Ikoranabuhanga ry’ubwenge butari karemano rigomba kudukorera- Perezida Kagame

  • NTAWITONDA JEAN CLAUDE
  • Nzeri 17, 2023
  • Hashize amezi 8
Image

Perezida wa Repubulika y’u Rwanda Paul Kagame, yavuze ko ikoranabuhanga ry’ubwenge muntu butari karemano rizwi nka ‘Artificial Intelligence (AI)’ rikwiye gukorera abatuye Isi aho kubarwanya nk’uko bigenda bikwirakwizwa n’abantu bavuga ko rishobora kuzaba igikoresho gikomeye giteza akaga katigeze kabaho mu Isi ya muntu.

Iryo koranabuhanga rizajyana n’amarobo afite ubwenge n’imbaraga birenze iby’abantu, ku buryo ari ryo rishobora kwiharira imirimo myinsi abantu bari bamenyereye gukora mu buzima bwabo bwa buri munsi.

Perezida Kagame kuri iki Cyumweru, yibukije abatuye Isi ko bakwiye guhora bazirikana ko iryo koranabuhanga rigomba kubakorera aho gukora ribarwanya, aboneraho gushima ubuyobozi bw’Ikigo Mpuzamahanga cy’Itumanaho (ITU) cyatumije inama yiga ku gukoresha ikoranabuhanga ry’Ubwenge butari karemano mu guharanira ibyiza muri uyu mwaka.

Yabigarutseho mu ijambo yagejeje ku bitabiriye ibiganiro bigaruka ku ruhare rw’Ikoranabuhanga mu kugera ku Ntego z’Iterambere Rirambye (SDGs) i New York muri Leta Zunze Ubumwe z’Amerika (USA), byabimburiye Inama y’Inteko Rusange y’Umuryango w’Abibumbye iterana ku nshuro ya 78, guhera kuri uyu wa 17 kugeza ku ya 26 Nzeri 2023.

Ibyo biganiro byitabiriwe n’abayobozi barimo Umunyamabanga Mukuru wungirije wa Loni Amina Mohammed, Umunyamabanga Mukuru wa ITU Doreen Bogdan-Martin, Umuyobozi ushinzwe Ubuyobozi muri UNDP Achim Steiner na Visi Perezida wa Microsoft akaba n’Umuvugizi wa SDGs, Achim Steiner.

Aba bayobozi bunguranye  ibitekerezo ku buryo ikoranabuhanga rishobora kwihutisha urugendo rwo kugera ku Ntego z’Iterambere Rirambye. Aha ni ho Perezida yaboneyeho agira ati : “Tuzakomeza gukenera uburyo buhuriweho bwo gukoresha AI, imiyoborere na gahunda birinda buri wese n’ahantu yaba ari hose. Ibyo biri mu bushobozi bwacu.”

Yanavuze kandi ko u Rwanda rushyigikiye ubukangurambaga bwa ITU bwo kongera ibyo Leta n’abikorera biyemeje mu kugera ku ntego yo gukusanya miliyari 100 z’amadolari y’Amerika bitarenze mu mwaka wa 2026.

Yemeje ko miliyari 30 z’amadolari zimaze kuboneka zizifashishwa mu kongera ihuzanzira rya internet mu bihugu bikiri mu nzira y’amajyambere, kandi ko ari intambwe nziza iganisha ku kubaka ubushobozi bw’ikoranabuhanga bushobora kubyara impinduka zikomeye.

Isi yose irimo kubona imbaraga z’ikoranabuhanga

Perezida Kagame yakomoje no ku buryo Isi yose ikomeje kwibonera imbaraga z’ikoranabuhanga mu guhindura ubuzima bwa benshi, aboneraho kugaragaza ko icyerekezo ari uguhuza abatuye Isi yose hifashishijwe ikoranabuhanga rya internet.

Yavuze ko Komisiyo Mpuzamahanga y’Umuyoboro Mugari (Broadband Commission), abereye umwe mu bayobozi, yashyiriweho guharanira kugeza internet ingana kuri bose, kugira ngo buri wese abiboneremo inyungu.

Ati: “Ikibabaje ni uko n’ubu kimwe cya gatatu cy’abatuye Isi bataragerwaho na internet. Mu kugeza internet kuri bose, dukwiye kugabanya ibiciro, tugashora mu bumenyi bw’ikoranabuhanga ndetse tugakwiza ibikoresho by’ikoranabuhanga bigezweho.”

Yibukije ko haba Leta n’abikorera, buri wese afite umukoro wo kugira icyo akora kuri urwo rugendo, cyane ko ingorane zihari ari nini cyane ku buryo nta muntu ushobora kuzikemura wenyine hatabayeho ubufatanye mpuzamahanga.

Ati: “Ni muri urwo rwego, gahunda y’Umunyamabanga Mukuru y’ubufatanye mu kwimakaza ikoranabuhanga iduha uburyo bukomeye bwo gukorera hamwe mu gushyira mu bikorwa Intego z’Iterambere Rirambye. Muri Afurika dufite umugisha wo kuba dufite abaturage bakiri bato, bashoboye gukora kandi basonzeye guhanga imirimo no kwiteza imbere. Ntitwakwihanganira ko icyuho cy’ikoranabuhanga cyakwivanga kikabangamira uguhanga ibishya no kongera umusaruro.”

Hagati aho, Perezida Kagame yanakomoje ku musaruro w’ubufatanye ukomeje kwigaragaza mu Rwanda binyuze muri gahunda ya GIGA (GIGA Initiative) yatangijwe n’Ishami ry’Umuryango Mpuzamahanga ryita ku Bana (UNICEF) rifatanyije na ITU mu mwaka wa 2019 hagamijwe kugeza internet kuri buri shuri ku Isi.

Muri Kamena 2020, u Rwanda ni rwo rwatoranyirijwe kuyobora ibindi bihugu by’Afurika mu ishyirwa mu bikorwa ry’iyo gahunda imaze gutanga umusaruro ufatika mu myaka isaga ine ishize.

Biteganyijwe ko Perezida Kagame ayobora Inama y’Abajyanama b’Umukuru w’Igihugu (PAC) ihuriza hamwe impuguke z’Abanyarwanda n’abanyamahanga bamugira inama z’ingenzi ndetse na Guverinoma y’u Rwanda muri rusange.

Muri iyo nama haraganirwa ku bikorwa bishya kandi bifatika bigira uruhare mu kwihutisha iterambere ry’u Rwanda, hanarukwe ku bibazo byo mu Karere ndetse n’ibyo ku rwego mpuzamahanga bifite aho bihurira n’u Rwanda

Ibiganiro nyamukuru cy’Inama y’Inteko Rusange ya  78 (UNGA) giteganyijwe kuba ku wa Kabiri kugeza ku wa Gatandatu taliki ya 23 Nzeri, bikazakomeza kugeza ku ya 26 Nzeri aho abayobozi bazaganira ku ngingo zirebana n’ibibazo mpuzamahanga.

Perezida Kagame ategerejwe kuzavuga ijambo rnk’uhagarariye u Rwanda ku munsi wa kabiri w’ibyo biganiro nyamukuru ari wo ku wa Gatatu taliki ya 20 Nzeri 2023.

  • NTAWITONDA JEAN CLAUDE
  • Nzeri 17, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE