Inkomoko ya kure y’intekerezo y’abazungu ku birabura, uko amoko y’abantu ateye mu ntekerezo y’abazungu

  • Imvaho Nshya
  • Ugushyingo 4, 2023
  • Hashize amezi 7
Image

Tito Rutaremara, inararibonye akaba n’Umuyobozi Mukuru w’Urwego rw’Igihugu Ngishwanama rw’Inararibonye, mu mboni ze yagaragaje inkomoko ya kure y’intekerezo y’abazungu ku birabura ndetse n’uko amoko y’abantu ateye mu ntekerezo y’abazungu.

Ibi yabigarutseho akoresheje urubuga rwe rwa X rwahoze ari Twitter.

Yagaragaje ko abazungu bagabanya abantu bo ku Isi mu nzego ishanu.

Ku rwego rwa Mbere haza abazungu b’imisatsi y’irende yera, b’amaso mato y’imisheru, imisatsi igera mu gahanga, b’utuzuru duto tureture n’utunwa duto, abo ni Aryen.

Abo ni bo Hitler yavugaga ko buzuye bari ku rwego rwa mbere begereye Imana, bashoboye kumva, kumenya no gutegeka abandi.

Ku rwego rwa kabiri uhasanga abazungu b’imisatsi y’irende yirabura, imisatsi igera mu gahanga, n’utuzuru duto.

Utwiso duto tw’imboni z’ ubururu, ibitsike bicinyiyeho imisatsi myinshi, utunwa duto.

Aba bazungu ni bo bari ku rwego rwa kabiri bari hafi y’Imana, bafite ubuhanga bungana n’ubw’aba mbere ariko ntabwo bafite ububasha nk’ubw’aba mbere mu guteka (Mu ntekerezo yaba Hitler).

Urwego rwa gatatu rwo rugizwe n’abantu bafite umubiri wenda kuba umuhondo, imisatsi y’irende yirabura igera mu gahanga, amaso y’imikatu yirabura (nkaya nyirahuku), utuzuru duto (tugufi nk’utwi nguge) bakagira utunwa duto.

Aba ubasanga ku mugabane w’Aziya; abazungu bibwira ko aba ari bo bari mu rwego rwa gatatu mu bwenge nyamara abashinwa barabatanze mu iterambere.

Urwego rwa Kane rugizwe n’abafite imisatsi y’irende yirabura igera mu gahanga bafite umubiri utukura.

Bafite amaso yirabura ariho ibitsike byirabura biriho imisatsi myinshi, bafite amazuru mato ndetse n’amanini, bafite iminwa mito n’iminini.

Aba bagizwe n’abarabu, abaturage ba za Amerika na Australia abazungu batarabica ngo babamare.

Abazungu bavuga ko aba bari ku rwego rwa kane rwo gutekereza nyamara amajyambere ya INCA yari ariho mbere y’abazungu.

Urwego rwa Gatanu ni urwego rwa nyuma rw’abantu bakiri hafi n’inguge bagituye mu mashyamba.

Bafite imisatsi y’injwenge yirabura igera mu gahanga cyangwa bafite uruhanga ruhanitse bafite amaso yirabura, bafite amazuru manini, bafite iminwa minini ariko bakagira uruhu rwirabura.

Abazungu bazi ko abo badashobora gutekereza ni ko abazungu b’abahanga babisobanuye.

Amadini y’abanyaburayi bavuga ko abamarayika beza baba bera naho abamarayika b’amashitani ari abamarayika birabura.

Yewe no mu bitabo byabo bya Bibiliya na Korowani handitsemo ko Noah yari afite abana umwe abona Se yambaye ubusa aramuseka,…

Se aramuvuma, umucira muri Afurika kuba umwirabura; mu maso y’abahanga mu ntekerezo (Philosophers) turi ibicucu.

Mu maso y’abahanga mu madini, abirabura turi ibivumwa. Icyo izi nteketezo zombi (Philosophies) zazanye muri Afurika.

Abazungu mu bucuruzi bwabo baguraga imyenda myiza (Silk) bagakura ibirungo by’ubwoko bwose mu Buhinde, hanyuma Abarabu n’Abayisilamu baba Turkey baza gufata ibice byegereye u Buhinde n’u Bushinwa, ubucuruzi busigara ari ubwabo.

Ibi byatumye abazungu bafata amato bazengura Afurika bajya gushaka ibyo bicuruzwa byo mu Buhinde nka ba Vasco da Gamma.

Abandi baboneza iyo muri Amerika bazi ko bagiye mu Buhinde no mu Bushinwa bagwa ku wundi mugabane batari bazi ufite ubutunzi bwinshi baricara barawutura, bica abo bahasanze ariko basanga bazakenera amaboko yo guhinga ibisheke, guhinga ikawa n’ibyayi, gucukura amabuye, basanga nta handi babakura keretse hahandi abahanga mu ntekerezo (Philosophers) n’abahanga b’amadini, bavuze ko hari abantu bataramenya ubwenge b’abirabura b’ibicucu, abo ari bo bashobora kuba abacakara, baza muri Afurika babatwara ku ngufu, abanyafurika bato n’abakuru bagifite ingufu. Ariko kubera urugendo rurerure no gufatwa nabi bagezagayo mbarwa.

Iyo batwaraga 1,000 hageragayo nk’ijana. Abo ni bo za miliyoni dusanga muri Amerika y’Epfo, iyo Hagati n’iya Ruguru.

Ariko byaje kugera igihe basanga muri Afurika ariho hari bwa butaka bwiza, ya mabuye y’agaciro ni bwo iby’ubucakara babiretse bahimba ibyitwa ubukoloni.

Afurika bayicamo imirwi barayigabanya, noneho bakoresha umunyafurika ataha iwe atakiba kwa shebuja, umunyafurika yibeshya ko atakiri umucakara.

Abanyafurika bacukura amabuye y’agaciro, bahinga ibisheke, bahinga ipamba bahinga icyayi n’ibindi babihingira abazungu, abazungu barongera barakira.

Nyuma y’intambara y’abazungu yiswe iy’Isi ya Kabiri; Abanyafurika batangiye gusakuza nabo ngo barashaka ubwigenge.

Abazungu bati ibyo nabyo bati reka dushyireho abazabidukorera bajye babituzanira iwacu. Abanyafurika bacukura amabuye nka kwa kundi, bahinga ibisheke, bahinga icyayi, bahinga ikawa nka kwa kundi kwa mbere; Abanyafurika barabyikorera babishyira abazungu; abazungu barakira.

Kera iyo wahozaga umwana umubyinirira waravugaga uti: tunywa ncwecure, tuzuru ntamyiîra, tuso narira, gahanga kamitari, sunzu rya mamaâra, kirugu ntufapfe (Umwana agahora cyangwa Agaseka).

TITO RUTAREMARA

  • Imvaho Nshya
  • Ugushyingo 4, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE