Ibyago bya kanseri y’ibihaha byikuba inshuro 22 ku banywa itabi-RBC

  • Imvaho Nshya
  • Gicurasi 31, 2022
  • Hashize imyaka 2
Image

Kuri uyu wa Kabiri taliki ya 31 Gicurasi 2022, hizihijwe Umunsi Mpuzamahanga ngarukamwaka wahariwe kurwanya itabi. Abanyarwanda bibukijwe ko abanywi b’itabi bagira ibyago byikubye inshuro 22 byo kwandura kanseri y’ibihaha mu buzima bwabo.

Kanseri y’ibihaha ni imwe mu ndwara zitandura zizahaje umubare munini w’abatuye Isi, aho zinatwara ubuzima bw’abatagira ingano buri mwaka. Binavugwa ko iyi kanseri ari imwe mu ziganje mu bantu kurusha izindi kuko iza ku mwanya wa kabiri

Imibare yatangajwe n’Umuryango Mpuzamahanga ushinzwe kurwanya Kanseri, ugaragaza ko nko mu mwaka wa 2020 ku isi hose habonetse abarwayi ba kanseri basaga miliyoni 2.2, kikavuga ko gukoresha itabi cyangwa kurinywa byongera ibyago byo kwandura iyi ndwara ihangayikishije ubuzima rusange.

Ishami ry’Umuryango w’Abibumbye ryita ku Buzima rivuga ko hafi umuntu umwe muri batanu bicwa n’ubwoko butandukanye bwa kanseri baba bambuwe ubuzima na kanseri y’ibihaha. Nubwo iri ku kigero kimwe n’icy’abandura kanseri y’ibere, kanseri y’ibihaha yo yica abantu baruta abicwa n’iy’ibere, iy’amara ndetse n’iya Prostate ubateranyije.

Ubuyobozi w’Ishami rishinzwe kurwanya indwara zitandura mu Kigo cy’Igihugu cy’Ubuzima (RBC) bwatangaje ko abanywi b’itabi baba bafite ibyago byikubye inshuro zisaga 22 zo kurwara kanseri y’ibihaha mu buzima bwabo, bakagira ibyago byo kurwara umutima ndetse n’uruhu rugasaza vuba.

Ubuyobozi bwa RBC, mu butumwa bwanyujije ku mbuga nkoranyambaga, bwagize buti: “Iyemeze kurivaho kugira ngo ubeho ubuzima buzira umuze.”

Abahanga mu by’ubuzima bavuga ko iyi kanseri ihera mu bihaha ifata mu moko abiri y’ingenzi ari yo yiswe mu rurimi rw’amahanga “non-small cell lung cancer” na “small cell lung cancer”.

Uretse abashobora kwandura banyoye itabi, binavugwa ko n’abakunda kwegera aho banywera itabi bashobora kwandura iyo kanseri, kimwe n’abashobora guhumeka ubwoko bw’uburozi bwo mu muryango umwe n’uwo mu itabi.

Bimwe mu bimenyetso by’ibi kanseri harimo inkorora idakira akenshi ukorora agacira amaraso, gutakaza ibilo no guhungetwa, kubabara mu gatuza, kubura ikiryi, kunanirwa guhumeka n’ibindi. Ibyinshi muri ibyo bimenyetso bigaragara iyo kanseri yatangiye kurenga umuntu.

Bumwe mu buvuzi bushobora guhabwa uwayirwaye harimo kumutera imiti, kumubaga, kumushiririza, kumuha imiti igabanya ibibazo bimwe na bimwe ndetse no kumwongerera ubudahangarwa bw’umubiri.

  • Imvaho Nshya
  • Gicurasi 31, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE