Ibyemezo by’Inama y’Abaminisitiri yo ku wa 29 Ugushyingo 2023

  • Imvaho Nshya
  • Ugushyingo 29, 2023
  • Hashize amezi 3
Image

Ku wa Gatatu, tariki ya 29 Ugushyingo 2023, Inama y’Abaminisitiri yateraniye muri Village Urugwiro iyobowe na Nyakubahwa Minisitiri w’Intebe, Dr. Edouard Ngirente.

1. Inama y’Abaminisitiri yemeje imyanzuro y’Inama y’Abaminisitiri yateranye ku wa 20 Ukwakira 2023.

2. Inama y’Abaminisitiri yemeje imishinga y’amategeko ikurikira:

• Umushinga w’itegeko ryemera kwemeza burundu amasezerano ahindura amasezerano ashyiraho Umuryango Mpuzamahanga w’Ubucuruzi kugira ngo hongerwemo amasezerano yerekeye inkunga ku burobyi n’ubworozi bw’amafi.

• Umushinga w’itegeko rihindura Itegeko n°003/2016 ryo ku wa 30/03/2016 rishyiraho rikanagena imitunganyirize y’ubwishingizi bw’ibigenerwa umugore uri mu kiruhuko cyo kubyara.

• Umushinga w’itegeko ryemera kwemeza burundu amasezerano y’inguzanyo hagati ya Repubulika y’u Rwanda na Banki Gospodarstwa Krajowego, yerekeranye n’inguzanyo igenewe gutanga uburyo bwo gukonjesha amata hamwe n’ibikoresho n’inyubako by’inyongera.

• Umushinga w’itegeko ryemera kwemeza burundu amasezerano y’inguzanyo hagati ya Agence Francaise de Developpement na Repubulika y’u Rwanda, yerekeranye n’inguzanyo igenewe ikigega cy’iterambere ry’abakene mu Rwanda.

• Umushinga w’itegeko ryemera kwemeza burundu amasezerano y’inguzanyo hagati ya Agence Francaise de Developpement na Repubulika y’u Rwanda, yerekeranye n’inguzanyo igenewe umushinga wo gusana Ibitaro Bikuru bya Ruhengeri.

• Umushinga w’itegeko ryemera kwemeza burundu amasezerano y’inguzanyo hagati ya Repubulika y’u Rwanda n’Ikigega cy’Iterambere Mpuzamahanga cy’umuryango OPEC, yerekeranye n’inguzanyo igenewe kwagura umushinga wa Karenge wo gukwirakwiza amazi.

• Umushinga w’itegeko ryemera kwemeza burundu amasezerano y’inguzanyo hagati ya Repubulika y’u Rwanda n’Ikigega cya Arabiya Sawudite gitsura Amajyambere, yerekeranye n’inguzanyo igenewe umushinga wo kwagura uburyo bwo gutwara no gukwirakwiza amazi mu burasirazuba bwa Kigali.

3. Inama y’Abaminisitiri yemeje Amateka akurikira:

• Iteka rya Perezida ryerekeye uburyo amatora ya Perezida wa Repubulika n’ay’Abadepite akorwa.

• Iteka rya Minisitiri ryerekeye uburyo bw’imikoreshereze y’umubiri w’umuntu, ingingo, ingirangingo n’uturemangingo mu buvuzi no mu bushakashatsi.

4. Inama y’Abaminisitiri yemeje porogaramu n’ingamba zikurikira:

• Ingamba z’igihe giciriritse zerekeranye n’uburyo bw’isoresha na gahunda yo kuzishyira mu bikorwa.

• Amasezerano hagati ya Guverinoma y’u Rwanda na Solid’Africa.

5. Inama y’Abaminisitiri yemeje abahagarariye ibihugu bakurikira:

• Madamu Janet Mwawasi Oben, High Commissioner wa Kenya mu Rwanda, afite icyicaro i Kigali.

• Bwana Mauro Massoni, Ambasaderi w’u Butaliyani mu Rwanda, afite icyicaro i Kampala.

• Bwana Michael J. H. Rummelhoff, usabirwa guhagararira inyungu z’u Rwanda mu Bwami bwa Noruveje.

6. Inama y’Abaminisitiri yashyize mu myanya Abayobozi bakurikira:

• Gen (Rtd) Charles Kayonga, Ambasaderi w’u Rwanda Ankara muri Turkiye.

• Madamu Marie Grace Nishimwe, Umuyobozi Mukuru w’Ikigo cy’Igihugu gishinzwe Ubutaka.

 7. Mu bindi:

• Minisitiri w’Uburinganire n’Iterambere ry’Umuryango yamenyesheje Inama y’Abaminisitiri ko kuva ku itariki ya 25 Ugushyingo 2023, mu Rwanda hatangijwe ubukangurambaga bw’iminsi 16 bwo kurwanya ihohoterwa rishingiye ku gitsina, bukazarangira ku itariki ya 10 Ukuboza 2023.

• Minisitiri w’Ubutegetsi bw’Igihugu yamenyesheje Inama y’Abaminisitiri ko ku itariki ya 3 Ukuboza 2023 hazizihizwa Umunsi Mpuzamahanga w’abantu bafite ubumuga.

• Minisitiri muri Perezidansi ya Repubulika yamenyesheje Inama y’Abaminisitiri ko kuva ku itariki ya 8/12/2023, u Rwanda ruzizihiza Umunsi Mpuzamahanga wahariwe kurwanya ruswa. Ibirori bizabera mu Karere ka Musanze.

• Minisitiri w’Urubyiruko yamenyesheje Inama y’Abaminisitiri ko kuva ku itariki ya 8 kugeza ku ya 12 Ukuboza 2023, i Nairobi muri Kenya hazateranira Ihuriro ngarukamwaka rihuza urubyiruko rwo ku mugabane wa Afurika rizwi nka “YouthConnekt Africa Summit”.

Iryo Huriro rifite insanganyamatsiko igira iti “Rubyiruko, duhange ibishya tuganisha kugira Afurika itagira imipaka n’imbibi”, rizayoborwa na Minisiteri y’Urubyiruko, Iterambere ry’Ubukungu na Siporo muri Kenya ifatanyije na Minisiteri y’Urubyiruko y’u Rwanda hamwe n’Ishami ry’Umuryango w’Abibumbye rishinzwe Iterambere (UNDP).

• Minisitiri w’Ubucuruzi n’Inganda yamenyesheje Inama y’Abaminisitiri ko ku itariki ya 15 Ukuboza 2023 hateganyijwe Umunsi mpuzamahanga w’ihiganwa mu bucuruzi, hamwe n’igikorwa cyo gutangiza ku mugaragaro Politiki nshya y’ihiganwa mu bucuruzi no kurengera umuguzi.

• Minisitiri w’Ubuzima yamenyesheje Inama y’Abaminisitiri ko ku itariki ya 18 Ukuboza 2023, ku bufatanye na Sosiyeti BioNTech, i Kigali hazatangizwa ku mugaragaro Ikigo Nyafurika gikora inkingo.

Bikorewe i Kigali, ku wa 29 Ugushyingo 2023

Dr. Edouard Ngirente

Minisitiri w’Intebe

  • Imvaho Nshya
  • Ugushyingo 29, 2023
  • Hashize amezi 3
TANGA IGITEKEREZO
Bosenibamwe Vincent says:
Ugushyingo 30, 2023 at 5:12 am

Byiza cyane rwose muvandi ndabona hafatiwemo imyanzuro yubaka igihugu cyacu.
Thx

Andika igitekerezo

AMATEGEKO AGENGA IYANDIKA RY'IGITEKEREZO CYAWE