Ihohoterwa rishingiye ku gitsina mu Rwanda ryiyongereye 158% mu myaka 4

  • NTAWITONDA JEAN CLAUDE
  • Nyakanga 18, 2022
  • Hashize imyaka 2
Image

Imibare y’ubushakashatsi igaragaza ko ingero z’ihohoterwa rishingiye ku gitsina zavuye ku 4,947 mu 2017 zigera ku 12,804 mu mwaka wa 2021 bikaba bivuze ko ryazamutse ku kigero cya 158% mu myaka ine gusa.

Ni muri urwo rwego Umuryango uharanira iterambere ry’umugore mu Rwanda witwa Rwanda Women’s Network (RWN), watangije ubukangurambaga bugamije kurwanya ihohoterwa.

RWN ibinyujije ku rubuga rwayo rwa Twitter, kuri uyu wa Mbere tariki 18 Nyakanga 2022, yahamije ko itangije ubukangurambaga buzamara ibyumweru bitatu. Yagize iti “Tunejejwe no gutangiza ubukangurambaga buzamara ibyumweru bitatu bukaba bugamije kugaragaza ikibazo cy’ihohoterwa rikorerwa abagore n’inda ziterwa abangavu”.

Umuryango RWN usobanura ko muri iki gihe cy’ubukangurambaga hazibandwa ku kugaragaza ingaruka zishingiye ku ihohoterwa rikorerwa abagore ndetse nuko ryakwirindwa.

Ubushakashatsi bwakozwe na Minisiteri y’Uburinganire n’Iterambere ry’Umuryango (MIGEPROF) ni bwo bwagaragaje ko mu 2021 ihohoterwa rikorerwa abagore ryari ku 12,804 rivuye ku 4,947 mu 2017, bikaba bishimangira uburyo ihohoterwa rishingiye ku gitsina ryiyongereye n’ingufu nyinshi.

Icyo gihe MIGEPROF yavuze ko ikibazo atari imibare yazamutse ahubwo ko ikibazo ari umubare w’abagore n’abana b’abakobwa bahohotewe bigatuma banitakariza icyizere.

Aha ni ho RWN ihera igira iti “Ni yo mpamvu, uyu munsi dutangije ubukangurambaga bugamije guhugura Abanyarwanda mu buryo twarirwanya dufatanyije”.

Umuryango uharanira iterambere ry’umugore mu Rwanda, ushishikariza Abanyarwanda kwifatanya na wo muri ubu bukangurambaga hagamijwe guca burundu ihohoterwa rikorerwa abagore.

Imibare y’abangavu baterwa inda mu Rwanda yiyongera buri mwaka, 20.5% ni abana batarengeje imyaka 11 y’ubukure.

Ikosa rishyirwa ahanini ku babyeyi bashinjwa kutaganiriza abana babo ku bijyanye n’ubuzima bw’imyororokere.

  • NTAWITONDA JEAN CLAUDE
  • Nyakanga 18, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE