Ibendera ry’u Rwanda n’irya EAC yururukijwe mu kunamira Umwamikazi Elizabeth II

  • NTAWITONDA JEAN CLAUDE
  • Nzeri 9, 2022
  • Hashize imyaka 2
Image

Nyuma y’itanga ry’Umwamikazi w’Ubwongereza, Elizabeth wa II, Perezida wa Repubulika y’u Rwanda Paul Kagame, yategetse ko Ibendera ry’u Rwanda n’iry’Umuryango w’Afurika y’lburasirazuba ari mu Rwanda, yururutswa kugeza hagati, uhereye kuri uyu wa Gatanu taliki ya 9 Nzeri 2022 kugeza igihe azatabarizwa.

Ni itangazo ryasinywe na Minisitiri w’Intebe Dr Ngirente mu izina rya Perezida Kagame, rije mu gihe mu Rwanda no ku Isi yose hacitse igikuba kubera urupfu rw’Umwamikazi wa mbere w’u Bwongereza umaze imyaka myinshi kurusha abandi bose yasimbuye ku ngoma.

Guhera taliki ya 6 Gashyantare 2022 kugeza ku ya 5 Kamena ni bwo Umwamikazi Elizabeth yizihije Isabukuru y’imyaka 70 amaze ku ngoma akaba ari na we wa mbere wizihije iyo sabukuru, mbere y’uko atanga ku wa 8 Nzeri 2022.

BBC itangaza ko umuhango w’idini wo gusezera Umwamikazi Elizabeth biteganyijwe ko uzabera i Westminster Abbey mu byumweru bitarenze bibiri, umunsi nyawo ukazatangazwa n’ingoro y’Ibwami ya Buckingham.

Abbey ni urusengero rw’amateka aho abami n’abamikazi b’Ubwongereza bimira ingoma, ari naho uyu yayimiye mu 1953, ni naho we n’igikomangoma Philip bashyingiriwe mu 1947.

Ubwami bw’Umwamikazi Elizabeth II bwaranzwe n’umurava ukomeye mu nshingano ndetse no kwitangira ingoma ye n’abaturage be.

Yabaye izingiro ry’impinduka za bwangu mu isi mu gihe ijambo ry’Ubwongereza ryakomeje gucyendera ku isi, sosiyete yarahindutse cyane ku buryo n’uruhare rw’ubwami rwibajijweho byinshi.

Gushobora kugumana ubwami muri ibyo bihe bikomeye byari ibintu bikomeye, cyane cyane ko mu gihe cy’ivuka rye, nta muntu wibazaga ko ingoma yari urwandiko rwe nk’uko byemezwa na BBC.

Elizabeth Alexandra Mary Windsor, yavutse ku itariki ya 21 z’ukwezi kwa Gicurasi mu mwaka wa 1926. Elizabeth na murumuna we Margaret Rose wavutse mu mwaka wa 1930, bigishirijwe iwabo mu rugo, aho bari bakunzwe cyane n’umuryango wabo.

  • NTAWITONDA JEAN CLAUDE
  • Nzeri 9, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE