IRONMAN 70.3 Rwanda 2022:  Abanyarwanda barashishikarizwa kuzayitabira

  • Imvaho Nshya
  • Nyakanga 28, 2022
  • Hashize imyaka 2
Image

Taliki 14 Kanama 2022 mu Karere ka Rubavu mu Ntara y’Iburengerazuba hazabera irushanwa  ryo ku rwego mpuzamahanga mu mukino wa Triathlon “IRONMAN 70.3 Rwanda 2022”.

Muri iri rushanwa abazitabira bazahatana mu mikino itatu ikomatanyije irimo Koga  “Swimming”, Kunyonga igare “Cycling” no Kwiruka n’amaguru “Running”  ku ntera ndende  aho  bazakora kilometero 113 ni ukuvuga kilometero 1,9 (Koga), kilometero 90 (Kunyonga igare) na kilometero 21.1 (Kwiruka n’amaguru).

Iri rushanwa ni inshuro ya mbere rigiye kubera  mu Rwanda akaba ari n’inshuro ya mbere rigiye kubera mu gice cy’Afurika y’Uburasirazuba  n’Uburengerazuba kuko u Rwanda ni igihugu cya 4 rizaba ribereyemo nyuma y’ Afurika y’Epfo, Misiri na Maroc.

Nyuma yo gutangiza ku mugaragaro imyiteguro y’iri rushanwa taliki 20 Mutarama 2022 i Rubavu, ku wa Gatatu  taliki 27 Nyakanga 2022 abarimo gutegura iri rushanwa bagaragaje aho imyiteguro igeze, igikorwa  cyabereye muri Lake Kivu Serena Hotel.

Umuyobozi w’Akarere ka Rubavu ahazabera irushanwa, Kambogo Ildephonse yatangaje ko imyiteguro irimo kugenda neza kandi abaturage bishimiye kuzakira abazitabira iri rushanwa kandi batazaza kureba gusa kuko harimo n’abazarushanwa.

Umuyobozi w’Akarere ka Rubavu , Kambogo Ildephonse

Yagize ati : “Abaturage bafite ibikorwa by’ishoramari biteguye kwakirana ubwuzu  abazitabira iri rushanwa kuko hari  ibyiza bazungukiramo birimo n’amafaranga.”

Meya Kambogo yakomeje avuga ko bazashishikariza abazaza kwitabira iri rushanwa kugera no mu bindi bice nyaburanga muri aka Karere ndetse n’ahandi hegereye aka Karere nko muri Pariki y’Ibirunga.

Ku bijyanye n’aho abazitabira bazacumbikirwa, Meya Kambogo ashimangira ko Hoteli  zose ziteguye kandi bizeye ko zizakira neza abazaza bazigana.

Anavuga ko bateguye n’imurikabikorwa kuva taliki 10 kugeza 15 Kanama 2022 kugira go aba bashyitsi bazitabira bazabashe kugira bimwe mu byo bagura bifatwa nk’urwibutso rw’uko bageze mu Rwanda.

Kugeza ubu abamaze kwiyandikisha kuzitabira “IRONMAN 70.3 Rwanda 2022”   bagera kuri 200 hakaba  harimo Abanyarwanda 5.

Meya wa Rubavu, Kambogo avuga ko bagiye gukomeza gushishikariza Abanyarwanda bafite impano muri iyi mikino kuzitabira kuko ubu kwiyandikisha   bizarangira taliki 03 Kanama 2022.

Ati : “ Tugiye gukoresha uburyo bwose bushoboka dukangurire Abanyarwanda biyandikishe bazitabire ku bwinshi.”

Ubusanzwe intego yari uko iri rushanwa rizitabirwa n’abantu bari hagati ya 1500 na 2000 ariko ubu intego ni uko nibura hazitabira abagera kuri 500.

Abiyandikisha bakaba bagomba kunyura kuri uru rubuga; https://www.ironman.com/im703-rwanda-register.

Umuyobozi ushinzwe ibikorwa muri iri siganwa, Umurame Michael yatangaje ko kwakira iri rushanwa ari amahirwe ku gihugu kandi bishimira  uburyo ubuyobozi bukuru bw’igihugu bwatumye bishoboka.

Yakomeje avuga ko iri rushanwa riri muri gahunda yo guteza imbere ubukerarugendo kuko hari abazaza kuryitabira abandi barikurikirane mu buryo bw’iya kure.

Umuyobozi ushinzwe ibikorwa muri IRONMAN 70.3 Rwanda 2022, Umurame Michael

Umurame avuga ko ari inyungu kuri siporo y’u Rwanda by’umwihariko mu mukino wa Triathlon kuko abazitabira iri rushanwa bakora ibihe birenze ibyo  bari basanzwe bakora bikaba bizatuma rero bazamura urwego.

Agaruka ku bwitabire, Umurame yavuze ko umubare ukiri muto bijyanye n’intego bari bihaye ariko muri iyi minsi uziyongera. Akomeza avuga ko ubusanzwe irushanwa rizakinwa n’umukinnyi ku giti cye ubasha gukina iyi mikino uko ari itatu ariko hazaba n’icyiciro cy’abazakina nk’ikipe aho umukinnyi umwe yakina umukino umwe undi agakina undi.

Yagize ati : “ Imibare twari twihaye nta bwo byagezweho kuko murabona ni ubwa mbere abantu ntibaramenya iri rushanwa ariko ubu tugiye gushishikariza Abanyarwanda  ku buryo biyandisha ari benshi kuko turabizi ko tubafite benshi bafite impano muri iyi mikino.”

Inzira izakoreshwa

Mu Koga hazakoreshwa ikiyaga cya Kivu (1,9 km) hanyuma abakinnyi bazavemo bafate igare bahere kuri Serena Hotel  bazamuka nk’abagana i Musanze bagere ku ruganda rw’Icyayi rwa Pfunda bakate basa n’abagana Rutsiro bagende kilometero 5 bakate basubire kuri Serena Hotel ariko bakomeze bagere Kigufi kuri Kivu Paradis Resort bakate bagaruke kuri Serena Hotel aho bazaba bakoze kilometero 45  nyuma bongere banyure muri iyi nzira basoze bakoze kilometero 90.

Nyuma yo gusiganwa ku igare hazakurikiraho gusiganwa n’amaguru aho bazava kuri Serena Hotel bakomeze umuhanda wa Grande Barrière bakomeze kuri Petite Barrière bakomeze kuri RRA basubire kuri Serena Hotel aho bazazenguruka inshuro 3 basoze bakoze intera ya kilometero 21.

Umujyi wa Rubavu

Umuyobozi mukuru wa Global Events Africa itegura irushanwa “IRONMAN 70.3 Rwanda 2022”, Bonita Mutoni agaragaza ko  u Rwanda rwashyize ingufu mu bukerarugendo ari yo mpamvu abazitabira  iri rushanwa biteze ko  bazishimira ibyiza nyaburanga   yaba ari abakinnyi ndetse n’abazaba babaherekeje.

Umuyobozi mukuru wa Global Events Africa, Bonita Mutoni

 Iri rushanwa ririmo gutegurwa ku bufatanye bw’inzego zitandukanye zirimo Urwego rushinzwe Iterambere mu Rwanda “RDB” binyuze muri gahunda ya “Visit Rwanda”, Minisiteri ya Siporo “MINISPORTS”.

Umunyamabanga Uhoraho muri MINISPORTS, Shema Maboko Didier yatangaje ko bishimira kuba u Rwanda rukomeje kugira amahirwe yo kwakira amarushanwa nk’aya kuko afasha mu buryo bw’iterambere rya siporo ndetse n’ubukungu.

Yakomeje avuga ko iri rushanwa ari ubwa mbere rigiye kuba akaba yizera ko rizafasha mu iterambere ry’umukino wa Triathlon ku rwego rw’igihugu ndetse na mpuzamahanga.

Umunyamabanga Uhoraho muri MINISPORTS, Shema Maboko Didier

Shema avuga ko barimo gufatanya n’ishyirahamwe ry’umukino wa Triathlon mu Rwanda “RTF”  mu gutegura abazitabira kugira ngo bazitware neza.

Umuyobozi w’Urwego rushinzwe Iterambere mu Rwanda “RDB”, Clare Akamanzi yatangaje ko iri rushanwa barifata mu buryo bwo kuzamura ubukerarugendo bushingiye kuri siporo.

Aha agaragaza ko amafaranga ava mu bukerarugendo  agera ku 10% ava mu bikorwa bitandukanye birimo inama n’ibikorwa bya  siporo  birimo amarushanwa n’ibindi kandi bifuza ko bizamuka bikagera nko kuri 50% kuko babona bishyizwemo imbaraga byashoboka.

Umuyobozi mukuru wa RDB, Clare Akamanzi

Akamanzi yagaragaje ko irushanwa  rya “IRONMAN 70.3 Rwanda 2022” rikurikirwa n’abarenga miliyoni 20 ku Isi hose akaba ari byiza kuko u Rwanda ruzagaragara ku Isi hose ku buryo hari abazifuza kuzaza kurusura ubutaha.

Umuyobozi mukuru wa RDB arashishikariza Abanyarwanda kwiyandikisha ari benshi kugira ngo abazitabira iri rushanwa n’abatazahatana bakaba bagomba kuzaza gushyigikira abazaba barushanwa. Yasabye kandi  ab’i Rubavu kuzakira neza abazitaba iri rushanwa babaha serivisi nziza.

Iri rushanwa  “IRONMAN 70.3 Rwanda 2022” rizatanga itike ku bantu bari hagati ya 45 na 50 yo kuzitabira shampiyona y’Isi “Ironman 70.3 World Championship 2022” izabera  mu mujyi wa St George mu Ntara ya  Utah muri USA  taliki 28 na 29 Ukwakira 2022.

  • Imvaho Nshya
  • Nyakanga 28, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE