye bwashyizwemo butazatindamo ahubwo babaye bahifashishije kubera ko aho bari hari hato kandi bitazamara igihe kuko ubushobozi nibuboneka bazahita batangira kuko hagiye gukurikiraho inyigo y’ibyahakorerwa kandi turasaba abikorera bumva baza tugakorana baza bagashora amafaranga yabo.

Umuyobozi w’Akarere ka Muhanga, Kayitare Jacqueline avuga ko iri soko ryahawe Kompanyi ya Muhanga Modern Market ihuriweho n’abikorera bishyize hamwe muri Muhanga Investment Group(MIG) ndetse n’Akarere ka Muhanga bubaka  isoko ry’Icyerekezo rya Muhanga ryimuriwemo abahoze bakoresha isoko rishaje bimuwemo ndetse iki kibanza gihabwa iyi sosiyete kugira ngo izacyubakemo igice cya kabiki (Phase  II) cy’iri soko ariko baracyafite ideni rya Banki bakishyura bikaba byaratumye badahita batangira uyu mushinga.

Yagize ati: “Uyu ni umushinga ugizwe n’ibice 2 tugomba gukora ariko igice cya mbere cyamaze kuzura ndetse turateganya gutangiza igice cya Kabiri nubwo tugifite ideni rya Banki ariko aha hahoze isoko ntabwo turahakorera inyigo kuko abanyamuryango ni bo bagomba kwemeza igikorwa tugomba gukorera muri kiriya kibanza “.

Akomeza yemeza ko ahari ububiko bw’inzoga hari hato kandi hari ibikorwa byo kubaka imbuga biba ngombwa ko basaba kuba batijwe hariya mu isoko ariko mu gihe cyo gutangira umushinga aba bashoramari bamaze kwisuganya bazashaka ahandi bagana kugira ngo aha naho hakorwe.

Ubu bubiko bw’inzoga bwari busanzwe bukorera ahazwi nko kuri “Plateau” bukaba bugiye mu isoko rishaje rya Muhanga ahari hasanzwe hatoranyirizwa imyanda itwarwa na Kompanyi ya AGRUNI bivugwa ko yahawe amezi 3 mu gihe hagishakishwa indi Kompanyi yatwara imyanda mu Mujyi wa Muhanga.

Aha ni igice cyegereye isoko rya kijyambere

AKIMANA Jean de Dieu

  • Imvaho Nshya
  • Ukwakira 31, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE