Intambwe u Rwanda rwateye muri gahunda yo gufatira ifunguro ku ishuri

  • NTAWITONDA JEAN CLAUDE
  • Gashyantare 28, 2022
  • Hashize imyaka 2
Image

Isabukuru yUmunsi Nyafurika wahariwe gufatira ifunguro ku ishuri ugiye ku nshuro ya 7, ukaba uba buri mwaka taliki ya 1 Werurwe, hagamijwe kuzirikana umusaruro w’ifunguro ryo ku ishuri ku buzima, uburezi ndetse n’ubukungu bw’abaturage n’Igihugu muri rusange.

Minisiteri y’Uburezi (MINEDUC) ifatanyije n’Ishami ry’Umuryango w’Abibumbye rishinzwe ibiribwa ku Isi (WFP) batangije icyumweru cyahariwe gahunda yo kugaburira abana ku ishuri mu rwego rwo kwizihiza Umunsi Nyafurika wo gufatira ifunguro ku ishuri muri uyu mwaka wa 2022.

Icyo cyumweru cyatangiye kuri uyu wa Mbere taliki ya 28 Gashyantare kikazageza ku wa Gatatu Werurwe 3 Werurwe 2022. Ku rwego rw’Igihugu, iki cyumweru cyatangirijwe ku Rwunge rw’Amashuri rwa Ayabaraya mu Murenge wa Masaka, Akarere ka Kicukiro mu Mujyi wa Kigali.

Uyu munsi washyizweho muri Mutarama 2016 binyuze mu mwanzuro w’Umuryango w’Afurika Yunze Ubumwe (AU), aho ibihugu by’Afurika biwizihiza buri mwaka mu kuzirikana umusaruro mwiza amafunguro agaburwa ku ishuri ashobora kugira ku iterambere rirambye.

Ibirori byo kwizihiza uyu munsi ku rwego rw’Igihugu kandi bigamije gukangurira no kugira uruhare mu guteza imbere gahunda yo kugaburira abana ku ishuri mu Rwanda (NSFP), yapimwe ku bana bose biga mu mashuri abanza mu Rwanda kuva mu Kwakira 2021.

Gutanga amafunguro ku ishuri bigira ingaruka zikomeye ku buzima bw’abana, imirire, imikorere y’amasomo, hamwe n’akazi kazaza- kandi birashobora kuba inzira ikomeye yo kubaka ubushobozi bw’abayobozi mu Rwanda.

Umunyamabanga wa Leta muri Minisiteri y’Uburezi Ushinzwe Amashuri Abanza n’Ayisumbuye Gaspard Twagirayezu, yagize ati: “Mu gihe twizihiza isabukuru ya karindwi, Leta y’u Rwanda ishyize imbere uburezi bufite ireme, kandi ishyirwa mu bikorwa rya gahunda yo kugaburira abana ku ishuri ifatwa nk’imwe mu nkingi za mwamba kugira ngo iryo reme rishoboke.”

Yakomeje avuga ko muri iyi gahunda, Leta y’u Rwanda itanga 40% by’ikiguzi cy’ifunguro mu gihe ababyeyi bashishikarizwa gutanga 60%. Nanone kandi Leta imaze kubaka ibikoni 2,648 mu kongera ibikorwa remezo byoroshya iyi gahunda igamije no guhangana n’ikibazo cy’imirire mibi mu muryango nyarwanda.

Usibye imisanzu y’amafaranga n’ibikorwa remezo, hashyizweho amabwiriza ngenderwaho w’ibikorwa byo gutanga amafunguro ku mashuri, byemezwa, kandi bikwirakwizwa mu 2021, hashyirwaho uburyo bwo kuyobora, gucunga, no guhuza ibiryo by’ishuri mu nzego zose z’ubuyobozi.

Muri iyo gahunda, WFP itanga uruhare rw’amafunguro 117,000 mu bihugu 136 yo mu Gihugu binyuze muri gahunda yayo yihariye yo kugaburira abana ku ishuri  (HGSF) ifatanyamo na MINEDUC n’abandi bafatanyabikorwa.

Iyo gahunda itanga ubufasha bw’imbonezamirire mu mashuri ikanubaka ubushobozi bw’abahinzi mu bijyanye no guhinga ndetse no kugemura ibiribwa bikenewe mu mashuri baturanye. Iyo gahunda nanone irema amahirwe yo kwiga ndetse no kubaka ubushobozi bugira uruhare rukomeye mu iterambre no kwagura gahunga y’Igihugu yo kugaburira abana ku Ishuri.

Umuyobozi wa WFP mu Rwanda Edith Heines, yagize ati: “ Mu izina rw’abafatanyabikorwa bose mu gutanga amafunguro ku ishuri, twifuje gushimira Leta y’u Rwada uburyo yiyemeje guteza imbere gahunda yo kugaburira abana ku ishuri ku bana bose bari mu mashuri. Ibi byakozwe cyane cyane mu bihe bigoye by’icyorezo cya COVID-19. Kugaburira abana ku ishuri byahinduye icyerekezo cy’ahazaza h’u Rwanda mu kubaka ubushobozi bw’abakozi b’igihe kizaza no kubaka urubuga rwo kubaka uruhererekane rw’ibiribwa rurambye.”

Heines  yanavuze kandi ko WFP n’abafayantabikorwa batangiye gushyigikira gahunda yo kugaburira abana ku ishuri mu Rwanda guhera mu mwaka wa 2002, anashimangira ko batazigera bacika intege muri urwo rugendo.

Ibyo kurya byahinzwe mu Rwanda kandi ni na byo bikenewe cyane mu mashuri mu rwego rwo gushyigikira abahinzi n’aborozi, ubukungu bw’Igihugu ndetse n’ibikorwa byo kurwanya imirire mibi byifashishije indyo iboneka mu Rwanda.

Ubushakashatsi bwakozwe mu mwaka wa 2017, bwagaragaje ko buri dolari rishowe mu bikorwa byo kugaburira abana ku ishuri mu Rwanda rigarura inyungu y’amadolari y’amerika 4.80 mu bukungu binyuze mu gaciro ko gutanga umusaruro, ubuzima, imirire ndetse n’uburezi.

Biteganyijwe ko umuhango wo gusoza iki cyumweru cyahariwe gufatira amafunguro ku ishuri, uzabera mu Rwunge rw’Amashuri (GS) rwa Kiyonza mu Murenge wa Ngoma, Akarere ka Nyaruguru.

  • NTAWITONDA JEAN CLAUDE
  • Gashyantare 28, 2022
  • Hashize imyaka 2
TANGA IGITEKEREZO
Claudia says:
Werurwe 2, 2022 at 7:57 pm

ARIKO SE NK’ABANA BIGA MU MARERERO YA ECD KUKI BARIHISHWA AMAFARANGA MENSHI IBYO BIRYO NTIBYARORERA ARIKO ABANA BAKIGA NEZA? KURI GROUPE SCOLAIRE KAMPANGA MU KARERE KA MUSANZE UMURENGE WA KINIGI ECD BISHYURA BISHYUZA 25,000 KU GIHEMBWE NONEHO KANDI MURI AYO MAFARANGA NGO 5000 NI COMMUNICATION YA TEACHERS .ABANA BAHIGA 180 GUKUBA 5000 NI 900000.NUKUVUGA KO AYO 900000 YOSE BAYAGIRA COMMUNICATION KANDI NI ABA TEACHERS BATANDATU GUSA UBWO NI 50,000 KU GIHEMBWE. KANDI NA LETA IBAHEMBA MUDUTABARIZE ABABISHINZWE. MURAKOZE

Andika igitekerezo

AMATEGEKO AGENGA IYANDIKA RY'IGITEKEREZO CYAWE