Imiterere mishya yo kwishyura ibyangombwa byo kubaka

  • ZIGAMA THEONESTE
  • Ukuboza 29, 2023
  • Hashize amezi 5
Image

Iteka rishya rya Perezida ryasohotse ku itariki ya 4 Ukuboza 2023,  rigena ko amafaranga yakwa kuri serivisi n’impushya zitangwa n’inzego zegerejwe abaturage byerekana ko amafaranga yakwa  ku mpushya zo kubaka ari hagati y’amafaranga y’u Rwanda ibihumbi 20 kugeza ku bihumbi 200 mu gihugu hose.

Iryo teka rishya ryerekana ko ibipimo by’amafaranga atangwa ku mpushya zo kubaka ari ibihumbi 20 ku nyubako itarenza metero kare 100 z’ubuso bwayo, amafaranga ibihumbi 100 ku nyubako yubakwa ku buso burengeje metero kare 100 kugeza kuri 200, ibihumbi 150 ku nyubako yubatse ku buso bwa metero kare zirenze 200 kugera kuri 500 n’ibihumbi 200 ku nyubako yubatse ku buso bwa metero kare zirenze 500.

Ibi bipimo bishya bigaragaza ko amafaranga atangwa ku nyubako yiyongereye ku zifite ubuso bwa metero kare zirenga 100.

Iteka rya Perezida ryo muri 2012, ryateganyaga ko inyubako yubakwa kuri metero kare ziri hagati ya 0 na 100 yishyurirwaga uruhushya rw’ibihumbi 20 by’amafaranga y’u Rwanda,

Ni mu gihe ibihumbi 40 byishyurwaga ku nyubako iri ku buso bwa metero kare ziri hagati ya 100 na 500, na ho ibihumbi 60 bikishyurwa ku ruhushya rwo kubaka inyubako yubatse ku buso bwa metero kare zirenze 500.

Ibi bipimo bishya mu kwishyura impushya zo kubaka byashyizweho hagamijwe kuvugurura uburyo impushya n’uburenganzira bwo kubaka byatangwagamo hagendewe ku busabe bw’abashaka kubaka no ku byo iteka rya Perezida riteganya.

Umuyobozi Mukuru Ushinzwe kwegereza ubuyobozi Abaturage muri Minisiteri y’imari n’igenamigambi Kubwimana Emmanuel, yagize ati: “Amafaranga atangwa ku byangombwa byo kubaka hashingiwe ku ngano y’inzu igiye kubakwa ntabwo ari ku ngano y’ikibanza iyo nzu ihereyemo.”

Rukaburandekwe Alphonse, Umuyobozi Mukuru w’Ikigo cy’Igihugu gishinzwe Imiturire (RHA), yavuze ko n’ubwo  ikibanza  cyaba gifite metero kare 300 cyangwa ubutaka bufite ubuso bwa metero kare ziri munsi ya 300 bushobora kubyazwa umusaruro bitewe n’icyo nyirabwo yifuza.

Ati: “Biterwa n’icyo ubutaka bwateganyirijwe mu gishushanyo mbonera ndetse n’icyo nyirabwo yifuza kubukoresha, ariko buri kintu cyose kigomba gukorwa hagendewe ku cyo amategeko ateganya. Abadikanyije ubutaka bashobora kubuteranya kugira babubyaze umusaruro wisumbuyeho. Ikibanza kibyazwa umusaruro bitewe n’aho giherereye”.

Yavuze ko kuba amafaranga yariyongereye bishingiye ku bikorwa remezo byubatswe ahagenewe imiturire kandi mbere ntabyabagaho.

Muhirwa Solange, Umuyobozi ushinzwe Igenamigambi mu Mujyi wa Kigali, asobanura ko nubwo umuturage yaba afite ubutaka bufite ubuso bwa metero kare 100 ahabwa ibyangombwa byo kubwubakamo.

Uwo Muyobozi kandi yanavuze ko izi mpushya zemewe gukoreshwa hagendewe ku gishushanyo mbonera cyorohereza buri wese hashingiwe ku bushobozi afite.

Asobanura ko ‘hari bamwe badahita bahabwa ibyangombwa’ kubera ko igishushanyo mbonera kikirimo kunozwa.

Ati: “Nyir’ubutaka ashobora gusubira ku bashinzwe gutanga ibyangombwa kugira ngo bagire ibyo bakosora ku biranga ikibanza cye, babijyanishe n’ibiri mu gishushanyo mbonera.”

Avuga ko igishushanyo mbonera cyateguwe neza, ku buryo cyateganyije ahagomba kubakwa ibikorwa remezo birimo ibyagenewe serivisi rusange, imiyoboro y’amazi, ubwikorezi, ibikorwa by’ubukungu, imyidagaduro, n’ibyo kurengera ibidukikije.

Bisobanuye ko nta muntu uzahabwa uruhushya rwo kubaka ahagenewe imiturire mbere y’uko igishushanyo mbonera kivuguruye gishyirwa ahagaragara.

Abafite ubutaka bwo mu bice byagenewe imiturire basaba Guverinoma kwihutisha igishushanyo mbonera  kugira babone impushya zo kubaka inzu zabo.

  • ZIGAMA THEONESTE
  • Ukuboza 29, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE