Ibihe byaranze BAL kuva itangiye kugera ubu

Mu gihe hategerejwe umukino wa nyuma w’ishiraniro wa BAL, hagati ya RSSB Tigers ndetse na Petro De Luanda aho imwe igomba kurara ku munsi w’ejo ku wa 31 Gicurasi 2026 iyoboye Afurika mu mukino wa Basketball, dore ibihe byayiranze ndetse n’uko amakipe yagiye asimburana ayitwara kuva yatangira mu 2019 kugeza ubu.

Amakipe azakina umukino wa nyuma wa BAL 2026 ni RSSB Tigers ihagarariye u Rwanda ndetse na Petro de Luanda yo muri Angola nyuma y’uko mu mikino ya ½ RSSB Tigers yatsinze Al Ahyl yo mu Misiri amanota 106 kuri 97 mu mukino wabereye muri BK Arena ku wa 27 Gicurasi 2026, naho Petro de Luanda yo muri Angola yakatishije itike y’umukino wa nyuma wa BAL nyuma yo gutsinda Al Ahyl Ly yo muri Libya amanota 94 kuri 88.

Iyo mikino yatangijwe ku bufatanye bwa NBA na FIBA mu 2019. BAL ni shampiyona igamije guteza imbere basketball ku mugabane wa Afurika, kongerera abanyempano amahirwe yo kwigaragaza no kugera ku rwego mpuzamahanga. Nyuma y’umwaka wa 2019, irushanwa ryagombaga gutangira muri Werurwe 2020 ariko riza gukomwa mu nkokora n’icyorezo cya Covid-19 biba ngombwa ko rikomeza mu mwaka wa 2021.

Mu 2021, icyo gihe Imikino ya nyuma (Playoffs and Finals) yatangiriye mu Rwanda ku wa 16 Gicurasi, yitabirwa n’amakipe umunani ari yo; Zamalek yo mu Misiri, US Monastir yo muri Tunisia, Petro de Luanda yo muri Angola, Patriots BBC Rwanda, Ferroviário de Maputo yo muri Mozambique, AS Salé yo muri Morocco, FAP yo muri Cameroon ndetse na AS Douanes yo muri Senegal.

Icyo gihe Zamalek yahuriye ku mukino wa nyuma na US Monastir naho ku mwanya wa gatatu Patriotis BBC ihura na Petro De Luanda. Irushanwa ryarangiye Zamalek yo mu Misiri iryegukanye, US Monastir iba iya kabiri, Petro De Luanda iba iya gatatu na ho Patriots BBC yo mu Rwanda iza ku mwanya wa kane.

Mu 2022, hitabiriye amakipe umunani n’ubundi ari yo agera mu mikino ya nyuma avuye muri 12 aba yitabiriye, icyo gihe haje; Petro de Luanda yo muri Angola, AS Salé yo muri Morocco, REG BBC yo mu Rwanda, FAP yo muri Cameroon, US Monastir yo muri Tunisia, Cape Town Tigers yo muri Afurika y’Epfo, Zamalek yo mu Misiri yari yatwaye iryabanje, ndetse na SLAC yo muri Guinea.

Irushanwa ryegukanywe na US Monastir yo muri Tunisia itsinze Petro de Luanda yo muri Angola amanota 83-72. Uyu mukino wabereye muri BK Arena ku mugoroba wo ku wa Gatandatu, tariki ya 28 Gicurasi 2022.

Muri 2023, amakipe yabashije kugera ku mikino ya nyuma yiri rushanwa ryari ribaye ku nshuro ya gatatu yari REG BBC (Rwanda), Clube Ferroviário da Beira (Mozambique), AS Douanes (Sénégal), Stade Malien (Mali), Petro de Luanda (Angola), Al Ahly (Misiri), Cape Town Tigers (Afurika y’Epfo) na Abidjan Basketball Club (Côte d’Ivoire).

Al Ahly yo mu Misiri yegukanye igikombe itsinze AS Douanes ku mukino wa nyuma amanota 80-65, Stade Malien yegukanye umwanya wa gatatu nyuma yo gutsinda Petro de Luanda amanota 73-65 mu mukino wabaye ku ya 27 Gicurasi 2023

Icyo gihe kandi ni bwo mbere y’umukino wa nyuma ku wa 26 Gicurasi 2023, Perezida Kagame ari kumwe na Madamu Jeannette Kagame, bafunguye icyanya cyahariwe siporo cyiswe “Kimironko Sports and Community Space”.

Iki kibuga giherereye ahazwi nko kwa “Mushimire”, gifite imyanya y’abantu 500. Cyubatswe ku bufatanye bwa Federasiyo y’Umukino wa Basketball mu Rwanda, FERWABA hamwe n’Irushanwa rya Basketball muri Afurika, BAL, Imbuto Foundation na Minisiteri ya Siporo.

Mu 2024, muri uyu mwaka nta kipe u Rwanda rwari rufite mu mikino ya nyuma kuko APR BBC yari yasoje amajonjora iri ku mwanya wa nyuma w’itsinda. Amakipe yageze mu mikino ya nyuma icyo gihe yari Al Ahly Ly (Libya), Al Ahly SC (Misiri), AS Douanes (Senegal), Cape Town Tigers (South Africa), FUS Rabat (Morocco), Petro de Luanda (Angola), Rivers Hoopers (Nigeria), na US Monastir (Tunisia).

Imikino ya nyuma yatangiye ku wa 24 Gicurasi 2024 irangira ku wa 1 Kamena 2024 muri BK Arena. Irushanwa ryegukanywe na Petro de Luanda (Angola) itsinze Al Ahly Ly (Libya) amanota 107 kuri 94.

Mu 2025, amakipe yageze ku mikino ya nyuma yari, Al Ahli Tripoli (Libya), Al Ittihad Alexandria (Misiri), US Monastir (Tunisia), Rivers Hoopers (Nigeria), Petro de Luanda (Angola), APR (Rwanda), Kriol Star (Cape Verde).

Iyo Mikino yabaye tariki 14 Kamena 2025 muri SunBet Arena mu Mujyi wa Pretoria muri Afurika y’Epfo yarangiye Al Ahly Ly (Libya) iryegukanye  itsinze Petro de Luanda yo muri Angola amanota 88-67.

Amakipe yabashije kugera ku mikino ya nyuma (Playoffs and Finals) muri uyu mwaka ni Petro de Luanda (Angola), Al Ahly (Misiri), RSSB Tigers (Rwanda), Club Africain (Tunisia), Al Ahly Ly (Libya), FUS Rabat (Maroc), Ville de Dakar (Senegal) na Dar City (Tanzania).

Hategerejwe kureba niba RSSB Tigers yo mu Rwanda yitabiriye iri rushanwa bwa mbere yiyongera ku rutonde rw’Amakipe yaritwaye cyangwa niba ikamba ry’ikipe ya mbere muri Afurika mu mukino wa Basket ryisubizwa na Petro De Luanda yo muri Angola yaritwaye mu 2024 itsinze Al Ahyl yo muri Libya amanota 107 kuri 94.

Umwaka ushize, iri rushanwa ryegukanywe na Al Ahly Tripoli yo muri Libya, mu gihe APR BBC yari ihagarariye u Rwanda yabaye iya gatatu.