Hatahutse 103 bavuye muri RDC, hitezwe abandi kuri uyu wa Gatanu

  • NTAWITONDA JEAN CLAUDE
  • Nyakanga 7, 2022
  • Hashize imyaka 2
Image

Ku wa Gatatu, Leta y’u Rwanda yakiriye Abanyarwanda 103 batahutse bavuye muri Repubulika Iharanira Demokarasi ya Congo (RDC). 

Abo Banyarwanda bakiriwe mu Nkambi y’agateganyo iherereye ahitwa Kijote mu Murenge wa Bigogwe, Akarere ka Nyabihu. 

Minisiteri Ishinzwe Ibikorwa by’Ubutabazi (MINEMA) yatangaje ko abatahutse bazahabwa ubufasha bw’ibanze burimo ibiribwa n’ibindi bikoresho bazakenera mu gihe cy’amezi atatu. 

Biteganyijwe kandi ko abagejeje igihe  bagiye gukorerwa indangamuntu ndetse n’imiryango yabo ishyirwe muri gahunda z’ubuzima rusange mu gihe kitarenze umwaka umwe. 

Biteganyijwe ko kuri uyu wa Gatanu hari abandi Banyarwanda bazakirwa ku mupaka wa Rusizi. 

Abatahuka baje basanga abasaga miliyoni 3.5 batahutse bavuye muri RDC mu myaka 28 ishize, bakaba bakomeje gufatanya n’abandi mu rugendo rwo kubaka Igihugu. 

MINEMA ivuga ko mu myaka itanu ishize yonyine u Rwanda rwakiriye abatahuka 15,643 biganjemo abaturutse muri RDC kandi Leta zombi zagiye zifatanya n’Ishami ry’Umuryango w’Abibumbye ryita ku Mpunzi (UNHCR) mu guharanira ko babaho ubuzima bubaha agaciro nyuma yo gukuraho sitati y’ubuhunzi. 

Gusa Leta y’u Rwanda yemeza ko icyemezo cyo gutahuka ari icy’umuntu ku giti cye, ari na yo mpamvu ishimira ubufatanye buhoraho ifitanye na UNHCR. 

 Mu mwaka wa 2009 ni bwo u Rwanda rwatangije gahunda ihamye itanga ibisubizo ku bibazo by’Abanyarwanda bari mu buhungiro aho abenshi babaga muri RDC. 

Mu 2010 ni bwo iyari Minisiteri yo Gukumira Ibiza no gucyura Impunzi (MIDIMAR) ifatanyije n’abagatanyabikorwa batandukanye batangije gahunda Nzahurabukungu n’imibereho myiza igenewe abatahuka n’abandi batishoboye. 

Nyuma hanatangijwe gahunda ihamye yo gusubiza mu buzima busanzwe abatahutse mu rwababyaye  bakisanga muri gahunda zose z’iterambere nk’abandi Banyarwanda. 

Guverinoma y’u Rwanda yongeye gushimangira ko itazatezuka guharanira ko abatahuka mu Rwanda bose babona uburenganziwa bwose bageze mu gihugu kandi bakoroherezwa kugira uruhare mu iterambere ryabo n’iry’Igihugu muri rusange. 

Ivuga kandi ko itazatezuka gufatanya n’abandi bafatanyabikorwa mu guharanira ko abakomeza gutahuka bakirwa mu cyubahiro. 

  • NTAWITONDA JEAN CLAUDE
  • Nyakanga 7, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE