Hateganyijwe imvura iri hejuru gato y’ikigero cy’impuzandengo y’isanzwe

  • NTAWITONDA JEAN CLAUDE
  • Nzeri 2, 2022
  • Hashize imyaka 2
Image

Ikigo cy’Igihugu gishinzwe ubumenyi bw’ikirere (Meteo Rwanda), kiratangaza ko imvura iteganyijwe mu gice cya mbere cy’ukwezi kwa Nzeri 2022, kuva taliki ya 1 kugeza taliki ya 10, mu Rwanda iri hejuru gato y’isanzwe igwa muri iki gihe.

Meteo Rwanda ikomeza itangaza ko imvura iteganyijwe muri iki gice cya mbere cya Nzeri 2022 izaba iri hejuru gato y’ikigero cy’impuzandengo y’imvura isanzwe igwa muri iki gice mu bice byinshi by’amajyaruguru n’uburengerazuba bw’Igihugu, ikaba iri ku kigero cy’impuzandengo ahasigaye.

Iminsi imvura izagwamo izaba iri hagati y’iminsi ibiri (2) n’itanu (5), mu Ntara y’Iburengerazuba iteganyijwe kuboneka taliki ya 1, iya3, iya 4, iya 8 n’iya 9 naho ahandi mu Gihugu iteganyijwe taliki ya 1, iya 8 n’iya 9 Nzeri 2022.

Imvura iteganyijwe

Mu gice cya mbere cy’ukwezi kwa Nzeri 2022 (kuva taliki ya 1 kugeza taliki ya 10), mu Rwanda hateganyijwe imvura iri hagati ya milimetero 0 na 100.

Imvura iri hagati ya milimetero 80 na 100 niyo nyinshi iteganyijwe muri iki gice ikaba iteganyijwe mu Karere ka Rubavu, mu majyaruguru y’Akarere ka Rutsiro, mu burengerazuba bw’Akarere ka Nyabihu, mu gice gito cy’uburengerazuba bw’Akarere ka Musanze no mu burasirazuba bw’Uturere twa Nyagatare na Gatsibo.

Imvura iri hagati ya milimetero 60 na 80 iteganyjwe mu bice byinshi by’Intara y’Amajyaruguru no mu Karere ka Nyagatare, mu burasirazuba bw’Uturere twa Gatsibo na Kayonza no mu bice byinshi by’amajyaruguru n’amajyepfo y’Intara y’Iburengerazuba.

Imvura iri hagati ya milimetero 40 na 60 iteganyijwe mu bice bisigaye by’Intara y’Iburengerazuba, mu majyaruguru y’Uturere twa Gicumbi na Rulindo, mu majyepfo y’Akarere ka Gakenke, mu bice byinshi by’Uturere twa Karongi, Nyamagabe, Muhanga na Nyarugenge, mu bice by’uburengerazuba bw’Uturere twa Gasabo na Nyaruguru no mu burengerazuba bw’Akarere ka Kicukiro no mu bice by’uburasirazuba bw’Akarere ka Kamonyi.

Imvura iri hagati ya milimetero 20 na 40 iteganyijwe mu bice bisigaye by’Umujyi wa Kigali, iby’Intara y’Amajyepfo n’iy’Iburasirazuba ukuyemo Akarere ka Ngoma, aka Gisagara, ibice by’amajyepfo by’Uturere twa Kayonza na Rwamagana no mu burasirazuba bw’Uturere twa Nyaruguru na Bugesera hateganyijwe imvura iri hagati ya milimetero 0 na 20.

Imvura iteganyijwe izaba irimo inkuba ikazaterwa n’isangano ry’imiyaga riherereye mu karere u Rwanda ruherereyemo riri kwerekeza mu gice cy‘epfo cy’Isi, ryongerera imbaraga imvura ituruka ku miterere ya buri hantu.

Umuyaga uteganyijwe

Umuyaga mwinshi ufite umuvuduko uri hagati ya metero 8 na 10 ku isegonda uteganyijwe mu Karere ka Karongi, mu majyepfo y’Akarere ka Rutsiro, mu burasirazuba bw’Akarere ka Nyamasheke, mu bice by’amajyaruguru y’Akarere ka Rubavu no mu bice byo hagati mu Turere twa Gatsibo na Kirehe. Umuyaga uriganiye uri hagati ya metero 4 na 6 ku isegonda uteganyijwe mu bice bisigaye by’igihugu.

Ubushyuhe buteganyijwe

Mu gice cya mbere cy’ukwezi kwa Nzeri 2022, hateganyijwe ubushyuhe buri hagati ya dogere Selisiyusi 20 na 30 mu Rwanda.

Ubushyuhe bwinshi buri hagati ya dogere Selisiyusi 28 na 30 buteganyijwe mu Mujyi wa Kigali, mu kibaya cya Bugarama, igice cy’Amayaga, mu Karere ka Bugesera n’Aka Ngoma, mu burasirazuba bw’Uturere twa Nyagatare, Gatsibo na Kayonza no mu bice by’amajyepfo y’Akarere ka Kirehe

Igipimo cy’ubushyuhe kiri hagati ya dogere selisiyusi 26 na 28 giteganyijwe mu bice bisigaye by’Intara y’Iburasirazuba, mu bice byinshi byegereye ikiyaga cya Kivu, igice cyo hagati mu Karere ka Rusizi no mu Turere twinshi tw’Intara y’Amajyepfo ukuyemo íbice by’uburasirazuba bw’Uturere twa Nyamagabe na Nyaruguru biteganyijwemo ubushyuhe buri hagati ya dogere selisiyusi 20 na 24.

Igipimo cy’ubushyuhe kiri hagati ya dogere selisiyusi 20 na 24 giteganyijwe kandi mu bice byinshi by’Intara y’Amajyaruguru, mu Karere ka Nyabihu, mu burasirazuba bw’Uturere twa Rubavu na Rutsiro, mu majyaruguru ya Ngororero no mu burengerazuba bw’Uturere twa Nyamagabe na Nyaruguru.

Ingaruka ziterwa n’imvura irimo umuyaga ziteganyijwe cyane cyane ahateganyijwe imvura nyinshi n’umuyaga mwinshi. Meteo Rwanda iragira inama Abanyarwanda n’inzego bireba gukomeza ingamba zo gukumira ibiza.

  • NTAWITONDA JEAN CLAUDE
  • Nzeri 2, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE