Impinduka mu kubaza no gutangaza amanota y’ibizamini bya Leta

  • NTAWITONDA JEAN CLAUDE
  • Nzeri 28, 2022
  • Hashize imyaka 2
Image

Uburyo buvuguruye bwo kubara amanota y’ibizamini bya Leta ni imwe mu mpinduka zagaragaye mu itangazwa ry’amanota y’abanyeshuri batsinze ibizamini bya Leta bisoza amashuri abanza n’icyiciro cya mbere cy’amashuri yisumbuye muri uyu mwaka.

Minisitiri w’Uburezi Dr. Uwamariya Valentine, yemeje ko izo atari zo mpinduka zakozwe gusa  kuko haba mu kubaza no gutangaza amanota y’abanyeshuri hari byinshi byahindutse akenshi kubera ikoranabuhanga rigezweho ryifashishijwe..

Yavuze ko uburyo bw’ikoranabuhanga bwakoreshejwe uhereye mu kwiyandikisha kw’abanyeshuri ndetse no kuza kugera mu byavuye mu bizamini, bwagize uruhare rukomeye mu kwihutisha urugendo rwo gukora ibizamini no gushyira abanyeshuri mu bigo.

Yagize ati: “Ikindi ni uko gutegura ibizamini byateguwe n’abarimu bigishije, hanyuma ibizamini bateguye ni byo byavuyemo ibizamini abanyeshuri bakoze. Habayeho kandi kuvugurura uburyo bwo gushyira mu byiciro amanota y’abanyeshuri, aho ubungubu ngira ngo mwari mumenyereye ko abarangije umwaka w’amashuri wa Gatatu, twabaraga ibyo twita ko uwagize make ari we watsinze ariko ubungubu twakoresheje uburyo bumwe hose haba ku barangiza umwaka wa gatandatu w’amashuri abanza, abarangije icyiciro rusange ndetse n’abasoza amashuri yisumbuye.”

Ku birebana no kubara amanota, impinduka yabayeho  ni uko amanota yakomeje kubarwa mu buryo bukomatanyije (aggregates) yashyizwe mu byiciro birindwi (Divisions) hagendewe ku kigereranyo cy’abahuriye ku manota ajya kungana ariko ntihatangazwe uko buri munyeshuri yakoze

Ni ukuvuga ko kuri ubu ufite “aggregates” nkeya ari na we wagize amanota make ugereranyije n’uwagize “aggregates” nyinshi nk’uko byakorwaga mu myaka yashize. Icyiciro cya mbere gifite agaciro ka 6 mu gihe icyicio cya nyuma gifite agaciro ka 0.

Umunyeshuri wa mbere urangije amashuri abanza azaba afite ikigereranyo cy’amanota 30, icyiciro rusange cy’ayisumbuye (O’ Level) azaba afite amanota 54, uwa nyuma afite 0/54, ariko uzemererwa gukomeza mu cyiciro cya kabiri cy’ayisumbuye (A Level) akaba ari ufite nibura amanota 9/54.

Umunyeshuri wa mbere mu barangije amashuri yisumbuye (A level) azaba afite amanota 60, ibyo yaba yiga byose (General Education, Professional Education cyangwa TVET), byose byashyizwe ku rwego rungana.

Uzaba ashobora guhabwa impamyabumenyi (Certificate) ni ufite nibura amanota 9/60. Ababonye munsi yayo bose bazaba batsinzwe, bakazagirwa inama yo gusibira.

Umuyobozi Mukuru w’Ikigo cy’Igihugu gishinzwe ibizamini n’Ubugenzuzi bw’Amashuri ya Leta (NESA) Dr Bahati Bernard, na we yasobanuye ibirebana n’impinduka ziri mu gutangaza amanota y’abanyeshuri.

Yavuze ko hashyizweho uburyo bubiri bw’ikoranabuhanga bufasha ababyeyi cyangwa abanyeshuri  kubona amanota mu buryo bworoshye, bumwe bukaba ari ubwo kwifashisha internet usura urubuga rwa NESA ndetse ubundi bukaba ari ubwo gukoresha telefoni aho wandika Nomero iranga umunyeshuri wakoze ikizamini bikoherezwa ku “8888”.

Yagize ati: Uburyo bwa mbere baraca ku rubuga rwa NESA, hari link ihari umuntu ajyamo akuzuzamo ibisabwa akabasha kubona amanota, ariko hari n’ubundi buryo bwo gukoresha ubutumwa bugufi uciye kuri telefoni, aho umuntu ajya aho bandikira ubutumwa, akandikaho inomero iranga umwana wakoze ikizamini (index number), hanyuma akayohereza ku 8888.”

Minisitiri w’Uburezi Dr. Uwamariya, yasobanuye n’icyatumye amanota atangazwa nyuma y’uko umwaka w’amashuri utangira. Yavuze ko byatewe n’igihe ibizamini bya Leta byarangije gukorerwa, kuko habayeho gukosora no gushyira abana mu myanya byatwaye iminsi iri munsi ya 60 ubusanzwe iba igomba kubahirizwa.

Ibyo ngo byatewe n’uko habayeho no gukoresha ikoranabuhanga ryihutishije imirimo, ndetse umwaka w’amashuri ukaba waratangiye hakiri kare kugira ngo hakomeze kwimakazwa gahunda yo gutangira umwaka w’amashuri mu kwezi kwa Nzeri.

Ati: “Twanze gukomeza tubisunika kuko ni icyemezo cyafashwe ko umwaka w’amashuri ugomba gutangira mu kwezi kwa Nzeri, aho kugira ngo abanyeshuri bose bakererwe, abandi bari mu yindi myaka batakoze ibizamini baratangiye. Mu mwaka utaha  bizadusaba kongera umubare w’ibigo by’amashuri dusanzwe dukosoreramo, n’umubare w’abarimu babikoramo.”

Uyu mwaka gukosora ibizamini byakozwe mu minsi 37 ku buryo umwaka utaha izakomeza kujya munsi bityo abanyeshuri bose bakaba bashobora kuzatangirira rimwe.

  • NTAWITONDA JEAN CLAUDE
  • Nzeri 28, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE