Icyatumye u Rwanda rwongera amanota yo kurwanya ruswa ku Isi

  • ZIGAMA THEONESTE
  • Mutarama 30, 2024
  • Hashize ukwezi 1
Image

Mu bushakashatsi bukorwa n’Umuryango urwanya ruswa n’Akarengane ku Isi (TI) bwiswe (CIP), bwagaragaje ko u Rwanda rwazamutseho imyanya itanu ku rwego rw’Isi mu kurwanya ruswa, inzego z’ubutabera zigahamya ko byatewe n’amavugurura yakozwe agamije guhangana n’icyaha cya ruswa by’umwihariko.

Ubwo bushakashatsi bwamuritswe na TI-Rwanda, kuri uyu wa Kabiri tariki ya 30 Mutarama, bugaragaza ko u Rwanda rwari ku mwanya wa 49 ku rwego rw’Isi ruvuye ku mwanya wa 54 rwariho mu mwaka wa 2023.

Ni mu gihe n’amanota yazamutse ava kuri 51% agera kuri 53%.

Ni u Rwanda kandi ruyoboye ibindi bihugu byo mu karere ka Afurika y’Iburasirazuba, ku mugabane w’Afurika ruza ku mwanya wa kane.

Umuvugizi w’Inkiko mu Rwanda Mutabazi Harson, avuga ko gukora amavugurura mu nzego z’ubutabera hagamijwe kurwanya ruswa, ahanini ari byo bituma igenda igabanyuka bigaha amanota meza u Rwanda mu ruhando mpuzamahanga.

Yagize ati: “Habaye amategeko yavuguruwe, nk’aho hashyizweho urwego rw’ubugenzuzi mu nkiko, ubusanzwe abantu baba bakenewe abacamanza n’abanditsi n’abandi, ayo ni amavugurura ya mbere akomeye cyane yabayeho mu kurwanya ruswa, kubera ko muri Polisi no mu Bugenzacyaha na ho burimo. Ni ikintu gikomeye cyane kigaragaza ko iki gihugu kidashobora kurebera ruswa aho iri hose.”

Mutabazi kandi asobanura ko ubwo bugenzuzi mu nkiko bufasha gutangatanga hamijwe gukumira ruswa muri rusange.

Muri ubwo bugenzuzi kandi mu nkiko haba hari Umugenzuzi wihariye ugomba gukurikirana ibyuho bya ruswa umunsi ku munsi.

Mutabazi kandi yanavuze ko hashyizweho ingereko zihari zo gukurikirana ibyaha bimunga ubukungu birimo n’ibya ruswa, iyezandonke n’ibindi.

Ati: “Icya mbere, abakora ibyaha bya ruswa babikora mu gikundi kinini cyane, rero kubifata ukabishyira hamwe n’ab’ibyaha bisanzwe, ubujura bworoheje, gukubita no gukomeretsa, ibiyobyabwenge […] byajyaga bigora umucamanza.”

U Rwanda kandi ni igihugu cyashyizeho kwimakaza ubutabera binyuze muri gahunda yo gusubirishamo imanza ku mpamvu z’akarengane.

Umuvugizi w’Inkiko Mutabazi, avuga ko u Rwanda ari rwo rwihariye iyi ngamba ku Isi, ndetse ko igira uruhare rukomeye mu kurwanya ruswa, aho hari ujya gutanga ruswa akabireka kuko aba azi ko urubanza rushobora kuzasubirwamo ku mpamvu z’akarengane.

Mutabazi ahamya ko kwimakaza ikoranabunga mu mikorere y’inzego zose na byo byazibye ibyuho by’aho ruswa ishobora kugaragarira.

Mu kumurika ubushakashatsi ngarukamwaka bwa (CPI), Appolinaire Mupiganyi, Umuyobozi Nshingwabikorwa w’Ishami ry’Umuryango urwanya ruswa n’Akarengane mu Rwanda (TI Rwanda)  yatangaje ko nubwo amanota agaragaza ko u Rwanda rwazamutse mu bipimo byo kurwanya ruswa rutagomba kwirara.

Yagize ati: “Aya manota kuva muri 2018 u Rwanda rwari rugeze ku manota hejuru ya 50%, bivuze ko uko imyaka igenda ikurikirana ntabwo twateye intambwe nini cyane. Ariko twakwishimira ko u Rwanda ruri mu bihugu bike bifite ayo manota nk’uko twabigaragaje; ibihugu bibarirwa muri 2/3 by’Isi bifite amanota ari munsi ya 50%”.

Yakomeje agira ati: “Impuzandengo y’amanota yo kurwanya ruswa ku Isi ni 43% urumva ko ruswa yashinze imizi, ntabwo twageze aho twifuza, ariko nanone twashima inzego zagize uruhare kugira ngo bibe byagerwaho.”

Mukama Abbas, Umuvunyi Wungirije ushinzwe Kurwanya Ruswa, avuga ko iyo mibare itangwa n’imiryango mpuzamahanga yongera  icyizere mu nzego zishinzwe kurwanya ruswa.

Ati: “Bitwongerera icyizere no gushyiramo ingufu, cyane cyane ko igihugu cyacu gisanzwe gifitiwe icyizere.”

Mukama asaba ubufatanye mu nzego zose kugira ngo ruswa ihashywe burundu kuko ari urugamba rwa buri wese

Ati: “Kuki tutagera ku manota 70% nk’abandi? Na byo ni urugendo twazarebera hamwe, ni izihe ngamba bakoresha zatuma natwe tugera aho bageze?…”

  • ZIGAMA THEONESTE
  • Mutarama 30, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE