Hateganyijwe ubushyuhe buri ku kigero cy’impuzandengo y’ubusanzwe

  • NTAWITONDA JEAN CLAUDE
  • Kanama 22, 2022
  • Hashize imyaka 2
Image

Ikigo cy’Igihugu gishinzwe ubumenyi bw’Ikirere (Meteo Rwanda), kiratangaza ko hateganyijwe igipimo cy’ubushyuhe bwinshi kiri ku kigero cy’impuzandengo y’ubushyuhe bwinshi busanzwe mu gice cya gatatu cy’ukwezi kwa Kanama 2022, ni ukuvuga kuva taliki ya 21 kugeza 31, iziyongeraho gato ugereranyije n’iyaguye mu gice cya kabiri.

Ubushyuhe bwinshi buteganyijwe mu gice cya gatatu cy’ukwezi kwa Kanama 2022 buri hagati ya dogere Selisiyusi 20 na 30 mu Rwanda.

Ubushyuhe bwinshi buri ku gipimo kiri hagati ya dogere Selisiyusi 28 na 30 buteganyijwe mu bice byinshi by’Umujyi wa Kigali, mu Turere twa Bugesera na Kayonza, mu bice by’uburasirazuba bw’Uturere twa Nyagatare, Gatsibo na Kayonza, mu gice cy’amajyepfo y’Akarere ka Rwamagana mu gice cyo hagati cy’Akarere ka Rusizi, mu majyepfo y’Akarere ka Nyamashe n’ahenshi mu gice cy’Amayaga.

Ubushyuhe bwinshi buri hagati ya dogere selisiyusi 26 na 28 buteganyijwe mu bice bisigaye by’Intara y’Iburasirazuba n’Iy’Amajyepfo, mu Mujyi wa Kigali no mu bice by’iburengerazuba mu Turere twa Rusizi na Nyamasheke.

Mu majyaruguru y’iburengerazuba bw’igihugu no mu bice byinshi bya Pariki y’Igihugu ya Nyungwe hateganyijwe ubushyuhe bwinshi buri hagati ya dogere selisiyusi 20 na 22.

Ubushyuhe bwo hasi (bucye) buteganyijwe

Ubushyuhe bucye buteganyijwe ku masaha ya nijoro mu gice cya gatatu cy’ukwezi kwa Kanama 2022 buri hagati ya dogere Selisiyusi 08 na 16 mu Rwanda.

Ahazakonja cyane hateganyijwe ubushyuhe buke buri ku gipimo kiri hagati ya dogere Selisiyusi 08 na 10 buteganyijwe mu Turere twa Nyabihu na Musanze, mu bice by’amajyepfo y’Akarere ka Burera, mu majyaruguru y’Uturere twa Gakenke na Rulindo, mu bice by’uburengerazuba bw’Akarere ka Gicumbi, mu burasirazuba bw’Uturere twa Rubavu na Rutsiro, mu majyaruguru y’iburengerazuba bw’Akarere ka Ngororero no mu gice cya Pariki y’Igihugu ya Nyungwe.

Mu bice bisigaye by’Intara y’Amajyaruguru n’iy’Iburengerazuba no mu bice byinshi by’Intara y’Amajyepfo hateganyijwe ubushyuhe bucye buri hagati ya dogere selisiyusi 10 na 12.

Ubushyuhe bucye buri hagati ya dogere selisiyusi 14 na 16 buteganyijwe ahenshi muri Pariki y’Akagera, mu gice cyo hagati mu Mujyi wa Kigali, mu Karere ka Nyagatare no mu bice by’amajyaruguru y’Akarere ka Gatsibo.

Ubushyuhe buke buteganyijwe buri ku kigero cy’impuzandengo y’ubushyuhe buke busanzwe mu kwezi kwa Kanama igice cya gatatu.

Imvura iteganyijwe

Mu gice cya gatatu cy’ukwezi kwa Kanama 2022, mu Rwanda hazarangwa n’ibicu byiganje bizatanga imvura iri hagati ya milimetero 0 na 30 ikaba iteganyijwe kuzagwa hagati ya taliki 21 na 22 no hagati y’italiki ya 27 na 29 Kanama.

Imvura iri hagati ya milimetero 20 na 30 iteganyijwe mu bice byinshi by’Uturere twa Rubavu, Nyabihu, Musanze na Burera, mu bice by’uburasirazuba no hagati mu Karere ka Rusizi, mu gice cyo hagati mu Karere ka Nyamasheke, mu burengerazuba bw’Akarere ka Nyaruguru, mu majyepfo y’iburengerazuba bw’Uturere twa Nyamagabe Nyagatare na Nyabihu no mu majyaruguru y’Akarere ka Gicumbi.

Imvura iri hagati ya milimetero 10 na 20 iteganyijwe mu bice bisigaye by’Intara y’Amajyaruguru n’Iy’Iburengerazuba, mu bice byinshi by’Akarere ka Ngoma, mu majyepfo y’Akarere ka Kirehe, mu gice cy’iburengerazuba no hagati mu Karere ka Nyagatare no muri Pariki y’Igihugu ya Nyungwe.

Umujyi wa Kigali, mu bice bisigaye by’Intara y’Iburasirazuba n’Iy’Amajyepfo hateganyijwe imvura iri hagati ya milimetero 5 na 10 naho imvura iri hasi ya milimetero 5 iteganyijwe ahenshi mu Karere ka Bugesera, mu gice cy’Amayaga, no mu duce tw’uburasirazuba tw’Uturere twa Nyaruguru, Kirehe, Kayonza, Gatsibo na Nyagatare ndetse no mu burengerazuba bw’Akarere ka Rusizi.

Imvura iteganyijwe izaba iri ku kigero cy’impuzandengo y’imvura isanzwe mu gice cya gatatu cya Kanama mu Rwanda.

Umuyaga uteganyijwe

Mu gice cya gatatu cy’ukwezi kwa Kanama 2022 uzaba ufite umuvuduko uri hagati ya metero 4 na 10 ku isegonda.

Umuyaga mwinshi ufite umuvuduko uri hagati ya metero 8 na 10 ku isegonda uteganyijwe ahenshi mu N tara y’Iburengerazuba no muri Pariki y’Igihugu y’Ibirunga.

Umuyaga uringaniye ufite umuvuduko uri hagati ya metero 4 na 6 ku isegonda uteganyijwe mu Mujyi wa Kigali, mu gice cy’Amayaga no mu Turere twa Kamonyi na Muhanga.

Ahandi hasigaye hateganyijwe umuyaga wenda kuba mwinshi ufite umuvuduko uri hagati ya metero 6 na 8 ku isegonda.

  • NTAWITONDA JEAN CLAUDE
  • Kanama 22, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE