Hasinywe amasezerano yo kuzamura ikoranabuhanga mu buhinzi n’ubworozi

  • NTAWITONDA JEAN CLAUDE
  • Nyakanga 28, 2023
  • Hashize amezi 10
Image

Guverinoma y’u Rwanda yasinyanye amasezerano n’Umushinga Hinga Wunguke yo gutez imbere ikoranabuhanga mu buhinzi n’ubworozi.

Umunyamabanga Uhoraho muri Minisiteri y’Ubuhinzi n’Ubworozi Olivier Kamana yatangarije Imvaho Nshya ko umushinga  CAES ugamije gushyiraho uburyo bunoze bujyanye n’igihe bwo kugeza amakuru ku bahinzi n’aborozi no kubamenyesha ibyavuye mu bushakashatsi kugira ngo bibafashe gukora ubuhinzi bwa kijyambere butanga umusaruro.

Yagize ati: “Hano turimo  turanoza uburyo ibyavuye mu bushakashatsi byagezwa ku bahinzi n’aborozi bakaba bahindura imikorere yabo bakongera n’umusaruro muri rusange”.

Yakomeje asobanura ko ubusanzwe hakoreshwaga ishuri ryo mu murima, abahinzi bakigira mu murima,  ariko noneho byakorwa hifashishijwe ikoranabuhanga riteye imbere.

Ati: “Ubusanzwe twakoreshaga ishuri ryo mu murima, ariko ubu dushaka uburyo byakorwa twifashishije ikoranabuhanga nko gukoresha telefone n’ubundi buryo aho umuhinzi ari we ugera aho ubushakashatsi bwakorewe, dushaka kubivugurura, nk’uburyo inyongeramusaruro zagezwaga ku bahinzi bakoresheje telefone. Dushaka ko n’amakuru yandi yajya abageraho bakoresheje ikoranabuhanga.

Muri iki cyiciro cya gatanu cy’umushinga turashaka kurushaho kwegera umuhinzi n’umworozi, tukababa hafi igihe cyose amakuru akabageraho vuba”.

Yongeyeho ko umushinga Hinga Wunguke uzabafasha mu ruhererekane, ari uburyo bwo kugira ngo umuhinzi akore ubuhinzi bwa kijyambere ave mu bwa gakondo, bwa buhinzi bwo kubona ibibatunga gusa, ahubwo basagurire amasoko, ubuhinzi bwabo butere imbere.

Dan Gies, ukuriye Umushinga Hinga Wunguke we yagarutse ku byo uwo mushinga uzitaho.

Ati: “Amasezerano twasinyanye na RAB agamije gutuma ari Leta, abikorera, abahinzi n’aborozi bakorera hamwe,  abari mu ruhererekane bakabona serivisi zikenewe ariko by’umwihariko abahinzi n’aborozi bakuremo inyungu yisumbuyeho”.

Yongeyeho ko intego ya Hinga Wunguke igamije kuzamura umusaruro, abantu bakihaza ku biribwa, kunoza imirire,kugera ku masoko n’ibindi.

Umuyobozi Mukuru w’Ikigo cy’Igihugu cyo guteza imbere Ubuhinzi n’Ubworozi RAB, Dr. Ndabamenye Telesphore yavuze ko binyuze mu kongera umusaruro Umushinga Hinga Wunguke wagiranye imikorere myiza mu bijyanye no gutanga icyerekezo, kuvugurura iyamamazabuhinzi n’iyamamazabworozi biganisha ku bukire hagamijwe kuzamura umusaruro. 

Yakomeje avuga ko intego y’umushinga igira aho ihurira na RAB mu kuzuzanya haba ari mu bumenyi no mu bushobozi bifasha kugera vuba ku ntego  zunganira Iterambere ry’Ubuhinzi n’Ubworozi.

Aba ni bamwe mu bari mu nama yasinyiwemo ayo masezerano

Ati: “Icya mbere twagarutseho ni iyamamazabuhinzi aho uburyo bwibandaga cyane ku mihingire no kubona umusaruro ariko ugasanga tubura ibijyanye n’ubumenyi budahagije no kugera ku masoko, ibijyanye n’ubuziranenge, n’ibindi.

Umushinga Hinga Wunguke uzagira uruhare mu kongerera agaciro ibikomoka ku buhinzi n’ubworozi, kuzamura umusaruro, kuwongerera agaciro,  kubungabunga ibidukikije hibandwa ku guhangana  n’imihindagurikire y’ibihe, guteza imbere ubumenyi, kongerera ubushobozi abari mu ruhererekane rw’ibyo kurya biva ku buhinzi n’ubworozi,  n’ibindi.

Amasezerano yashyizweho umukono n’Umuyobozi Mukuru wa RAB Dr Ndabamenye na Dan Gies, ukuriye Umushinga Hinga Wunguke.

Nyuma yo gusinya amasezerano ku mikorere n’imikoranire hazibandwa ku  kwegera abahinzi n’aborozi,  ivugurura rijyanye no kubegereza ubumenyi no kubigisha mu by’ubihinzi n’iyamamazabuhinzi, gukomeza ubushakashatsi mu giturage hafatwe ibyavuyemo bigezwe ku bahinzi n’aborozi.

Imikoranire izafasha kugera ku ntego yo kuzamura umusaruro.

Umushinga Hinga Wunguke ukorera  mu Turera mu Turere 13 hirya no hino mu  Gihugu, uterwa  n’Ikigo cy’Abanyamerika gishinzwe iterambere “USAID” uzamara imyaka 5 (2023-2028).

Yanditswe na NYIRANEZA JUDITH

  • NTAWITONDA JEAN CLAUDE
  • Nyakanga 28, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE