Ibigo by’ubuzima 30% mu Rwanda ni iby’imiryango ishingiye ku myemerere

  • NTAWITONDA JEAN CLAUDE
  • Nyakanga 13, 2022
  • Hashize imyaka 2
Image

Minisitiri w’Ubuzima Dr. Ngamije Daniel, yahishuye ko hafi 30% by’amavuriro n’ibindi bigo biri mu ruhererekane rw’inzego z’ubuzima mu Rwanda ari iby’amadini n’indi miryango ishingiye ku myemerere.

Yabigarutseho kuri uyu wa Gatatu taliki ya 13 Nyakanga 2022, ubwo yahagarariraga Minisitiri w’Intebe Dr. Ngirente Edouard mu muhango wo gufungura ku mugaragaro Inama ya 10 y’Ihuriro Nyafurika rikorera ubuvugizi Imiryango ya gikirisitu n’amashyirahamwe y’amadini bitera inkunga ubuvuzi muri Afurika yo munsi y’u Butayu bwa Sahara (ACHAP).

Iyo nama iteraniye i Kigali kuva ku wa Mbere taliki ya 11 ikazageza ku ya 16 Nyakanga, ihurije hamwe abahagarariye amashyirahamwe ya gikirisitu akora mu rwego rw’ubuzima, imiryango ikwirakwiza imiti, abafatanyabikorwa mu iterambere, abahagarariye Minisiteri z’Ubuzima zo mu bihugu bitandukanye, ibigo bya Leta, amashami y’Umuryango w’Abibumbye, ibigo bikora bikanacuruza imiti, n’abandi bahagarariye imiryango ishingiye ku myemerere n’ubuzima.

Iyo nama ihurije hamwe ibigo byo ku rwego rw’igihugu 42 bitanga serivisi z’ubuzima mu bihugu bisaga 30 by’Afurika birimo n’u Rwanda.

Minisitiri Dr. Ngamije, yakomoje ku nsanganyamatsiko y’iyo nama igira iti: “Amashyirahamwe ya Gikirisitu yita ku buzima mu bihe by’ibyorezo- Urugero rwa COVID-19”, agaragaza ishimangira ikibazo inzego zose zisangiye ku Isi n’uburyo ari ingenzi gukomeza guhuza imbaraga mu guhangana n’iki cyorezo cyahashywa kimwe n’ibindi byose byibasira abaturage muri rusange.

Aho ni ho yahereye agira ati: “Ibigo by’ubuzima byashinzwe n’imiryango ishingiye ku myemerere bigera kuri 30% y’ibigo by’ubuzima mu Rwanda, bityo bikaba bigize umusingi w’urwego rw’ubuzima rwacu muri rusange. Bitanga serivisi z’ubuvuzi zihwanye n’izitangirwa mu bigo by’ubuvuzi bya Leta.”

Minisitiri Dr. Ngamije yaboneyeho gushimira imiryango ishingiye ku myemerere ikomeza guharanira ko roho nzima z’abayoboke ndetse n’Abanyarwanda muri rusange, zitura mu mibiri mizima.

Iyi nama irabonwa nk’amahirwe yo kugaragaza uruhare rw’imiryango ishingiye ku myemerere mu kurushaho gutanga serivisi z’ubuzima zizewe kandi zitangwa kinyamwuga.

Biteganyijwe kandi ko muri iyo nama hanubakirwa ubufatanye bw’imiryango itandukanye mu kurushaho guhanahana ubumenyi no gusangira ubunararibonye mu bijyanye no gutanga serivisi z’ubuzima.

Nk’uko bigaragara mu nsanganyamatsiko, biteganyijwe ko abitabiriye iyo nama bazanasuzumira hamwe udushya twahanzwe n’udukomeje guhangwa mu kwirinda COVID-19 n’ibindi byorezo bishobora kuyikurikira, uruhare rw’imiryango ishingiye ku myemerere mu gukurikirana imiterere y’icyorezo n’ibindi.

  • NTAWITONDA JEAN CLAUDE
  • Nyakanga 13, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE