Imyuzure yibasiye u Rwanda mu biza 10 byahitanye benshi ku Isi mu 2023

  • NTAWITONDA JEAN CLAUDE
  • Ukuboza 30, 2023
  • Hashize amezi 2
Image

Imvura idasanzwe yateje imyuzure n’inkangu mu Ntara y’Amajyaruguru, iy’Uburengerazuba n’iy’Amajyepfo mu ntangiriro z’ukwezi kwa Gicurasi, yaje mu biza byahitanye abantu benshi ku Isi mu mwaka wa 2023.

Ibyo biza byahitanye abantu 135 abandi 111 barakomereka, hapfa amatungo arenga 4,255. Hasenyutse inzu 3,000 ndetse n’imyaka yari iteye ku buso bungana na hegitari 3,100 irangirika, bikaba bivugwa ko yangije imitungo ifite agaciro ka miliyari 222 z’amafaranga y’u Rwanda.

Ibyo biza byo mu Rwanda biza ku mwanya wa cyenda mu biza byahitanye abantu benshi, nyuma y’umutingito wo muri Turikiya na Syria wahitanye abasaga 55,000; umwuzure wiswe Daniel wishe abantu 4,352 muri Libya, umutingito wishe abantu 2,946 muri Morocco, umutingito wahitanye abantu 1,480 muri Afghanistan, umuyaga udasanzwe wiswe Freddy wishe abantu 679 muri Malawi.

Haza kandi umwuzure wishe abantu 438 muri Repubulika Iharanira Demokarasi ya Congo (RDC) umutingito wishe abantu 157 muri Nepal, umuyaga udasanzwe uvanze n’imvura wishe abantu 145 muri Myanmar, n’inkongi y’umuriro karundura yishe abantu basaga 100 muri Hawaii.

Umutingito wahitanye abasaga 55 000 muri Turikiya na Syria

Ku wa 6 Gashyantare 2023, ni bwo umutingito ufite ubukana bwa 7.8 wibasiye amajyepfo y’uburasirazuba bwa Turikiya hafi y’umupaka wa Syria, ukurikirwa n’undi wari ufite ubukana bwa 7.5 nyuma y’amasaha make gusa.

Nanone kandi hagiye habaho indi mitingito yagiye ikurikiraho, byose bikaba byarateje akaga muri ibyo bihugu, ariko cyane cyane Syria yibasiwe n’ibindi bibazo by’intambara.

Imibare yemezwa n’Ibiro by’Umuryango w’Abibumbye bishinzwe guhuza ibikorwa by’Ubutabazi, igaragaza ko iyo mitingito yahise yambura ubuzima bw’abasaga 55,000; abenshi mu bapfuye bakaba bari abo muri Turikiya.

Umutingito wibasiye igihugu cya Turikiya na Syria wari ukomeye cyane

Umutingito nk’uwo muri Turikiya waherukaga kubaho mu mwaka wa 1939, icyo gihe na bwo ukaba waratwaye ubuzima bw’abarenga 32,000 nk’uko byemezwa n’Ikigo cya Leta Zunze Ubumwe z’Amerika gishinzwe ubumenyi bw’Isi.  

Imvura ivanze n’umuyaga yiswe Daniel yahitanye ibihumbi muri Libya

Tariki ya 10 Nzeri 2023, Imvura nyinshi ivanze n’umuyaga yahawe izina rya Daniel yibasiye Umujyi wa Derna muri Libya, uherereye ku nkombe y’inyanja ya Mediterranee, maze iteza imyuzure yasenye n’ingomero ebyiri z’amazi ziba muri uwo Mujyi.

Kugeza ku ya 31 Ukwakira, ubuyobozi bwemeje ko abantu 4,352 ari bo bari bamaze kubura ubuzima n’abandi barenga 8,000 bakaba bari baburiwe irengero bivugwa ko na bo bashobora kuba bapfuye.

Umushinjacyaha Mukuru wa Libya, yashinje inzego z’ubuyobozi bw’icyo gihugu uburangare n’imiyoborere idahwitse yatumye iyo mvura irushaho kongera ibyo yangije.

Umutingito wishe abantu 2,946 muri Morocco

Hari ku wa 8 Nzeri ubwo umutingito ufite ubukana bwa 6.8 wibasiye amajyepfo y’uburengerazuba bwa Marrakech muri  Morocco, uhitana ubuzima bw’abantu 2,946 hakomereka n’abandi 5,674 nk’uko bishimangirwa n’Ikigo cy’Igihugu gishinzwe Ubumenyi bw’Isi cyanashimangiye ko uwo mutingito ari wo wa mbere ufite ubukana bwo hejuru wari ugaragaye muri ako gace.

Umutingito wo muri Afghanistan

Uyu mutingito wahitanye abantu 1,480 ugakomeretsa n’abandi babarirwa mu bihumbi, wari ufite ubukana bwa 6.3 ukaba waribasiye igice cy’uburengerazuba bw’icyo gihugugu ku wa 7 Ukwakira.

Ibyo biza byateje ibyago byaje byiyongera ku kibazo cy’umutekano muke w’ibiribwa muri icyo gihugu, ndetse n’ingorane zibasira abagore zirushaho kwiyongera. Imibare itangwa na Loni ishimangira ko hejuru ya 90% by’abahitanywe n’ibyo biza ari abagore n’abana bato.

Bitewe n’uko abahanga bavuga ko Afghanistan iherereye ku izingiro ry’ibice bitandukanye bigize inda y’Isi, ni igihugu gikunze kugaragaramo imitingito myinshi.

Mu mwaka ushize na bwo undi mutingito nk’uwo wari ufite ubukana bwa 5.9 wibasiye igice cy’uburasirazuba bw’igihugu icyo gihe na bwo wangiza ibintu byinshi unatwara n’ubuzima bwa benshi.

Imvura nyinshi ivanze n’umuyaga yiswe Freddy muri Malawi

Mu ntangiriro za Werurwe uyu mwaka, iyo mvura yaguye mu gihe cy’iminsi itandatu ubutaruhuka muri Malawi, ikaba yarataziriwe akazina ka Freddy.

Ni imvura yateje ibiza bihitana abaturage 679, ariko Perezida wa Malawi Lazarus Chakwera we yavuze ko umubare w’abahitanywe n’ibyo biza ushobora kuba wararenze 1000.

Uretse Malawi yahuye n’ibyo biza bikomeye, binavugwa ko n’ibindi bihugu byo muri Afurika y’amajyepfo byakozweho kuko abantu 17 bishwe na byo muri Madagascar, abandi 183 bo muri Mozambique aho n’abarenga 184,000 bakuwe mu byabo.

Imyuzure muri RDC yahitanye abantu 438

Mu ntangiriro za Gicurasi, mu gice cy’uburasirazuba bwa Repubulika Iharanira Demokarasi ya Congo (RDC) haguye imvura yateje imyuzure no gutenguka k’ubutaka byahitanye abantu 438 n’abandi ibihumbi n’ibihumbi basigara batagira aho kuba.

Impuguke z’Umuryango w’Abibumye zishimangira ko imvura nyinshi n’imyuzure ikabije yakomeje kuba urudaca muri iyi myaka, cyane cyane mu bice by’Afurika, kubera ingaruka z’imihindagurikire y’ibihe.

Umutingito wo muri Nepal

Taliki ya 3 Ugushyingo, umutingito ufite ubukana bwa 5.6 wibasiye uburengerazuba bwa Nepal uhitana nibura abantu 157. Iki gihugu cy’imisozi myinshi kibarizwa  aho izingiro ry’ibice bigize inda y’Isi muri aziya n’u Buhinde bihurira, na cyo gikunda kwibasirwa n’imitingito.

Umwe mu mitingito yangije byinshi muri icyo gihugu ni uwabaye mu mwaka wa 2015, uhitana abantu barenga 9,000.

Imvura ivanze n’umuyaga yateje umwuzure muri Myanmar

Tariki ya 14 Gicurasi, ni bwo uwo muyaga wari ufite umuvuduko wa kilometero 209 ku isaha (130mph) wazanye n’imvura nyinshi byibasiye igihugu cya Myanmar, biteza imfu z’abantu 145 nk’uko byatangajwe n’Ibiro Ntaramakuru by’Amerika (AP).

Iyo mvura ivanze n’umuyaga wari ufite ubukana bwinshi, ni imwe mu zikomeye zaguye muri icyo gihugu giherereye mu majyepfo y’uburasirazuba bw’Aziya.

Inkongi y’umuriro yibasiye ikirwa muri Hawaii

Ku wa 8 Kanama ni bwo ikirwa cya Maui cyibasiwe n’inkongi z’umuriro zamaze iminsi itatu ikurikiranye mbere y’uko iyo nkongi ababishinzwe bayizimya burundu.

Izo nkongi zahagaritswe zimaze guhitana ubuzima bw’abantu barenga 100, ikaba ari yo nkongi ya mbere yahitanye abantu benshi mu mateka ya Leta Zunze Ubumwe z’Amerika.

Imibare itangazwa n’Ikigo cya Kaminuza ya Hawaii gishinzwe guhangana n’Ibiza ndetse n’Ikigo cy’Igihugu gishinzwe gukumira Ibiza, ishimangira ko iyo nkongi y’umuriro yatumye Leta ikoresha miliyari 5.52 z’amadolari y’Amerika mu kwiga kuri icyo gikorwa.

  • NTAWITONDA JEAN CLAUDE
  • Ukuboza 30, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE